ۇلتتىق كومپانيانىڭ ءباسپاسوز قىزمەتى حابارلاعانداي, بۇل قۇرالدار اناليتيكانى دايىنداۋ ۋاقىتىن ايتارلىقتاي قىسقارتۋعا, سونداي-اق ادام فاكتورىنىڭ اسەرىن بارىنشا ازايتۋعا مۇمكىندىك بەرەدى. زاماناۋي قۇرالدار كومپانيا قىزمەتكەرلەرىنىڭ جۇمىسىن جەڭىلدەتۋمەن قاتار, كەز كەلگەن اقپاراتتى جىلدام الىپ وتىرۋىنا مۇمكىندىك تۋدىرادى.
«سىرتقى اۋديتوريامەن ءوزارا ارەكەتتەسۋ ءۇشىن ورتالىقتىڭ Telegram ارناسىمەن بىرىكتىرىلگەن Telegram بوتى قۇرىلدى. بۇل شەشىم جەدەل بايلانىس پەن اقپاراتتى تاراتۋدىڭ ىڭعايلى ارناسىنا اينالدى. سونىمەن قاتار, جەدەل ارەكەت ەتۋدى قامتاماسىز ەتەتىن جانە دەرەكتەردىڭ جوعالۋىن بولدىرمايتىن تسيفرلىق پروتسەستەردىڭ جۇمىسىندا اقاۋلار تۋىنداعان جاعدايدا جاۋاپتى قىزمەتكەرلەردى دەرەۋ حاباردار ەتەتىن اۆتوماتتى حابارلاندىرۋ جۇيەسى ەنگىزىلدى», دەپ حابارلادى كومپانيا.
وسىناۋ باستامالاردىڭ ماقساتى – اقپاراتتى وڭدەۋ مەن تالداۋدى جەدەلدەتۋ, سونىمەن قاتار ۋاقىت پەن وپەراتسيالىق شىعىنداردى قىسقارتۋ مەن جالپى جۇيەنىڭ اشىقتىعى مەن باسقارىلۋىن ارتتىرۋ. ءسويتىپ جۇمىس پروتسەسى ءتيىمدى ۇيلەستىرىلەدى.
انىعىندا بيزنەستى ترانسفورماتسيالاۋ ورتالىعى اۆتوماتتاندىرۋ مەن تسيفرلاندىرۋ ديرەكتسياسىمەن بىرلەسىپ, ينفراقۇرىلىمعا قىزمەت كورسەتۋگە ۇشقىشسىز تەحنولوگيالاردى ەنگىزۋگە باعىتتالعان پيلوتتىق جوبانى دا جۇزەگە اسىرىپ جاتىر. اڭگىمە تەمىرجول ينفراقۇرىلىمىنىڭ نىساندارىن تەكسەرۋ ءۇشىن دروندار مەن ونەركاسىپتىك روبوتتاردى پايدالانۋ تۋرالى بولىپ وتىر. بۇل ءتاسىل جولدار مەن كوپىرلەردىڭ جانە باسقا دا وبەكتىلەردىڭ جاي-كۇيىن جەدەل باقىلاۋعا, جۇمىس ورنىندا پەرسونالدىڭ تۇراقتى بولۋى قاجەتتىلىگىن ازايتۋعا, جەتۋ قيىن نەمەسە ىقتيمال قاۋىپتى ايماقتارعا قولجەتىمدىلىكتى قامتاماسىز ەتۋگە مۇمكىندىك بەرەدى.
بۇل سىندى ساۋالنامانىڭ ناتيجەلەرى ينفراقۇرىلىمدى تەكسەرۋ جانە مونيتورينگى, وندىرىستىك پروتسەستى باقىلاۋ, 3D كارتاسىن جاساۋ جانە اقاۋلاردى ەرتە انىقتاۋ سياقتى سالالاردا وسى تەحنولوگيالاردىڭ الەۋەتىن دالىرەك باعالاۋعا مۇمكىندىك بەرەدى دەپ كۇتىلۋدە. مۇنداي جوبالار كومپانيانىڭ تسيفرلىق ترانسفورماتسياعا باعىتتالعان ستراتەگيالىق كۋرسىندا ماڭىزدى ءرول اتقارادى جانە تەمىرجول سالاسىنىڭ قاۋىپسىزدىگىن, تۇراقتىلىعىن جانە تيىمدىلىگىن ارتتىرۋعا ىقپال ەتەدى.
