كورمەنىڭ اشىلۋ سالتاناتىنا Torri ART جانە «مەرەي» شىعارماشىلىق ستۋدياسى مەن «ۆۋندەركيند» بالالاردى دامىتۋ ورتالىعىنىڭ تاربيەلەنۋشىلەرى, تاراز قالاسىنداعى فيزيكا-ماتەماتيكالىق باعىتتاعى نازارباەۆ زياتكەرلىك مەكتەبى, سونداي-اق تەحنيكالىق شىعارماشىلىق, مەكتەپ وليمپيادالارىن جانە مەكتەپتەن تىس ءىس-شارالاردى وتكىزەتىن وبلىستىق ورتالىقتاردىڭ وقۋشىلارى مەن قالا تۇرعىندارى قاتىستى. بۇدان بولەك, الەكساندر پۋشكين اتىنداعى №40 جانە №41 گيمنازيالار, №42 جانە №66 تاراز مەكتەپتەرى, امانگەلدى اۋىلىنىڭ ورتا مەكتەپتەرىنىڭ وقۋشىلارى دا كورمەنىڭ وتۋىنە اتسالىستى.
ءىس-شارانى وبلىستىق اقپارات جانە قوعامدىق دامۋ باسقارماسىنىڭ «قوعامدىق كەلىسىم» كمم باسشىسى مۇباراك جيناقباەۆا قۇتتىقتاۋ سوزىمەن اشىپ, كورمە جۇمىسىنا ساتتىلىك تىلەدى.
بالالار مەن جاسوسپىرىمدەردىڭ شىعارماشىلىق قىزمەتىن قولداۋ جانە ناسيحاتتاۋ, ولاردىڭ ەڭبەگىن كورسەتۋ ارقىلى شىعارماشىلىق جانە تۇلعالىق دامۋىنا ىقپال ەتۋ ماقساتىندا ۇيىمداستىرىلعان ءىس-شارادا كەراميست-سۋرەتشى, وبلىستىق قولونەرشىلەر وداعىنىڭ مۇشەسى, تاراز قالاسىنداعى «ارت تاراز» سۋرەتشىلەر وداعىنىڭ مۇشەسى ينديرا گۋباشەۆا مەن №40 گيمنازيانىڭ كوركەم ەڭبەك ءپانى مۇعالىمى تاتيانا ۆوتينتسەۆا كورمەنىڭ اشىلۋىنا ىزگى تىلەكتەرىن ءبىلدىرىپ, مۇنداعى تۋىندىلاردىڭ ماڭىزدىلىعىنا توقتالدى.
كورمەگە 5-16 جاس ارالىعىنداعى وبلىسىمىزدىڭ 130-دان اسا جاس سۋرەتشى مەن قولونەرشىنىڭ 200-گە جۋىق شىعارماشىلىق تۋىندىلارى قويىلدى. ولاردىڭ اراسىندا مۇمكىندىگى شەكتەۋلى بالالاردىڭ دا ەڭبەكتەرى بار.
ءىس-شارا بارىسىندا مۇباراك جيناقباەۆا قاتىسۋشىلاردىڭ ەڭبەكتەرىن جوعارى باعالاپ, جاس تالانتتارعا العىس حاتتار تابىستادى. سالتاناتتى جيىن كورمە زالىنىڭ مەڭگەرۋشىسى جازيرا شىلدەباەۆانىڭ قوناقتاردى كورمە جۇمىستارىمەن تانىستىرۋىمەن اياقتالدى.
تاراز
