سۇحبات كەزىندە تاراپتار سەنات پەن كونسۋلتاتيۆتىك كەڭەس اراسىنداعى ىنتىماقتاستىقتى جانە رۋحاني ديپلوماتيانى نىعايتۋ ماسەلەلەرىن تالقىلادى. سونداي-اق الداعى كەزەڭگە ارنالعان بىرلەسكەن جۇمىستىڭ ماڭىزدى مىندەتتەرىنە نازار اۋداردى.
ماۋلەن اشىمباەۆ كونسۋلتاتيۆتىك كەڭەستىڭ توراعاسىمەن كەزدەسۋدە ساۋد ارابياسى قازاقستاننىڭ ماڭىزدى ستراتەگيالىق سەرىكتەستەرىنىڭ ءبىرى ەكەنىن اتاپ ءوتتى. ديپلوماتيالىق قاتىناستار ورناعان 30 جىل ىشىندە ەكى مەملەكەت اراسىنداعى ىنتىماقتاستىق نىعايىپ, ءوزارا مازمۇندى ءارى اشىق ساياسي ديالوگ قالىپتاستى. بۇعان جوعارى دەڭگەيدەگى ەكىجاقتى بەلسەندى بايلانىستىڭ ناتيجەسىندە قول جەتكىزىلگەنى انىق.
«قازىرگى تاڭدا ەكى ەل اراسىنداعى ىنتىماقتاستىق بارلىق سالادا قارقىندى دامىپ كەلەدى. بۇل رەتتە قازاقستان پرەزيدەنتى قاسىم-جومارت توقاەۆ پەن قوس كيەنىڭ ساقشىسى – كورول سالمان بەن ابدەلازيز ءال-ساۋد جانە تاق مۇراگەرى, پرەمەر-مينيستر مۇحاممەد بەن سالمان بەن ابدەلازيز ءال-ساۋد اراسىنداعى ءوزارا قۇرمەت پەن دوستىققا, ورتاق قۇندىلىقتار مەن ۇستانىمدارعا نەگىزدەلگەن قارىم-قاتىناس شەشۋشى ءرول اتقارادى. وسى رەتتە سىزگە قازاقستان-ساۋديا قارىم-قاتىناسىن نىعايتۋعا, سونداي-اق الەمدىك جانە ءداستۇرلى دىندەر كوشباسشىلارى سەزىنىڭ يدەيالارىن دارىپتەۋگە قوسقان ۇلەسىڭىز ءۇشىن زور ريزاشىلىعىمىزدى بىلدىرەمىز», دەدى م.اشىمباەۆ.
سونىمەن قاتار سەنات سپيكەرى سەنات پەن كەڭەس اراسىنداعى بايلانىستاردى ودان ءارى نىعايتۋدىڭ ماڭىزدى ەكەنىن تىلگە تيەك ەتتى. كەزدەسۋدە زاڭنامالىق قىزمەتتە تاجىريبە الماسۋ, دوستىق توپتارىنا مۇشە دەپۋتاتتاردىڭ ءوزارا ساپارلارىن ۇيىمداستىرۋ جانە پارلامەنت سەناتى مەن كونسۋلتاتيۆتىك كەڭەستىڭ سالالىق كوميتەتتەرى اراسىندا تىعىز بايلانىس ورناتۋ باعىتىنداعى بىرلەسكەن جۇمىس ماسەلەلەرى دە تالقىلاندى.
«قازاقستان مەن ساۋد ارابياسى اراسىنداعى ىنتىماقتاستىقتى دامىتۋ جولىندا سەنات پەن كونسۋلتاتيۆتىك كەڭەستىڭ ءوزارا ديالوگى ماڭىزدى ءرول اتقارادى. وسى ورايدا ساۋد ارابياسىنىڭ كونسۋلتاتيۆتىك كەڭەسىمەن ءىس-قيمىلدى ودان ءارى ارتتىرۋعا مۇددەلى ەكەنىمىزدى اتاپ وتكىم كەلەدى. ءبىزدى كورولدىكتە ىسكە اسىرىلىپ جاتقان باستامالاردى زاڭنامالىق تۇرعىدان قامتاماسىز ەتۋ سالاسىنداعى تاجىريبە قىزىقتىرادى. وسى ورايدا سەنات پەن كونسۋلتاتيۆتىك كەڭەستە قۇرىلعان دوستىق توپتارى ايرىقشا ءرول اتقاراتىنىن اتاپ وتكەن ءجون. ولاردىڭ الەۋەتىن ءوزارا ديالوگتى نىعايتۋدىڭ ءتيىمدى تەتىگى رەتىندە بارىنشا قولدانعان ابزال. سونداي-اق سالالىق كوميتەتتەر اراسىنداعى بايلانىستاردى دا جانداندىرۋدىڭ ماڭىزى زور», دەدى سەنات توراعاسى.
سۇحبات بارىسىندا ماۋلەن اشىمباەۆ كورولدىكتىڭ ازىق-ت ۇلىك قاۋىپسىزدىگىنە قاتىستى قازىرگى سىن-قاتەرلەردى ەڭسەرۋگە جانە ورنىقتى دامۋدى ىلگەرىلەتۋگە ارنالعان باستامالارىن, سونداي-اق ازىق-ت ۇلىك قاۋىپسىزدىگى جونىندەگى يسلام ۇيىمى مەن يسلام ىنتىماقتاستىعى ۇيىمى اياسىنداعى ىرگەلى ىستەرىن جوعارى باعالادى.
