ءىس-شارادا قازاق ۇلتتىق قىزدار پەداگوگيكالىق ۋنيۆەرسيتەتى ديرەكتورلار كەڭەسىنىڭ توراعاسى, مەملەكەت جانە قوعام قايراتكەرى, ەكونوميكا عىلىمدارىنىڭ دوكتورى وكسىكباەۆ ومارحان نۇرتاي ۇلى جانە ۋنيۆەرسيتەتتىڭ باسقارما توراعاسى – رەكتورى گۇلميرا قاناي عىلىمي قاۋىمداستىقتى كاسىبي مەرەكەمەن قۇتتىقتادى.
«عالىمدار – بۇل الەمدەگى يننوۆاتسيانىڭ, ىلگەرى دامۋدىڭ جانە جاڭارۋدىڭ شىڭىندا تۇراتىن تۇلعالار. جاڭالىق اشۋشى, ەلدىڭ ءوسىپ-وركەندەۋىنە, جاڭا تەحنولوگيالاردىڭ دامۋىنا باستاۋ بەرۋشى – عالىمداردىڭ ەڭبەگى. قازاق ۇلتتىق قىزدار پەداگوگيكالىق ۋنيۆەرسيتەتىن عالىمدار ورداسى دەسەم, ارتىق ايتقانىم ەمەس. سەبەبى بۇل ءبىلىم ورداسىندا ءار سالانىڭ عالىمدارى عىلىمعا بەت بۇرىپ, ومىرلەرىن وسى جولعا ارناعان. ولار ءوز ەڭبەكتەرىن عىلىمدى دامىتۋعا باعىتتاعان. ۋنيۆەرسيتەتتىڭ ديرەكتورلار كەڭەسى مەن باسقارماسى دا بۇل سالادا ايانباي ەڭبەك ەتۋدە. بۇگىندە ۋنيۆەرسيتەت قابىرعاسىندا زاماناۋي زەرتحانالار اشىلىپ, عالىمدارعا عىلىمي زەرتتەۋلەر جۇرگىزۋگە ۇلكەن مۇمكىندىكتەر جاسالدى. عالىمدارىمىزدىڭ ەلدىڭ وركەندەۋىنە ءوز ۇلەستەرىن قوسىپ, ارتىلعان ءۇمىتتى اقتايتىنىنا سەنىمدىمىن», – دەدى ديرەكتورلار كەڭەسىنىڭ توراعاسى ومارحان وكسىكباەۆ.
ءىس-شارا بارىسىندا ۋنيۆەرسيتەتتىڭ عىلىمي جەتىستىكتەرى تانىستىرىلىپ, ستۋدەنتتەر عىلىمي ەكسپەريمەنتتەر مەن عىلىمي جۇمىستار كورمەسىن ۇسىندى. سونىمەن قاتار عىلىمعا ەلەۋلى ۇلەس قوسقان ۇزدىك عالىمدار عىلىم جانە جوعارى ءبىلىم مينيسترلىگىنىڭ قۇرمەت گراموتاسىمەن, ۋنيۆەرسيتەتتىڭ دامۋىنا قوسقان ۇلەسى ءۇشىن توسبەلگىسىمەن, احمەت بايتۇرسىن ۇلى توسبەلگىسىمەن, عىلىم ۇزدىگى قۇرمەت ديپلومىمەن, سونداي-اق عىلىم جانە جوعارى ءبىلىم مينيسترلىگىنىڭ العىس حاتىمەن ماراپاتتالدى.
عىلىمي شارانىڭ قادىرلى قوناعى رەتىندە ارنايى شاقىرىلعان فيزيكا-ماتەماتيكا عىلىمدارىنىڭ دوكتورى, قر ۇلتتىق عىلىم اكادەمياسىنىڭ اكادەميگى, پروفەسسور, قر ۇلتتىق عىلىم اكادەمياسىنىڭ ۆيتسە-پرەزيدەنتى جۇمادىلداەۆ اسقار سەرقۇل ۇلى عىلىمنىڭ دامۋى ەل بولاشاعى ءۇشىن اسا ماڭىزدى ەكەنىن باسا ايتىپ, جاس عالىمداردىڭ باستامالارىنا زور سەنىم ءبىلدىردى. ول ستۋدەنتتەردىڭ عىلىمي جوبالارىن جوعارى باعالاپ, ولاردىڭ ىزدەنىسى مەن عىلىمعا دەگەن قۇلشىنىسىنىڭ قۋانتارلىق ەكەنىن ەرەكشە اتاپ ءوتتى.
«بۇگىنگى كۇننىڭ ماڭىزى زور. ۋنيۆەرسيتەت قابىرعاسىندا اۋىز تولتىرىپ ايتارلىقتاي يگى ىستەر اتقارىلىپ جاتقانىن كورىپ قۋاندىم. ستۋدەنتتەردىڭ شارا اياسىندا ۇسىنعان عىلىمي جوبالارىمەن تانىستىم. جاستاردىڭ عىلىمعا دەگەن قۇلشىنىسى مەنى ەرەكشە قۋانتىپ وتىر. الداعى ۋاقىتتا عىلىم اكادەمياسى مەن قازاق ۇلتتىق قىزدار پەداگوگيكالىق ۋنيۆەرسيتەتى بىرلەسە جۇمىس ىستەيدى دەگەن ءۇمىتىم زور. قازاق عىلىمى وركەندەي بەرسىن! مەرەكە قۇتتى بولسىن!» – دەدى اسقار جۇمادىلداەۆ.
بۇل شارا عىلىم مەن ءبىلىم سالاسىنىڭ دامۋىنا زور ۇلەس قوسقان عالىمدارعا دەگەن قۇرمەت پەن ىقىلاستىڭ ايقىن كورىنىسى بولدى. ۋنيۆەرسيتەت باسشىلىعى الداعى ۋاقىتتا دا عىلىمي زەرتتەۋلەر مەن جاڭا يدەيالار ارقىلى ەلىمىزدىڭ وركەندەۋىنە ءوز ۇلەستەرىن قوساتىن مامانداردى تاربيەلەۋگە دايىن ەكەندىگىن جەتكىزدى.
