ءىس-شاراعا پارلامەنت دەپۋتاتتارى, ورتالىق مەملەكەتتىك ورگانداردىڭ باسشىلارى, سونداي-اق ءتىل ءبىلىمى سالاسىنداعى جەتەكشى عالىمدار مەن ساراپشىلار قاتىستى.
وتىرىس بارىسىندا 2023–2029 جىلدارعا ارنالعان ءتىل ساياساتى تۇجىرىمداماسىن ىسكە اسىرۋدىڭ نەگىزگى باعىتتارى تالقىلاندى. اسىرەسە, مەملەكەتتىك ءتىلدىڭ ۇلت بىرەگەيلىگىنىڭ ىرگەتاسى جانە دامۋدىڭ ستراتەگيالىق رەسۋرسى رەتىندەگى ءرولىن نىعايتۋ ماسەلەلەرىنە ەرەكشە نازار اۋدارىلدى.
عىلىم جانە جوعارى ءبىلىم ءمينيسترى ساياسات نۇربەك ءتىل ساياساتىنىڭ تۇجىرىمدامالىق مىندەتتەرىن ىسكە اسىرۋ بارىسى تۋرالى باياندادى. اتاپ ايتقاندا, قازاق ءتىلىن عىلىم ءتىلى رەتىندە دامىتۋ, ءبىلىم بەرۋ ادىستەمەلەرىن جەتىلدىرۋ جانە مەملەكەتتىك تىلدەگى ساپالى كونتەنتتىڭ سانىن ارتتىرۋ ماسەلەلەرى قوزعالدى.
تسيفرلىق باستامالاردى ەنگىزۋ جۇمىستارىنا: قازاق تىلىندەگى KazLLM جاساندى ينتەللەكتتى ازىرلەۋ, ەرەكشە قاجەتتىلىكتەرى بار ادامدارعا ارنالعان ەكران ديكتورىن جاساۋ, سونداي-اق «قازاق ءتىلىنىڭ ۇلتتىق سوزدىك قورى» مەملەكەتتىك اقپاراتتىق جۇيەسىن ىسكە قوسۋعا باسا نازار اۋدارىلدى.
وتىرىس قورىتىندىسىندا كوميسسيانىڭ 2025 جىلعا ارنالعان جۇمىس جوسپارى بەكىتىلدى. ەرمەك كوشەرباەۆ الداعى جۇمىستىڭ باسىم باعىتتارىن اتاپ ءوتىپ, تىلدىك ورتانى جۇيەلى جاڭعىرتۋعا, تسيفرلىق ءداۋىردىڭ سىن-قاتەرلەرىن ەسكەرە وتىرىپ, نورماتيۆتىك-قۇقىقتىق بازانى بەيىمدەۋگە كۇش سالۋدى تاپسىردى.
قابىلدانعان شارالاردى ىسكە اسىرۋ ۇلتتىڭ تىلدىك كاپيتالىن نىعايتۋعا جانە قازاق ءتىلىنىڭ جاڭا تەحنولوگيالىق جاعدايدا ورنىقتى دامۋىن قامتاماسىز ەتۋگە مۇمكىندىك بەرەدى.
