قول كۇرەسىنەن اۋقىمدى ءىس-شارا شاردارا اۋدانىنىڭ قۇرىلعانىنا 60 جىل تولۋىنا وراي ۇيىمداستىرىلدى. شارانىڭ سالتاناتتى اشىلۋىندا «شاردارا ارمسپورت» كلۋبىنىڭ نەگىزىن قالاۋشى, شاردارا اۋدانىنىڭ اكىمى ارمان قارسىباەۆ ءسوز سويلەپ, جينالعان كوپشىلىكتى اۋداننىڭ مەرەيتويىمەن قۇتتىقتادى. سونداي-اق قول كۇرەسى ارقىلى قازاق ەلىن, ونىڭ ىشىندە اۋداندى دۇنيەجۇزى تانىعانىن اتاپ ءوتتى.
«ونىڭ ءبىر دالەلى شاعىن عانا اۋدانىمىزدان 120-دان استام الەم چەمپيونى شىقتى. سونىمەن قاتار, بۇگىن ءبىر عانا شاردارا اۋدانىنىڭ قول كۇرەسشىلەرى وزبەكستان رەسپۋبليكاسىنىڭ قۇراماسىنا قارسى جەكپە-جەك وتكىزىپ وتىر», دەدى ارمان رومان ۇلى.
اشىلۋ سالتاناتىنان سوڭ 9 سالماق دارەجەسىندە 9 جۇپ كۇش سىناستى. تارتىستى وتكەن باسەكەدە «شاردارا ارمسپورت» كلۋبى تاعى دا وزدەرىنىڭ مىقتىلىقتارىن دالەلدەپ, وزبەكستان قۇراماسىن 9:0 ەسەبىمەن تىزە بۇكتىردى. جەڭىمپازدارعا ارنايى ماراپاتتار تابىس ەتىلدى.
