ءىستى اقپاراتتىق قولداۋسىز ىلگەرىلەتۋ مۇمكىن ەمەس

اوسشك الدىن الۋ ءتاسىلىن باسشىلىققا الىپ, مەملەكەتارالىق ىنتىماقتاستىقتى نىعايتۋ مەن ۇزدىك تاجىريبەلەردى الماسۋعا ۇلەس قوسىپ كەلەدى. ۇيىم ىشىندەگى جاستار كەڭەسىنىڭ وتىرىستارى – وسى جۇمىستىڭ ماڭىزدى بولىگى. جۋىردا سامارقاندتا وتكەن جيىندا جاستاردى راديكالدانۋدان قورعاۋ ماسەلەسى تالقىلاندى. سونداي-اق اوسشك اياسىندا جەتەكشى ۋنيۆەرسيتەتتەردىڭ سەرىكتەستىك جەلىسى قۇرىلعانىن اتاپ وتكىم كەلەدى. بۇل پلاتفورما اكادەميالىق الماسۋعا, بىرلەسكەن ءبىلىم بەرۋ باعدارلامالارىن ىسكە قوسۋعا جانە جاستاردىڭ وڭىرلىك كۇن ءتارتىبىن قالىپتاستىرۋعا بەلسەندى قاتىسۋىنا جاعداي جاسايدى.

بۇگىندە يادرولىق قارۋ قاۋپى دە قايتا وزەكتى بولا ءتۇستى. الايدا ورتالىق ازيا يادرولىق قارۋدان ازات ايماق مارتەبەسىنە قول جەتكىزگەن كەڭ اۋقىمدى ءوڭىر ەكەنىن دە اتاپ ءوتۋ كەرەك. الماتىلىق اكت ۇيىمنىڭ قۇرىلتاي قۇجاتى رەتىندە يادرولىق قارۋسىزدانۋ, كۇش قولدانۋدان جانە قولدانۋ قاۋپىنەن باس تارتۋ, سەنىمدى ديالوگ پەن ءوزارا ءىس-قيمىل ارقىلى بەرىك بايلانىستاردى نىعايتۋ قاعيداتتارىنا بەرىلگەندىكتى بىلدىرەدى. سول ارقىلى اوسشك مۇشە مەملەكەتتەرگە ءار سالادا سەنىم شارالارىن ۇسىنا وتىرىپ, وسى قاعيدالارعا سۇيەنەدى.

ازەربايجان ءوزىن ورتالىق ازيانىڭ تاريحي ءبىر بولشەگى رەتىندە سەزىنەدى. وتكەن جىلدان باستاپ بۇل ەل كەڭەسكە توراعالىق ەتىپ كەلەدى. توراعالىقتىڭ ۇرانى – «كۇشتى اوسشك: ءوزارا بايلانىس, تسيفرلاندىرۋ جانە تۇراقتى ءوسىم». وسى ارقىلى ازەربايجان ۇيىم ميسسياسىنا ادالدىعىن, ءارى قاراي دامىتۋعا ۇمتىلىسىن جانە بۇعان دەيىنگى توراعا-ەلدەردىڭ جەتىستىكتەرىنە سۇيەنەتىنىن كورسەتتى. ازەربايجاننىڭ باستى ماقساتى – ۇيىمنىڭ ينستيتۋتسيونالدىق نەگىزىن كۇشەيتە وتىرىپ, ونىڭ ستراتەگيالىق ترانسفورماتسياسىن جۇزەگە اسىرۋ. ول سونداي-اق ايەلدەردىڭ شەشىم قابىلداۋ ۇدەرىسىنە قاتىسۋىن كەڭەيتۋ, تۇراقتى كولىك جانە قارجىلىق بايلانىستى دامىتۋ, كليماتتىق كۇن ءتارتىبى اياسىنداعى ىنتىماقتاستىقتى ارتتىرۋ سياقتى حالىقارالىق باسىمدىقتاردى العا تارتىپ وتىر.

بۇل باستامالاردى ءتيىمدى ىلگەرىلەتۋ اقپاراتتىق قولداۋسىز مۇمكىن ەمەس. سول سەبەپتى ءبىز ۇيىمنىڭ رەسمي سايتى مەن الەۋمەتتىك جەلىلەرىن دامىتىپ, تارتىمدى ءارى مازمۇندى كونتەنت جاساپ, جۋرناليستەرمەن بەلسەندى جۇمىس ىستەپ كەلەمىز. جۋرناليستەر پۋلىن قالىپتاستىرىپ, مۇشە مەملەكەتتەردەگى مەديا وكىلدەرىن ءتۇرلى كونكۋرستار ارقىلى ىنتالاندىرامىز.

وسىعان وراي, ورتالىق ازيا جانە جالپى ازيا ءوڭىرىنىڭ مەدياسىن اوسشك كۇن ءتارتىبىن حالىققا جاقىن ءارى تۇسىنىكتى ەتىپ جەتكىزۋگە بارىنشا اتسالىسۋعا شاقىرامىن. بۇل – مىندەت قانا ەمەس, سونىمەن قاتار ورتاق مۇمكىندىك.

قايرات سارىباي,

ازياداعى ءوزارا ءىس-قيمىل جانە سەنىم شارالارى جونىندەگى كەڭەستىڭ باس حاتشىسى