گەموفيليا – قانى دۇرىس ۇيىمايتىن, سيرەك كەزدەسەتىن, تۇقىم قۋالايتىن كەسەل. دۇنيەجۇزىندە وسى اۋرۋعا شامامەن 10 000 ادامنىڭ بىرەۋى شالدىعادى. ەگەر ەم-دومى دەر كەزىندە باستالامي, تۇراقتى الماستىرۋ تەراپياسى بولماسا, قان توقتاماۋدىڭ اۋىر سالدارى مۇگەدەكتىك پەن اجالعا دۋشار ەتۋى مۇمكىن.
دەگەنمەن, قازىرگى تاڭدا زاماناۋي دياگنوستيكا مەن ەمدەۋ سيرەك كەزدەسەتىن كەسەلدى مەيلىنشە باقىلاۋدا ۇستاپ, اسقىنۋ قاۋپىن ازايتىپ وتىر. وسىنىڭ ارقاسىندا گەموفيليانىڭ اۋىر تۇرىنە شالدىققان ناۋقاستاردىڭ جاسى بۇگىندە 75-77 جىلعا دەيىن ۇزارعان. بىراق, ماماندار بىرقاتار ماسەلەلەردىڭ بار ەكەندىگىن العا تارتتى.
سەبەبى ناۋقاستاردىڭ عانا ەمەس, ەلدىڭ دە وسى اۋرۋدىڭ ەرەكشەلىكتەرى تۋرالى ءبىلىمى جەتكىلىكسىز. كەيبىر ناۋقاستار الەۋمەتتىك شەتتەۋ كورىپ, اينالاسىنداعىلاردىڭ تۇسىنبەۋشىلىگىنە ءجيى تاپ بولىپ جاتادى. وعان قوسا گەموفيليا جۇقپالى ەكەن دەگەن دە جاڭساق پىكىر كەڭ تاراعاندىقتان, كەيبىر وتباسىلار الالاۋشىلىق پەن الەۋمەتتىك كەدەرگىلەردە تاپ بولىپ جاتادى. ءبىر جاعىنان ناۋقاستاردىڭ ءوزى بولماشى جاراقاتتاردىڭ اۋىر, ءتىپتى ومىرگە قاۋىپ توندىرەتىن جاعدايعا جەتكىزۋى مۇمكىن دەپ ۇرەيلەنەدى.
جانە بۋىن مەن باسقا مۇشەلەرگە ۇدايى قان كەتۋى سوزىلمالى اۋىرسىنۋ سەزىمىن تۋدىرىپ, مۇگەدەكتىك قاۋپىن ارتتىرادى جانە شۇعىل مەديتسينالىق كومەك الۋعا ۇنەمى ءازىر ءجۇرۋدى تالاپ ەتەدى. سوندىقتان ناۋقاستار جاراقاتتانىپ قالماۋى ءۇشىن كوبىنەسە بەلسەندىلىگىن شەكتەپ, وتە ساق ءومىر سۇرۋگە ءماجبۇر بولادى. الايدا, بۇگىندە گەموفيلياعا شالدىققان ناۋقاستاردىڭ ومىرىندە سپورت ماڭىزدى ءرول اتقاراتىنى دالەلدەنگەن. ءجۇزۋ, جاياۋ ءجۇرۋ, بادمينتون, ساداق اتۋ, ۆەلوسيپەد تەبۋ, ەسكەك ەسۋ, ۇستەل تەننيسى سياقتى دۇرىس تاڭدالعان, وزگەلەرمەن جاناسپايتىن سپورت تۇرلەرى بۇلشىق ەتتەردى نىعايتادى, دەنە ءبىتىمىن جاقسارتادى جانە قان كەتۋ قاۋپىن ازايتادى.
ءباسپاسوز ءماسليحاتىندا الماتى قالاسىنىڭ باس شتاتتان تىس بالالار گەماتولوگى, №2 قالالىق بالالار كلينيكالىق اۋرۋحاناسىنىڭ گەماتولوگيا ءبولىمىنىڭ مەڭگەرۋشىسى ۇلجالعاس وسكەنباەۆا: «تالاي جىلدان بەرى ۋاقتىلى دياگنوستيكا مەن الماستىرۋ تەراپياسىنىڭ زاماناۋي ادىستەرى گەموفيليامەن تۋعان ادامداردىڭ تاعدىرىن قالاي وزگەرتەتىنىن كورىپ كەلە جاتىرمىن. وتىز جىلداي بۇرىن ناۋقاستار بالالىق شاعىندا-اق دەرتتەرى ءجيى اسقىنىپ جاتاتىن. ويتكەنى, اۋرۋ ەرتە بالالىق شاقتا انىقتالادى, سول سەبەپتى ءاربىر ناۋقاسقا باسىنان باستاپ دۇرىس ەمدەۋ ءادىسىن تاڭداپ, ونىڭ تيىمدىلىگىن قاداعالاپ وتىرۋ ماڭىزدى», دەيدى.
وسى ارادا قازاقستاندا گەموفيلياعا شالدىققانداردى ەمدەۋدى مەملەكەت ءوز موينىنا الىپ وتىرعانىن جانە ارىپتەس رەتىندە «تاكەدا» فارماتسەۆتيكالىق كومپانياسىمەن جۇمىس ىستەپ وتىرعانىنا اتاپ وتكەن ءجون.
«تاكەدا قازاقستان» جشس ديرەكتورى ميحايل ۆلاديميروۆ يننوۆاتسيالىق پرەپاراتتار تۋرالى ايتا كەلە: ء«بىز مەديتسينالىق شەشىمدەردى عانا ەمەس, سونىمەن قاتار دارىگەرلەرگە ارنالعان ءبىلىم بەرۋ باعدارلامالارىن, تسيفرلىق قۇرالداردى دامىتا وتىرىپ, ناۋقاستاردىڭ ءومىر ساپاسىن جاقسارتۋعا باعىتتالعان الەۋمەتتىك باستامالاردى قامتيتىن كەشەندى قولداۋ جۇيەسىن قۇرۋعا ۇمتىلامىز, دەيدى.
فارماكومپانيا باسشىسى الەۋمەتتىك جاۋاپكەرشىلىك اياسىنداعى ماڭىزدى باستامالاردىڭ ءبىرى رەتىندە بىلتىر جارىق كورگەن ء«الي جانە ونىڭ ىشكى الەمى» اتتى كىتاپتى اتادى. استارلى ەرتەگى ءوزىنىڭ سيرەك كەزدەسەتىن سىرقاتىن تۇسىنۋگە, قورقىنىشىن جەڭۋگە ۇيرەنىپ جاتقان بالانىڭ ىشكى تولعانىسىنا ارنالعان. ايتقانداي, وتكەن جىلى قازاق تىلىندە جارىق كورگەن كىتاپ سۇرانىسقا يە بولىپ, جۋىردا اعىلشىن تىلىندەگى نۇسقاسى جارىققا شىقپاق.
