قىزىلوردا. 5 مامىر. گرۋزيانىڭ تبيليسي قالاسىندا كاراتە-دو شوتوكاننان وتكەن الەم چەمپيوناتىندا قىزىلوردالىق ءمولدىر جاڭبىرباي جەڭىسكە جەتتى. بۇل تۋرالى وبلىستىق دەنەشىنىقتىرۋ جانە سپورت باسقارماسىنىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى.
الەمنىڭ 25 ەلىنەن 1260 سپورتشى قاتىسقان بۇل ءدۇبىرلى دودادا ءمولدىر 16-17 جاس ارالىعىندا 48 كەلىگە دەيىنگى سالماقتا سىنعا ءتۇسىپ, الەم چەمپيونى اتاندى. ول جارىس بارىسىندا ءۇش كەزدەسۋ وتكىزىپ, فينالدا گرۋزيا ەلىنىڭ سپورتشىسىن 7:0 ەسەبىمەن جەڭدى. سونداي-اق, كوماندالىق كۋميتەدە جەرلەسىمىز ءبىرىنشى ورىندى يەلەندى. كوماندا قۇرامىندا مولدىردەن باسقا ماڭعىستاۋلىقتار دينارا تورتكۇلباەۆا, رىسكۇل جيەنباەۆا جانە جامبىلدىق ايگەرىم تۇرسىنبەكوۆالار باق سىنادى.
وبلىستىق جوعارى سپورت شەبەرلىگى مەكتەبىندە رۇستەم ابجاميەۆتەن ءتالىم الاتىن ءمولدىر بيىلعى جىلدىڭ 20-22 مامىر ارالىعىندا قاراعاندى قالاسىندا وتەتىن قر IV سپارتاكياداسىنا قاتىسادى.
ەرجان بايتىلەس.
دەرەك, سۋرەت: egemen.kz.
