تاراز. 5-مامىر. جامبىل وبلىسى ىشكى ىستەر دەپارتامەنتى ەسىرتكى بيزنەسىنە قارسى كۇرەس باسقارماسىنىڭ قىزمەتكەرلەرى تاراز تەحنيكالىق جانە بيزنەس كوللەدجىنىڭ ستۋدەنتتەرىمەن بىرلەسىپ, «تاراز – ناشاقورلىقسىز قالا!» اتتى اكتسيا وتكىزدى. بۇل تۋرالى egemen.kz ءتىلشىسى حابارلادى.
«قازىرگى ۋاقىتتا ناشاقورلىق ماسەلەسى الەمدىك قوعامداستىقتا وزەكتى بولىپ قالۋدا جانە ونىڭ سالدارى رەتىندە جاستار اراسىندا ەسىرتكىنى پايدالانۋمەن بايلانىستى احۋال بارلىق ەلدىڭ الاڭداۋشىلىعىن تۋعىزىپ وتىر», – دەيدى بۇل جونىندە وسى وقۋ ورنىنىڭ ديرەكتورى جەڭىس سوپبەكوۆ.
ءوز كەزەگىندە قۇقىق قورعاۋشىلار جاستارعا ارناپ اقىل كەڭەستەرىن ايتىپ, وي-پىكىرلەرىمەن ءبولىستى. «ادامنىڭ دەنساۋلىعى – قوعام بايلىعى. ءاربىر ادام ءوز دەنساۋلىعىنىڭ مىقتى بولۋى جولدارىن قاراستىرادى. وتانىمىزدىڭ كەلەشەگى مەن كوركەيۋى ءوزىمىزدىڭ قولىمىزدا. سالاۋاتتى ءومىر ءسۇرۋدىڭ نەگىزى – جامان ادەتتەردەن اۋلاق بولۋ. «قازاقستان - 2050» ەلباسىنىڭ ۇزاق مەرزىمدى باعدارلاماسى – ءبىزدىڭ بولاشاعىمىزدىڭ نەگىزگى باعىتى. سوندىقتان, دەنى ساۋ, ءتانى تازا, رۋحى كۇشتى, ءبىلىمدى دە تاربيەلى ازامات بولۋ – ەل ءۇشىن, ۇرپاق ءۇشىن اسا ماڭىزدى. ال سالاۋاتتى ءومىر سۇرۋگە كەرى ىقپال تيگىزەتىن ىندەت – ول ناشاقورلىق», – دەدى ءىىد ەسىرتكى بيزنەسىنە قارسى كۇرەس باسقارماسىنىڭ اعا ينسپەكتورى, پوليتسيا پودپولكوۆنيگى ۆاسيلي دۋبسكي.
اكتسيا سوڭىندا بارلىق اتسالىسۋشىلار «تاراز – ناشاقورلىقسىز قالا!» ۇرانىن ايتىپ, فلەشموب بيلەدى.
ورالحان ءداۋىت.
دەرەك, سۋرەت: egemen.kz.