سەنات سپيكەرى ءوز سوزىندە ەل پرەزيدەنتى قاسىم-جومارت توقاەۆتىڭ باستاماسىمەن جۇرگىزىلىپ جاتقان ساياسي جانە الەۋمەتتىك-ەكونوميكالىق سالالارداعى كەشەندى وزگەرىستەرگە دە جان-جاقتى توقتالدى. بۇل رەتتە ەكونوميكانى ءارتاراپتاندىرۋ, تسيفرلاندىرۋ, وڭدەۋ ونەركاسىبىن دامىتۋ جانە ينفراقۇرىلىمدى جاڭعىرتۋ باعىتىنداعى تىڭ شارالار جونىندە ءسوز بولدى.
ءوز كەزەگىندە ابداللا بەن مۇحاممەد بەن يبراحيم ءال-اش-شەيح ساۋد ارابياسى كونسۋلتاتيۆتىك كەڭەسى كوپجاقتى قاتىناستاردى دامىتۋعا مۇددەلى ەكەنىن ايتىپ, قازاقستاندا جۇرگىزىلىپ جاتقان ساياسي جاڭعىرۋلاردىڭ تيىمدىلىگىنە نازار اۋداردى.
كەزدەسۋدە ساۋدا-ەكونوميكالىق جانە ينۆەستيتسيالىق ىنتىماقتاستىق ماسەلەلەرى, ونىڭ ىشىندە ەكى تاراپ تا قىزىعۋشىلىق تانىتقان سالالاردا ينۆەستورلارعا ارنالعان قولايلى جاعدايلار كەڭىرەك تالقىلاندى.
سونداي-اق ماۋلەن اشىمباەۆ ساۋد ارابياسىنىڭ يسلام ىستەرى, ۋاعىز جانە ناسيحات ءمينيسترى ابدۋلاتيف بەن ابدەلازيز بەن ابدراحمان ءال-اش-شەيحپەن كەزدەستى. وندا تاراپتار كونفەسسياارالىق ديالوگتى دامىتۋ ماسەلەلەرى مەن پەرسپەكتيۆالارىن تالقىلادى. الەمدىك جانە ءداستۇرلى دىندەر كوشباسشىلارى سەزى حاتشىلىعىنىڭ باسشىسى اتاپ وتكەندەي, ساۋد ارابياسى تولەرانتتىلىق پەن كونفەسسياارالىق ديالوگتى نىعايتۋعا جانە سەزد يدەيالارىن دارىپتەپ, قولداۋعا ۇلكەن ۇلەس قوسىپ كەلەدى. ماۋلەن اشىمباەۆ مۇنداي قادام قازىرگىدەي شيەلەنىسە تۇسكەن تۇراقسىزدىق جاعدايىندا ايرىقشا ماڭىزعا يە ەكەنىن اتاپ ءوتتى.
«قازىر الەم گەوساياسي قاقتىعىستار جانە ساۋدا سوعىسى سياقتى ۇلكەن سىن-قاتەرلەرمەن بەتپە-بەت كەلىپ وتىر. سونداي-اق ءبىز ءارتۇرلى كۇشتەردىڭ وسىنداي حالىقارالىق شيەلەنىستى پايدالانىپ, راديكالدى يدەولوگيانى ناسيحاتتاۋعا, كسەنوفوبيانى ودان ءارى قوزدىرۋعا جانە جەك كورۋشىلىكتى تاراتۋعا ۇمتىلىپ جاتقانىن كورىپ وتىرمىز. مۇنداي جاعدايدا رۋحاني ديپلوماتيانى ىلگەرىلەتۋ جانە ءدىني كوشباسشىلاردىڭ كەلىسىم مەن ديالوگكە شاقىرۋى ماڭىزدى ءرول اتقارادى. سوندىقتان ساۋد ارابياسىنا ساپار اياسىندا دۇنيەجۇزىلىك يسلام ليگاسىمەن بىرلەسىپ, دىنارالىق ديالوگتى نىعايتۋ ماسەلەلەرىنە ارنالعان دوڭگەلەك ۇستەل ۇيىمداستىرىپ جاتىرمىز. بۇل ءىس-شارالار حالىقارالىق دەڭگەيدە ديالوگ مادەنيەتىن دارىپتەۋگە ءوز ۇلەسىن قوسادى دەپ ۇمىتتەنەمىز», دەپ م.اشىمباەۆ سۇحباتتاسۋشىعا بيىلعى قىركۇيەكتە استانادا وتەتىن الەمدىك جانە ءداستۇرلى دىندەر كوشباسشىلارىنىڭ VIII سەزىنە دايىندىق بارىسى تۋرالى ايتىپ بەردى.
ءوز كەزەگىندە ابدۋلاتيف بەن ابدەلازيز بەن ابدراحمان ءال-اش-شەيح سەزد اياسىنداعى باستامالارعا قولداۋ ءبىلدىرىپ, بۇگىندە فورۋم يدەيالارىنىڭ ماڭىزى جاھاندىق دەڭگەيدە ارتىپ كەلە جاتقانىن ايتتى. سونداي-اق ول ءوزارا بايلانىستى نىعايتۋ جانە رۋحاني ديپلوماتيانى دامىتۋ جولىنداعى ىنتىماقتاستىقتى ودان ءارى جانداندىرۋعا دايىن ەكەنىن جەتكىزدى.
بۇعان قوسا قازاقستان دەلەگاتسيانىڭ مۇشەلەرى «Neon» جوباسىنىڭ ىسكە اسىرىلۋ بارىسىمەن تانىستى. اتالعان جوبا اياسىندا قالاداعى ەكولوگيالىق جۇكتەمەنى ازايتۋدى جانە «جاسىل» ەنەرگەتيكانى بارىنشا پايدالانۋدى كوزدەيتىن ءىرى مەگاپوليس سالۋ جوسپارلانىپ وتىر. ونىڭ جالپى اۋدانى 26 500 شارشى شاقىرىمدى قۇراماق.
