فورۋمعا قازاقستان, وزبەكستان, قىرعىزستان, ازەربايجان, تاجىكستان, تۇرىكمەنستان, ۇلىبريتانيا, قىتاي, كاتار, رەسەي جانە باسقا دا ەلدەردەن جۋرناليستەر, مەديا كومپانيا باسشىلارى, ساياساتكەرلەر, حالىقارالىق ۇيىمداردىڭ وكىلدەرى مەن بەدەلدى ساراپشىلاردان تۇراتىن 700-دەن استام قاتىسۋشى جينالدى.
فورۋمنىڭ ماقساتى – ورتالىق ازيا مەديا وكىلدەرى مەن حالىقارالىق سەرىكتەستەر اراسىنداعى ىنتىماقتاستىقتى نىعايتۋ, تسيفرلىق ترانسفورماتسيانىڭ وڭىرلىك اقپاراتتىق كەڭىستىككە اسەرىن تالقىلاۋ, سونداي-اق كليماتتىڭ وزگەرۋى مەن گەوساياسي تۇراقسىزدىق سياقتى جاھاندىق سىن-قاتەرلەردى قاراستىرۋ.
فورۋم ورتالىق ازيا ەلدەرىنىڭ اقپارات مينيسترلەرىنىڭ جۇمىس بابى بويىنشا كەزدەسۋىنەن باستالدى. سپيكەرلەر قاتارىندا – مادەنيەت جانە اقپارات ءمينيسترى ايدا بالاەۆا, وزبەكستان, قىرعىزستان, تاجىكستان سالالىق ۆەدومستۆولارىنىڭ وكىلدەرى جانە ءوڭىردىڭ نەگىزگى مەديا قۇرىلىمدارىنىڭ جەتەكشىلەرى بار.
ءىس-شارانىڭ اشىلۋ راسىمىندە ايدا بالاەۆا فورۋمدى اقپاراتتىق ىنتىماقتاستىققا ارنالعان بىرەگەي الاڭ ەكەنىن اتاپ ءوتىپ, ورتالىق ازيا مەملەكەتتەرى باسشىلارىنىڭ باستاماسى ارقاسىندا بىرلەسكەن مەدياجوبالار جاساۋ مەن گۋمانيتارلىق بايلانىستاردى نىعايتۋ جۇمىستارى جاندانا تۇسكەنىن ايتتى.
«بۇگىنگى فورۋم وزەكتى ماسەلەلەردى اشىق تالقىلاپ قانا قويماي, ايماقتاعى بىرلەسكەن اقپاراتتىق جۇمىستىڭ ورتاق تاسىلدەرىن ازىرلەي الاتىن بىرەگەي الاڭعا اينالدى. ورتالىق ازيا كوشباسشىلارى دەڭگەيىندە اقپاراتتىق سالاداعى ىنتىماقتاستىقتى جانداندىرۋ ماسەلەسى بىرنەشە رەت تالقىلانعانى ءمالىم. بىلتىر استانادا وتكەن كونسۋلتاتيۆتىك كەزدەسۋدە پرەزيدەنتىمىز قاسىم-جومارت توقاەۆ بىرلەسكەن مەدياونىمدەر جاساۋ تۋرالى باستاما كوتەردى.
قازاقستان ورتالىق ازيانىڭ ورتاق تەلەارناسىن قۇرۋ جانە ايماقتىڭ الەۋەتى, وسى اۋماقتا تۇراتىن حالىقتاردىڭ دوستىعى مەن بىرلىگى تۋرالى حاباردار ەتەتىن تەلەجوبالاردى, سونداي-اق ءبىزدىڭ حالىقتارىمىزدىڭ تاريحى مەن ەرەكشەلىگى تۋرالى تانىمدىق تەلە-راديو باعدارلامالار توپتاماسىن دايىنداۋ يدەياسىن قولدادى.
وسىلايشا, قازىرگى ۋاقىتتا ورتالىق ازيا ەلدەرى وڭىردەگى اقپاراتتىق ىنتىماقتاستىقتى نىعايتۋعا باعىتتالعان بىرلەسكەن تەلەارنا مەن وڭىرلىك مەدياپلاتفورمانى ىسكە قوسۋ مۇمكىندىگىن قاراستىرىپ جاتىر», دەدى مينيستر.
سونىمەن قاتار ايدا بالاەۆا ورتالىق ازياداعى گۋمانيتارلىق ىنتىماقتاستىقتىڭ جاڭا دەڭگەيگە كوتەرىلگەنىن اتاپ ءوتتى. بىرلەسكەن مەدياجوبالار جۇزەگە اسىرىلىپ جاتىر. اتاپ ايتساق, استانادا «Euronews»-ءتىڭ ورتالىق ازيا بويىنشا وكىلدىگى اشىلدى, مادەنيەت كۇندەرى وتكىزىلىپ, ارنالار ترانسلياتسياسى كەڭەيىپ جاتىر, كرەاتيۆتى يندۋستريا دامىپ كەلەدى جانە جالعان اقپاراتپەن كۇرەس جۇمىستارى كۇشەيتىلىپ جاتىر.
سونداي-اق اقپاراتتىق ىنتىماقتاستىقتى ودان ءارى نىعايتۋ جانە مەديا سالاسىنداعى ءوزارا بايلانىستى دامىتۋ ماقساتىندا بىرقاتار جوبالار تالقىلانىپ, جوسپارلاندى. ولاردىڭ قاتارىندا – ورتالىق ازيا جۋرناليستيكا اكادەمياسىن قۇرۋ, كرەاتيۆتى يندۋستريانى دامىتۋ, وڭىرلىك جۋرناليستيكا سىيلىعىن تاعايىنداۋ, جاڭا تەلەجوبالاردى ىسكە اسىرۋ جانە ءوڭىر ەلدەرىنىڭ كونتەنتىن حالىقارالىق مەدياپلاتفورمالاردا كەڭىنەن تانىتۋ ماسەلەلەرى بار.
فورۋمنىڭ تۇستەن كەيىنگى بولىمىندە بولاشاق اقپاراتتىق كەڭىستىكتى قالىپتاستىرۋ, جاساندى ينتەللەكت پەن كوپ دەرەكتەر داۋىرىندەگى مەديا سالاسىنىڭ تسيفرلىق ترانسفورماتسياسى, ەلدىڭ ءيميدجىن قالىپتاستىرۋداعى الەۋمەتتىك جەلىلەردىڭ ءرولى جانە باسقا دا ماسەلەلەر قاراستىرىلادى.
فورۋم 17 ءساۋىر كۇنى دە جالعاسادى. ەكىنشى كۇنى رەسپۋبليكالىق جانە ورتالىق ازيا مەديا وكىلدەرى مەن جوعارى وقۋ ورىندارى ستۋدەنتتەرىنە ارنالعان شەبەرلىك ساباقتارى وتەدى. سپيكەرلەر قاتارىندا – ۇلىبريتانيا, اقش جانە رەسەيدەن كەلگەن تانىمال ساراپشىلار بار.
