فوتو: ماڭعىستاۋ وبلىسى اكىمىنىڭ ءباسپاسوز قىزمەتى
كەمە زاماناۋي وزىق قۇرالدارمەن جابدىقتالعان. قۇرعاق جانە بارلىق دەرلىك جۇك تۇرلەرىن تاسىمالداۋعا ارنالعان. ونىڭ جۇك كوتەرگىشتىگى – 7 000 توننا, ۇزىندىعى – 136 مەتر, بيىكتىگى – 7 مەتر. جاڭا سۋ كولىگىنىڭ تۇساۋكەسەر راسىمىندە وتاندىق «Semurg Invest» پەن «Freeseas Container Shipping» كومپانيالارى كاسپي تەڭىزىندە جاڭا كەمەلەرگە ينۆەستيتسيا تارتۋ تۋرالى مەموراندۋمعا قول قويدى. وندا كەمە سانىن 6 بىرلىككە دەيىن ارتتىرۋ جوسپارلانعان.
اقتاۋ تەڭىز ساۋدا پورتى دا جاعىمدى جاڭالىقتان قۇر الاقان ەمەس. بۇل پورتتا دا تاريحي وقيعا ورىن الدى. پورتقا ازيا ينفراقۇرىلىمدىق ينۆەستيتسيالار بانكى جانە كولىك پەن ەنەرگەتيكا سالاسىنداعى كونسۋلتاتسيالىق قىزمەتتەرگە ماماندانعان CPCS Transcom Limited ينفراقۇرىلىم جونىندەگى كانادالىق كونسالتينگتىك كومپانيانىڭ وكىلدەرى كەلدى.
CPCS Transcom Ltd بۇدان ءارى ينۆەستيتسيالاۋ ءۇشىن ورتالىق ازياداعى ترانسشەكارالىق قوسىلۋ جوبالارىن انىقتاۋ مەن ولاردىڭ قارجىلىق تارتىمدىلىعىن ەگجەي-تەگجەيلى باعالاۋعا قازاقستاندى قوسا العاندا, ىسكە اسىرۋ تۋرالى ماسەلەنى قاراۋ ماقساتىندا زەرتتەۋلەر جۇرگىزەدى. باسىم جوبا قاتارىندا كاسپي تەڭىزى دەڭگەيىنىڭ تومەندەۋ سالدارىن جەڭىلدەتۋگە قازاقستان پورتتارىندا جوسپارلانعان ءتۇبىن تەرەڭدەتۋ جۇمىستارى بار.
وعان قوسا ليتۆاداعى كلايپەدا پورتىنىڭ دەلەگاتسياسى دا اقتاۋ پورتىندا بولىپ, قىزمەتىمەن تانىستى. كلايپەدا بالتىق جاعالاۋىنداعى ەڭ ۇلكەن تەرەڭ تەڭىز پورتى جانە جىلىنا 70 ميلليون توننا جيناقتالعان 33 پورت تەرمينالىن قامتيتىن تەڭىز ايلاعى.
مۇنىمەن بىرگە نيدەرلانديا ديپلوماتيالىق كورپۋسى مەن نەگىزگى كومپانيالارىنىڭ باسشىلارى دا ىسساپارمەن اقتاۋ پورتىنا كەلىپ, تمتم مۇمكىندىكتەرىمەن تانىستى. كەزدەسۋدە تمتم ءدالىزىنىڭ دامۋ باعىتتارى, كاسپي ارقىلى ەۋروپا مەن ازيا اراسىنداعى تاۋار اينالىمىنىڭ ءوسۋ پەرسپەكتيۆالارى اڭگىمە ارقاۋىنا اينالىپ, الداعى بولجامدار ءسوز بولدى.
