ۇكىمەت وتىرىسىنىڭ قورىتىندىسى بويىنشا وتكەن ءباسپاسوز ءماسليحاتىندا ەرلان نىسانباەۆ تابيعاتتاعى ورتتەردىڭ نەگىزگى سەبەبىنىڭ ءبىرى ادامي فاكتور بولىپ سانالاتىنىن اتاپ ءوتتى.
«قۇرمەتتى جۋرناليستەر جانە ەلىمىزدىڭ تۇرعىندارى! مەن بۇگىنگى بريفينگتى پايدالانىپ, سىزدەرگە ءورت قاۋپى جوعارى كەزەڭ تۋرالى ءوتىنىش ايتقىم كەلەدى. ايتايىن دەگەنىم, وتكەن جىل وتە ىلعالدى بولدى, دالادا جانە ورمانداردا بىلتىردان قالعان وتە بيىك شوپتەر بار, بۇل بيىل ورتكە قاتىستى ماسەلەلەردى تۋدىرۋى مۇمكىن. بۇل جەردە سىزدەردىڭ كومەكتەرىڭىز اۋاداي قاجەت, سوندىقتان مەن وزدەرىڭىزگە جۇگىنىپ, ورتكە, اسىرەسە دالادا وت جاققاندا اسا قىراعى بولۋلارىڭىزدى سۇرايمىن. ەگەر ءسىز ءورتتى كورسەڭىز, جاقىن ماڭداعى ارنايى مەكەمەلەرگە حابارلاسىڭىز نەمەسە تجم ارنايى تەلەفون نومىرىنە قوڭىراۋ شالىڭىز», دەپ اتاپ ءوتتى ەرلان نىسانباەۆ.
سونىمەن قاتار مينيستر ازاماتتاردى ورمان القاپتارىندا دا ساق بولۋعا شاقىردى.
«سىزدەر ورماندا, تابيعاتتا بولاسىزدار. سىزدەردەن وت جاققان كەزدە وتە مۇقيات بولۋلارىڭىزدى سۇرايمىن, ويتكەنى ءورتتىڭ كوبى ادام فاكتورىنا بايلانىستى تۋىندايدى», دەدى ەرلان نىسانباەۆ.
