فوتو: قازاقپارات
ۇشاق اپاتى كەزىندە قازا تاپقاندارعا ارنالعان مەموريالدىق تاقتا «حىنالىگ جانە كوشپەندىلەر جولى» مەملەكەتتىك تاريحي-مادەني جانە ەتنوگرافيالىق قورىعىنىڭ اۋماعىندا ورناتىلعان. ازەربايجاننىڭ oxu.az اقپاراتتىق پورتالىنىڭ مالىمەتىنشە مەموريالدىق تاقتادا ەكيپاج مۇشەلەرىنىڭ ەسىمدەرى جازىلعان. يگور كشنياكين, الەكساندر كاليانينوۆ, حوكۋما اليەۆانىڭ ەسىمدەرىمەن بىرگە قايتىس بولعانداردى ەسكە الۋ جازباسى دا بەدەرلەنگەن. ەسكەرتكىشتى ورناتۋعا ازەربايجان الپينيستەرى ۇلەس قوسقان.
سونىمەن قاتار, اپاتتىڭ سوڭعى كەزىنە دەيىن جولاۋشىلارعا نۇسقاۋ بەرىپ, سابىرعا شاقىرعان بورتسەرىك حوكۋما اليەۆانىڭ ءبيۋستى قويىلادى. اكەسى دجاليل اليەۆتىڭ ايتۋىنشا حالىق باتىرى اتاعىنا يە بولعان قىزىنىڭ ءبيۋستى باكۋدەگى قۇرمەت اللەياسىندا ورناتىلادى.
Media.az اقپاراتتىڭ سايتىنىڭ مالىمەتىنشە 33 جاستاعى حوكۋما اليەۆا ازەربايجاننىڭ باتىسىندا, كالباجار وبلىسىنداعى سۋسۋزلۋگ اۋىلىندا دۇنيەگە كەلگەن. گياندجا قالاسىندا تۇرعان. 1996 جىلى ول وتباسىمەن رەسەيگە كوشىپ, ۆولگوگراد وبلىسىنداعى مەكتەپتە وقىعان. ودان كەيىن وتباسى ازەربايجانعا قايتا ورالعان. مۇندا ورتا مەكتەپتى ءبىتىرىپ, باكۋ مەملەكەتتىك ۋنيۆەرسيتەتىندە ءبىلىم العان. حوكۋما اليەۆانىڭ اكەسى ايتقان مالىمەتكە سۇيەنسەك ول AZAL كومپانياسىندا بورتسەرىك بولىپ 2016 جىلدان باستاپ جۇمىس ىستەگەن. Embraer E190AR ۇشاعىنىڭ باكۋ-گروزنىي باعىتىنداعى رەيسىندە بورتسەرىك رەتىندەگى قىزمەتىن اياقتاپ, كومپانيا زاڭگەرى قىزمەتىنە اۋىسۋعا قامدانىپ جۇرگەن حوكۋما اليەۆانىڭ بۇل سوڭعى رەيسى بولىپ قالا بەردى.
Embraer E190AR Azerbaijan Airlines ۇشاعىندا حوكۋما اليەۆامەن بىرگە ۇشقىش يگور كشنياكين, ۇشقىش الەكساندر كاليانينوۆ قازا تاپتى. بەس ەكيپاج مۇشەسىنىڭ ەكەۋى بورتسەرىك زۋلفۋگار اسادوۆ پەن ايدان راحيملي امان قالدى.
ەسكە سالايىق, بورتتا بارلىعى 67 ادام بولعان, ونىڭ 38-ءى قازا تاپتى. قايتىس بولعانداردىڭ ىشىندە التى ادام قازاقستان ازاماتى.
