اتالعان دەرەك بويىنشا قىلمىستىق ءىس قوزعالدى.
«پوليتسەيلەر زارداپ شەككەن شەتەلدىك ازاماتتى تەز ارادا اۋرۋحاناعا جەتكىزدى. وعان مەديتسينالىق كومەك كورسەتىلدى. جابىرلەنۋشى اۋرۋحاناعا جاتۋدان باس تارتتى, ونىڭ ومىرىنە قاۋىپ ءتونىپ تۇرعان جوق. كۇدىكتى وقيعا ورنىنان قاشىپ كەتپەك بولعان, الايدا ول تەز ارادا ۇستالىپ ۋاقىتشا ۇستاۋ يزولياتورىنا قامالدى. تەرگەۋ بارىسى مەنىڭ جەكە باقىلاۋىمدا», دەدى مينيستر.
جەلىدە وقيعانىڭ ۆيدەوسى پايدا بولدى. كادردا موتوتسيكل جۇرگىزۋشىسىنىڭ جانارماي قۇيۋ بەكەتىنە قاراي كەلە جاتقانىن, ونىڭ ارتىنان ەر ادامنىڭ ىلەسكەنىن كورۋگە بولادى. ءبىر كەزدە ەر ادام قالتاسىنان پىشاققا ۇقساس زاتتى شىعارىپ, موتوتسيكلشىگە بىرنەشە رەت سۇعىپ الادى.
ۆيدەودان ولاردىڭ اراسىندا بۇرىن دا جانجال بولعانى بايقالعان. الايدا جابىرلەنۋشىنىڭ مۇنداي شابۋىلدى كۇتپەگەنى انىق. ارتىنشا قاسكۇنەم اق ءتۇستى كولىككە وتىرىپ, وقيعا ورنىنان كەتىپ قالعان.
جامبىل وبلىستىق دەنساۋلىق ساقتاۋ باسقارماسىنىڭ مالىمەتىنشە, پىشاق جاراقاتىمەن 32 جاستاعى ەر ادام اۋرۋحاناعا جەتكىزىلگەن.
«ول 13 ساۋىردە ساعات 16:10-دا مەركى اۋداندىق ورتالىق اۋرۋحاناسىنىڭ جەدەل جاردەم بولىمىنە جەتكىزىلدى. دياگنوز - كەۋدە ايماعىنىڭ وڭ جاعى جانە بەل ايماعىنداعى پىشاق جاراقاتى. العاشقى مەديتسينالىق كومەك كورسەتىلدى, تىگىس سالىندى», دەپ حابارلادى جامبىل وبلىستىق دەنساۋلىق ساقتاۋ باسقارماسىنىڭ ءباسپاسوز قىزمەتى.
جابىرلەنۋشى كەيىننەن امبۋلاتورلىق ەمدەۋگە جىبەرىلدى.
