سۋرەت: instagram.com/clausstrunz/
بۇگىندە باتىس مەدياسى كوبىنە سولشىل نە وڭشىل باعىتتا حابار تاراتادى, ال «Euronews» ءوز جولىن بەيتاراپتىق دەپ تاڭداعان. ارينە, بۇل – وڭاي شارۋا ەمەس, ويتكەنى ءار ءجۋرناليستىڭ ءوز مادەني, الەۋمەتتىك بەكگراۋندى بار. دەگەنمەن ولار ءار ءسات سايىن بەيتاراپتىقتى ۇستانۋعا تىرىسادى.
بۇل ۇستانىم ورتالىق ازيا ايماعىن قامتيتىن رەپورتاجدارعا دا ءتان. ءبىز ايماققا قانداي دا ءبىر بۇرمالانعان كوزقاراسپەن ەمەس, شىنايى قىزىعۋشىلىقپەن قارايمىز. ءبىز وقيعالارعا باعا بەرمەيمىز, كەرىسىنشە, نە بولىپ جاتقانىن كورسەتكىمىز كەلەدى. «Euronews» تەك پروبلەمالاردى ەمەس, ءوڭىردىڭ مۇمكىندىكتەرىن دە كورسەتۋدى ماقسات تۇتادى.
ارنا دايىنداعان جوبالار ورتالىق ازيا ەلدەرىندەگى سەرپىندى ەكونوميكالىق وزگەرىستەردى, مادەني جانە تۋريستىك الەۋەتتى كورسەتۋگە باعىتتالعان. بۇل – ەۋروپا كورەرمەنىنە ءوڭىردى تانىتاتىن ۇلكەن ەكران ىسپەتتى.
«Euronews» جي-ءدى قاۋىپ ەمەس, كەرىسىنشە جۋرناليستيكانى جاقسارتۋدىڭ قۇرالى رەتىندە قاراستىرادى. ءبىز جاساندى ينتەللەكتىنى قابىلداپ, ونى جۋرناليستيكانىڭ ساپاسىن ارتتىرۋ ءۇشىن پايدالانعىمىز كەلەدى. بۇل تەحنولوگيانى قالاي قولداناتىنىمىز – ءوزىمىزدىڭ قولىمىزدا.
سونداي-اق ورتالىق ازيا مەن ەۋروپا اراسىنداعى بايلانىستىڭ نىعايىپ كەلە جاتقانىن كورسەتەتىن مىسالدار جەتكىلىكتى. جاقىندا وزبەكستاندا وتكەن ەو-وا ءسامميتىن ىنتىماقتاستىقتىڭ جاڭا كەزەڭى دەۋگە ابدەن بولادى. «Euronews» بۇل ۇدەرىستەردى جاريالاپ, ديالوگ ورناتۋعا جانە ءتۇرلى كوزقاراستاردى كورسەتۋگە اتسالىسۋدى جالعاستىرا بەرمەك.
وسى وڭىردە دە ميدىڭ كۇشى, يننوۆاتسيالىق الەۋەت جەتەرلىك. استانادا بولىپ جاتقان نارسەلەردى كورگەندە ءوسىپ كەلە جاتقان ەكونوميكالىق قوعامدى بايقايمىن. كەيدە ءتىپتى كەيبىر ەۋروپا ەلدەرىنە قاراعاندا بۇل جاقتا دامۋ ديناميكاسى, كوزقاراسى الدەقايدا ءپوزيتيۆتى سياقتى كورىنەدى. بۇل – ءوڭىردى ءتۇسىنۋ قيىن دەگەن باتىستىق كوزقاراس ەمەس, باتىس ەۋروپانىڭ شىنايى قىزىعۋشىلىعىنان تۋعان كوزقاراس.
بۇل ساپار – مەنىڭ استاناعا ەكىنشى رەت كەلۋىم. العاش رەت دۇنيەجۇزىلىك كوشپەلىلەر ويىنى كەزىندە اياق باستىم. بۇرىن مەن بۇل ويىن تۋرالى ەستىمەگەنىمە قاتتى ۇيالدىم. ويتكەنى جۋرناليستەر ادەتتە ءبارىن بىلەمىز دەپ ويلايمىز عوي. بىراق مەن تاڭعالدىم. بۇل تەك سپورت نەمەسە ساياسات ەمەس, مادەنيەت پەن ءداستۇردىڭ قۋاتىن سەزىندىرگەن وقيعا بولدى. سول كەزدە مەن ءبىر جاۋاپكەرشىلىكتى ءتۇسىندىم: امەريكانى ءتۇسىنۋ ءۇشىن ەۋروپانىڭ وتكەن عاسىرداعى جولىن ءبىلۋ كەرەك. سول سياقتى ءبىز دە ءوڭىردى ءتۇسىنۋ ءۇشىن الدىمەن ونىڭ مادەنيەتى مەن تاريحىنا تەرەڭ بويلاعانىمىز ابزال.
كلاۋس شترۋنتس,
«Euronews» تەلەارناسىنىڭ باس ديرەكتورى
