فوتو: @EmmanuelMacron
ەل باسشىلارى بەيبىت تۇرعىنداردى قورعاۋ مەن زارداپ شەككەن ايماقتارعا گۋمانيتارلىق كومەكتىڭ كەدەرگىسىز جەتۋىن قامتاماسىز ەتۋدىڭ ماڭىزدىلىعىن اتاپ ءوتتى.
ساياسي جيىنعا مىسىر پرەزيدەنتى ابدەل فاتتاح اس-سيسي, فرانتسيا پرەزيدەنتى ەممانۋەل ماكرون جانە يوردانيا كورولى ابداللا II قاتىستى.
ءۇش ەلدىڭ باسشىلارى 19 قاڭتاردا جاسالعان قاۋىپسىزدىك شارالارىن قامتاماسىز ەتە وتىرىپ تۇتقىنداردى بوساتۋ جونىندەگى كەلىسىمدى جەدەل ىسكە اسىرۋ قاجەتتىگىن باسا ايتتى.
مالىمدەمەدە بەيبىت تۇرعىنداردى, سونداي-اق گۋمانيتارلىق قىزمەتكەرلەردى قورعاۋ مەن گۋمانيتارلىق كومەكتى كەدەرگىسىز جەتكىزۋدى قامتاماسىز ەتۋ – حالىقارالىق قۇقىق بويىنشا مىندەت ەكەنى جانە بۇل نورمالار مىندەتتى تۇردە ساقتالۋى كەرەكتىگى اتاپ ءوتىلدى.
سونداي-اق, باسشىلار باتىس جاعالاۋى مەن شىعىس يەرۋساليمدەگى جاعدايدىڭ ۋشىعۋىنا الاڭداۋشىلىق ءبىلدىرىپ, ەكى مەملەكەت نەگىزىندەگى شەشىمدى جۇزەگە اسىرۋ مۇمكىندىگىن جوققا شىعاراتىن جانە شيەلەنىستى كۇشەيتەتىن بىرجاقتى ارەكەتتەردى توقتاتۋعا شاقىردى.
ولار يەرۋساليمدەگى قاسيەتتى ورىندارعا قاتىستى تاريحي مارتەبەسىن قۇرمەتتەۋگە ۇندەدى.
ماكرون, ابداللا II جانە اس-سيسي پالەستينالىقتاردى كۇشتەپ كوشىرۋگە نەمەسە پالەستينالىق اۋماقتاردى اننەكسيالاۋعا قارسى ۇستانىمدارىن راستادى, سونداي-اق حالىقارالىق قاۋىمداستىقتى مىسىر ۇسىنعان گازا سەكتورىن قالپىنا كەلتىرۋ جونىندەگى اراب-يسلام جوسپارىنا قولداۋ كورسەتۋگە شاقىردى.
بۇل بىرلەسكەن مالىمدەمە گازاداعى جاعدايدىڭ ۋشىعۋىنا بايلانىستى جاسالدى. جاقىندا بولعان اسكەري قاقتىعىستار كوپتەگەن بەيبىت تۇرعىنداردىڭ قازا بولۋىنا جانە ينفراقۇرىلىمنىڭ جاپپاي بۇزىلۋىنا اكەلدى. حالىقارالىق قاۋىمداستىق قاقتىعىستىڭ شيەلەنىسۋىنە الاڭداۋشىلىق ءبىلدىرىپ, ونى دەرەۋ رەتتەۋگە باعىتتالعان ناقتى شارالاردى قولعا الۋعا شاقىرىپ جاتىر.
