وسىعان وراي ەلىمىزدە «ارميا انا كوزىمەن» ايلىعى ءوتىپ جاتىر. سونىڭ اياسىندا ساربازدار انالارىنىڭ باسىن قوسقان قوعامدىق بىرلەستىك وكىلى شاريفا مۋمينوۆا ءبىر توپ ارىپتەستەرىمەن بىرگە شىمكەنت قالاسىندا ورنالاسقان اۋە شابۋىلىنا قارسى قورعانىس اسكەرلەرىنىڭ اسكەري بولىمىندە بولىپ, قاتارداعى جاۋىنگەرلەردىڭ ومىرىمەن تانىستى.
ساپار بارىسىندا شاريفا احمەتجانقىزى بولىمگە شاقىرىلعان ساربازداردىڭ جەكە قۇرامىمەن كەزدەسۋ وتكىزدى. ولارمەن اشىق سۇحبات جۇرگىزىپ, اسكەري قىزمەتشىلەردىڭ مورالدىق-تۇرمىستىق جاعدايىن كوزبەن كوردى.
ء«بىزدىڭ باستى مىندەتىمىز – سىزدەرگە قولداۋ كورسەتۋ, تۋىنداعان ماسەلەلەردى شەشۋگە كومەكتەسۋ جانە اسكەري قىزمەت ۋاقىتىن قاۋىپسىز ەتۋ. ءبىز ءار ساربازدى ءوز بالامىزداي ۋايىمدايمىز. ويتكەنى, ءبارىمىز دە انامىز, ارينە, بالالارىمىزدىڭ اسكەري بورىشىن قالاي, قانداي جاعدايدا اتقارىپ جاتقانى ءبىزدى الاڭداتادى. ءاربىر انا بالاسىنا سابىرلى بولۋ ءۇشىن ءبىز اسكەري بولىمدەرمەن بارىنشا تىعىز قارىم-قاتىناستا بولۋعا تىرىسامىز» دەدى ول.
وسى ءىس-شارادا ساربازداردىڭ اتا-انالارى مەن «انالار جۇرەگى» كوميتەتىنىڭ وكىلى جاۋىنگەرلەردىڭ اسحاناسىن ارالاپ, ازىق-ت ۇلىك ونىمدەرىن ساقتاۋ ءتارتىبى مەن جارامدىلىق مەرزىمىن تەكسەرىپ كوردى. سونىمەن قاتار مەديتسينالىق پۋنكتتەردە بولىپ, قىزمەتكەرلەرمەن اڭگىمەلەسىپ, مەديتسينالىق كومەككە جۇگىنۋ جۋرنالىنداعى جازبالارعا نازار اۋداردى.
ءبولىم باسشىلىعىنىڭ قولداۋىمەن كەلگەن قوناقتار كازارما مەن تەوريالىق جانە پراكتيكالىق ساباقتار وتكىزۋگە ارنالعان كابينەتتەردى دە ارالاپ كوردى. اتا-انالار مەن قوعامدىق ۇيىم وكىلى اسكەري قىزمەتكەرلەردىڭ قىزمەت ەتۋىنە جانە دەمالۋىنا قولايلى جاعداي جاساۋعا ىقپال ەتەتىن ءتارتىپ, تازالىق پەن ۇيىمشىلدىقتىڭ جوعارى دەڭگەيدە ەكەنىن اتاپ ءوتتى.
قوعامدىق بىرلەستىك ۇيىمى وكىلدەرىنىڭ ايتۋىنشا مۇنداي كەزدەسۋلەر جاس اسكەري قىزمەتكەرلەردىڭ ومىرىندە ماڭىزدى ءرول اتقارادى. سەبەبى سول ارقىلى ساربازدار اتا-انالاردىڭ, قوعامنىڭ ولارعا دەگەن قولداۋى مەن قامقورلىق سەزىنەدى. ال بۇل جاۋىنگەرلەردىڭ ىشكى سەنىمىن نىعايتۋعا كومەكتەسەدى.
ساپار قورىتىندىسى بويىنشا شاريفا احمەتجانقىزى مەن اتا-انالار اسكەري قىزمەتكەرلەرگە جاسالىپ جاتقان جاعدايعا ريزا ەكەندىكتەرىن جەتكىزدى. ەڭ باستىسى, اتا-انالار بالالارىنىڭ اسكەري قىزمەت بورىشى تىنىش ءارى قاۋىپسىز ءوتىپ جاتقانىنا كوزدەرىن جەتكىزىپ قايتتى.
شىمكەنت
