ءىس-شارانى قازاقستاننىڭ «دوستار» قاۋىمداستىعى, شۆەتسياداعى قازاق مادەني ورتالىعى جانە قازاقستاننىڭ شۆەتسيا كورولدىگىندەگى ەلشىلىگى بىرلەسىپ ۇيىمداستىردى.
«ناۋرىز – شەكارالارمەن شەكتەلمەيتىن, ادامداردى جاڭارۋ, ءۇمىت پەن بىرلىك رۋحىندا بىرىكتىرەتىن مەرەكە. بۇل – كەشىرىم مەن تاتۋلاسۋ كۇنى, قۋانىشپەن ءبولىسىپ, ءبىر-بىرىمىزبەن بايلانىسىمىزدى نىعايتاتىن كۇن», دەپ اتاپ ءوتتى قازاقستاننىڭ شۆەتسيا كورولدىگىندەگى توتەنشە جانە وكىلەتتى ەلشىسى ولجاس سۇلەيمەنوۆ.
قوناقتار ۇلتتىق تاعامداردان ءدام تاتىپ, ناۋرىزكوجە, اشىق وتتا دايىندالعان پالاۋ, شىعىس تاتتىلەرى مەن شايدان اۋىز ءتيدى. دومبىرا مەن قوبىزدان كۇي توگىلىپ, «قاماجاي» مەن «قارا جورعا» ءبيى مەرەكەنىڭ شىرايىن كىرگىزىپ, قوناقتاردىڭ كوڭىلىن سەرپىلتتى.
مەرەكەگە ەرەكشە ءسان بەرگەن ساتتەردىڭ ءبىرى ديماش قۇدايبەرگەننىڭ جانكۇيەرلەر كلۋبىنىڭ ونەرى بولدى. ولار قازاق تىلىندە شۆەد حالىق ءانىن جانە شۆەد تىلىندە ابايدىڭ «جازعىتۇرىم» ولەڭىن وقىپ, كورەرمەننىڭ ىستىق ىقىلاسىنا بولەندى. سونىمەن قاتار توعىزقۇمالاق ويىنى, كوكتەم تاقىرىبىنداعى سۋرەت سالۋ, كاراوكە مەن «تىلەك قابىرعاسىنا» جازىلعان قۇتتىقتاۋلار مەرەكەنىڭ مازمۇنىن ارتتىردى. ۇلتتىق كيىمدەر مەن قازاق مادەنيەتىنىڭ ەلەمەنتتەرى قويىلعان فوتوايماق جارقىن ساتتەردى سۋرەتكە تۇسىرۋگە تاپتىرماس ورىن بولدى.
«دوستار» قاۋىمداستىعىنىڭ توراعاسى سپارتاك زيكرين بۇل وقيعانىڭ ماڭىزىن ەرەكشە اتاپ ءوتتى.
ء«بىز ءۇشىن ناۋرىز – جاي عانا كوكتەم مەرەكەسى ەمەس, بۇل ۇلتتىق داستۇرلەرىمىزدى ساقتاپ, كەلەسى ۇرپاققا جەتكىزۋگە, مادەني ديالوگ الماسۋعا مۇمكىندىك بەرۋدىڭ جولى. قالىڭ كوپشىلىكتىڭ قاتىسقانى ءبىزدى قۋانتادى. وسىندا جينالعان ءبارىمىزدى قازاقستان مادەنيەتىنە دەگەن قۇرمەت پەن قىزىعۋشىلىق بىرىكتىرەدى», دەدى ول.
