ەرتەرەك جەتتىك. ىنىشەك تە ونە بويى اسىعىپ جۇرەتىن, جىلدام قيمىلدايتىن ادام. قوناق كۇتۋگە قاجەتتى ىدىس-اياعى مەن كورپە-جاستىعىنان باسقاسىنىڭ ءبارىن بۋىپ-ءتۇيىپ, جۇك ماشيناسىنا ارتىپ قويىپتى. كارتوپ ەگەتىن شارباقتىڭ جانىندا اجەتكە جارامايتىن دۇنيەلەر. قازىر مۇنداي زاتتارعا اۋىلدىڭ ادامدارى دا قىزىقپايدى. ورتاسى ويىلىپ, قوس جاقتاۋى قاۋسىرىلعان كونە ديۆاننىڭ ۇستىندە ساندىق جاتىر ەكەن. كوزىمە وتتاي باسىلدى. جيەكتەرى ويۋلانعان, قاقپاعىنا ادەمى ورنەك سالىنعان اجەمنىڭ كوزى. اجەم بار كەزدە قاقپاعى ۇنەمى جابىق بولاتىن. كىلتى قامزولىنىڭ قالتاسىنان تابىلاتىن. ىشىندە نە جوق دەيسىڭ. ول كۇندە قاسقالداقتىڭ قانىنداي قات كەڭىردەك ماتەريال, ءپ ۇلىش, اشەكەيلەر, قۇجاتتار, كامپيت, الدەبىر سالىقتاردىڭ تولەم تۇبىرتەكتەرى... كىپ-كىشكەنتاي ساندىققا وسىنشا زاتتىڭ قالاي سياتىنىن ويلاسام بۇگىنگى كۇنى تاڭ قالاتىنىم بار. زاتپەن بىرگە بەرەكەگە تولىپ تۇرعانداي.
ءدال قاي جىلى ەكەنى ەسىمدە جوق, الماتىدا تۇراتىن ناعاشىلارىمىزدان سالەم-ساۋقات جەتكەن. پوشتا ارقىلى. ءداۋ جاشىك. ءىشى تولى ورىك-مەيىز, بالانىڭ باسىنداي اپورت الماسى. پوشتا تاسيتىن اتاي قاس قارايا جەتكىزگەن. المانىڭ ءيسى مۇرىن جارىپ بارادى. جەگىمىز كەلگەن.
– تاڭ اتسىن, – دەگەن اجەي, – نە بولدى سونشا؟
تۇنىمەن كوز ىلىكتىرە السامشى. ءيسى جۇپار اڭقىعان, قىپ-قىزىل, ءداۋ المانى قىرشىپ تىستەپ, اساپ-اساپ جىبەرگىڭ كەلەدى. وعان بولىپ تۇر ما؟ ساندىقتىڭ كىلتى اجەمنىڭ قامزولىنىڭ قالتاسىندا, قامزول اجەمنىڭ باسىندا. قۇس ۇيقىلى كىسىنىڭ قالتاسىنان قالاي الارسىڭ؟ قاراڭعىدا قارمانىپ ءجۇرىپ ءداۋ شەگە تاۋىپ الدىم. سيپالاپ ءجۇرىپ ساندىقتىڭ قۇلپىن اشپاقشىمىن. مۇنداي بەرىك بولار ما؟.. اشا المادىم. تاڭەرتەڭ اجەم كورشى-قولاڭنىڭ بار بالاسىن جينادى. تۇنىمەن مەن كۇزەتىپ شىققان ورىك-مەيىز, نارتتاي قىزىل الما پىشاق ۇستىندە بولىسكە ءتۇستى. ماعان تيگەنى ءبىر المانىڭ تورتتەن ءبىر بولىگى. شاي ۇستىندە اجەمە وكپەمدى ايتتىم. اشۋلانار دەپ ەدىم, قاباعىن تۇيگەن جوق, قايتا كۇلدى.
– كوپپەن ءبولىپ جەگەن ءتاتتى بولادى, – دەدى دە قويدى.
جۇپ-جۇمساق الاقانىمەن كەكىلىمنەن سيپادى.
– وسكەن سوڭ ۇعاسىڭ, – دەدى اجەم. كوپشىل بولۋدىڭ, قولىڭداعى بارمەن ءبولىسۋدىڭ, بەرەكەنىڭ نە ەكەنىن كەيىن ۇقتىق قوي.
ءىنىمنىڭ قوناقاسىسى اياقتالدى. باۋىر باسىپ قالعان كورشى-قولاڭ قيماي قوشتاسىپ, قايدا جۇرسەڭ دە جولىڭ بولسىن دەگەن اق تىلەكتەرىن ءبىلدىرىپ جاتىر. ءبىزدىڭ ءۇيدىڭ جەتى بالاسىنا ىستىق ۇيا بولعان شاڭىراقتان تاڭ بوزارا شىقتىق. قيماستىق سەزىم بار. جانارىمىزعا جاس ۇيىرىلگەن. ءبىر قاراسام كونەتوز ديۆاننىڭ ۇستىندە اجەمنىڭ ساندىعى جاتىر ەكەن. جۇك سالعىشقا سالىپ الدىم. بۇرىنعىنىڭ جول-جورالعىسى, ادەت-عۇرپى وسى ساندىقتىڭ ىشىندە ەدى. قالاداعى اۋلەتتىڭ كادەسىنە جاراسىنشى.
