«ەلىمىزدىڭ اقپارات سالاسىنداعى زاڭنامالىق باستامالاردى تابىستى ىسكە اسىرۋى ماڭىزدى جەتىستىكتەردىڭ ءبىرى دەپ بىلەمىز. جاڭا تەحنولوگيالاردىڭ قارقىندى دامۋىن نازارعا الا وتىرىپ, زاڭنامانى جاڭا اعىمدار مەن ۇردىستەردىڭ بارلىعى ەسكەرىلەتىندەي ەتىپ جەتىلدىرۋ قاجەتتىلىگى تۋىندادى. وسىلايشا 2023 جىلى مەملەكەت باسشىسى «ونلاين-پلاتفورمالار جانە ونلاين-جارناما تۋرالى» زاڭعا قول قويدى. وندا «ونلاين-پلاتفورما» جانە «جەدەل حابار الماسۋ سەرۆيسى» ۇعىمدارى ايقىندالدى, شەتەلدىك ونلاين-پلاتفورمالاردىڭ باق سالاسىنداعى ۋاكىلەتتى ورگانمەن ىقپالداستىق بويىنشا ءوزىنىڭ زاڭدى وكىلىن تاعايىنداۋ, زاڭدارمەن جانە سوت شەشىمدەرىمەن تىيىم سالىنعان زاڭسىز اقپاراتتى جويۋ شارالارى بەلگىلەندى. سونداي-اق مادەنيەت جانە اقپارات مينيسترلىگىنىڭ شەتەلدىك ونلاين-پلاتفورمالاردىڭ, مەسسەندجەرلەردىڭ زاڭدى وكىلدەرىنىڭ ءتىزىلىمىن جۇرگىزۋ قۇزىرەتى ەنگىزىلدى», دەدى مينيستر.
بۇدان كەيىن ا. بالاەۆا ۋاكىلەتتى ورگاننىڭ مەملەكەتتىك جانە مەملەكەتتىك ەمەس باق-قا گرانتتار بەرۋدى, مەملەكەتتىك تىلدەگى كونتەنت ۇلەسىن كەزەڭ-كەزەڭىمەن ۇلعايتۋدى, قوعامنىڭ ادامگەرشىلىك دامۋىنا زيان كەلتىرۋ جانە جالپىادامزاتتىق, ۇلتتىق, مادەني جانە وتباسىلىق قۇندىلىقتاردى بۇزۋ تۇرعىسىنان بۇقارالىق اقپارات قۇرالدارىنىڭ ونىمدەرىنە مونيتورينگ جۇرگىزۋ جونىندەگى قۇزىرەتىن ەنگىزۋدى كوزدەگەن «ماسس-مەديا تۋرالى» زاڭنىڭ ءساتتى قابىلدانىپ, كۇشىنە ەنگەنىن اتاپ ءوتتى.
ءمينيستردىڭ ايتۋىنشا. ەلىمىز زاڭسىز كونتەنت (كيبەربۋللينگ, الاياقتىق, ەكسترەميزم, پورنوگرافيا) پەن جالعان اقپاراتتى تاراتۋعا قارسى كۇرەستە ايتارلىقتاي جاقسى ناتيجەگە قول جەتكىزگەن.
«ماسەلەن, 2018 جىلى زياندى كونتەنتكە قول جەتكىزۋدى شەكتەۋدىڭ قۇقىقتىق تەتىكتەرىن بەكىتكەن «بالالاردى دەنساۋلىعى مەن دامۋىنا زيان كەلتىرەتىن اقپاراتتان قورعاۋ تۋرالى» زاڭ قابىلداندى جانە جەتىلدىرىلۋدە. سول تەتىكتەر اقپاراتتىق كەڭىستىكتەگى بالالاردىڭ قاۋىپسىزدىگىنىڭ نەگىزدەرىن قامتاماسىز ەتۋدە ماڭىزدى قادام بولدى.قابىلدانعان شارالاردىڭ ارقاسىندا «بالالاردىڭ اقپاراتتىق قاۋىپسىزدىگى», «بالالاردى دەنساۋلىعى مەن دامۋىنا زيان كەلتىرەتىن اقپاراتتان قورعاۋ», «بالالاردىڭ اقپاراتقا قول جەتكىزۋى» سياقتى انىقتامالار پايدا بولدى, بالالار ءۇشىن تىيىم سالىنعان كونتەنتتىڭ تىزبەسى بەكىتىلدى, اقپاراتتىق ونىمدەرگە جاس شەكتەۋلەرى بەلگىلەندى», دەدى مينيستر.
