اتالعان ءىس-شاراعا وبلىستىق ءماسليحات توراعاسى, ارداگەر ۇستازدار, جوعارى وقۋ ورىندارىنىڭ باسشىلارى, مەكتەپكە دەيىنگى, ورتا, تەحنيكالىق جانە كاسىپتىك ءبىلىم بەرۋ ۇيىمدارىنىڭ وكىلدەرى مەن ستۋدەنتتەر قاتىستى.
جيىندا وبلىس اكىمى «ادال ازامات» ءبىرتۇتاس تاربيە باعدارلاماسىنىڭ ۇرپاق تاربيەسى ءۇشىن ماڭىزى جوعارى ەكەنىن ايتتى.
«مەملەكەت باسشىسى قاسىم-جومارت توقاەۆ ۇلتتىق قۇرىلتايدىڭ «ادىلەتتى قازاقستان – ادال ازامات» اتتى وتىرىسىندا سويلەگەن سوزىندە اباي مۇراسىنا سۇيەنە وتىرىپ, «ادال ازامات» تۇجىرىمداماسىنىڭ ماڭىزىن ايرىقشا اتاپ ءوتتى. «پرەزيدەنتىمىزدىڭ «وزىق ويلى ۇرپاق ءوسىرۋ ءۇشىن ءبىلىم مەن تاربيە ءاردايىم قاتار ءجۇرۋى كەرەك»دەگەن ءسوزى بارشا ءبىلىم سالاسى وكىلدەرىنە ورتاق قاعيدا بولۋعا ءتيىس. ۇرپاققا بەرىلەتىن ءبىلىمنىڭ مازمۇنى مەن تاربيەنىڭ باعىتى ءبىر ارنادا توعىسقاندا عانا ءبىز سانالى دا ساليقالى تۇلعانى قالىپتاستىرا الامىز. ادالدىق – قاي زاماندا دا ادام بالاسىنىڭ ەڭ اسىل قاسيەتى بولعان. سوندىقتان ءبىز جاس ۇرپاققا تەك ءبىلىم عانا بەرىپ قويماي, ويىنا پاراسات, بويىنا ىزگىلىك دارىتۋىمىز كەرەك. بۇل جولدا ەڭ ۇلكەن جاۋاپكەرشىلىك, ارينە, ۇستازدار مەن ءبىلىم سالاسىنىڭ مايتالماندارىنا جۇكتەلەدى», دەدى ايماق باسشىسى.
سوندا-اق وبلىس اكىمى جيىندا ءوڭىردىڭ ءبىلىم سالاسىندا جۇزەگە اسىرىلاتىن جوبالارعا توقتالىپ, پرەزيدەنت تاپسىرماسىمەن سەمەيدەگى وقۋشىلار سارايىنىڭ قۇرىلىسىن اياقتاۋعا قارجى بولىنگەنىن ايتتى. ايماقتاعى جاستاردىڭ باستامالارىن قولداۋ ماقساتىندا جاستار ءىسى جونىندەگى باسقارما قۇرىلاتىنىن جەتكىزدى.
كەزدەسۋدە قازاقستاننىڭ ەڭبەك ەرى, ارداگەر ۇستاز الما شۇكىجانوۆا, مۇحتار اۋەزوۆ اتىنداعى پەداگوگيكالىق كوللەدج ديرەكتورى شاعانگۇل جاناەۆا, وبلىستىق ءبىلىم قىزمەتكەرلەرىنىڭ ارداگەرلەر كەڭەسىنىڭ ءتورايىمى مادەنيەت احمەتوۆا, ءاليحان بوكەيحان ۋنيۆەرسيتەتىنىڭ تاربيە جۇمىسى جانە الەۋمەتتىك ماسەلەلەر جونىندەگى پرورەكتورى ايرات بازەنوۆ, رەسپۋبليكالىق «مەكتەپكە دەيىنگى ۇيىمنىڭ ۇزدىك پەداگوگى» بايقاۋىنىڭ جەڭىمپازى يرينا بوچاروۆا, «قازاقستان رەسپۋبليكاسىنىڭ ۇزدىك 100 ستۋدەنتى» بايقاۋىنىڭ جەڭىمپازى شوقان بايمۋلاەۆ بايانداما جاساپ, وي-پىكىرلەرىن ورتاعا سالدى.
كەزدەسۋدىڭ سۇراق-جاۋاپ بولىمىندە قاتىسۋشىلار وبلىس اكىمىنە ساۋالدارىن قويىپ, ۇسىنىس-پىكىرلەرىن ايتتى. ايماق باسشىسى وڭىردە جۇزەگە اسىرىلاتىن ماڭىزدى جوبالارعا توقتالىپ, ايماقتىڭ دامۋىنا, اۋىلداردى وركەندەتۋگە, اباتتاندىرۋعا, «تازا قازاقستان» باعدارلاماسىنا, الەۋمەتتىك نىساندار سالۋعا قاتىستى جوسپارلارىمەن ءبولىستى.
ايماق باسشىسى كەزدەسۋ الدىندا مۇحتار اۋەزوۆ, جۇسىپبەك ايماۋىتوۆ, قانىش ساتباەۆ, الكەي مارعۇلان سىندى تۇلعالار ءبىلىم العان, 120 جىلدىق تاريحى بار وقۋ ورنىنىڭ كابينەتتەرىن ارالاپ, مۋزەي مەن كىتاپحانا جۇمىسىمەن تانىستى.
كەزدەسۋ اياسىندا وبلىس اكىمى «شابىت», «Smart bala», «بالالار كىتاپحاناسى», «قامقور», «ەڭبەگى ادال – جاس ورەن», «ۇشقىر وي الاڭى» جوبالارى بويىنشا ۇيىمداستىرىلعان كورمەنى تاماشالادى.
