سۋرەت: gov.kz
كەزدەسۋ بارىسىندا سىرتقى ساياسي ۆەدومستۆولاردىڭ باسشىلارى حالىقارالىق كۇن تارتىبىندەگى وزەكتى ماسەلەلەر بويىنشا پىكىر الماسىپ, دوستاستىق شەڭبەرىندەگى ءوزارا ءىس-قيمىلدىڭ جاي-كۇيى مەن پەرسپەكتيۆالارىن پىسىقتادى. قازاقستان پرەمەر-ءمينيسترىنىڭ ورىنباسارى – سىرتقى ىستەر ءمينيسترى مۇرات نۇرتىلەۋ تاۋەلسىز مەملەكەتتەر دوستاستىعى ەلدەر اراسىنداعى كەشەندى بايلانىستاردى تەرەڭدەتۋدىڭ ورتاق الاڭى ەكەنىن ايتىپ, بۇل باعىتتاعى ارىپتەستىك بايلانىستار نىعايا بەرەتىنىنە سەنىم ءبىلدىردى. ءسىم باسشىسى قازاقستان ۇيىمدى ودان ءارى دامىتۋعا مۇددەلى جانە ونىڭ كوپقىرلى الەۋەتىن نىعايتۋعا نيەتتى ەكەنىن اتاپ ءوتتى.
سونداي-اق م.نۇرتىلەۋ قاتىسۋشىلاردى تمد اياسىنداعى ىنتىماقتاستىقتىڭ ءارتۇرلى اسپەكتىلەرى بويىنشا ەلىمىزدىڭ ۇستانىمدارى تۋرالى حاباردار ەتىپ, ۇيىمدى ودان ءارى دامىتۋعا باعىتتالعان بىرقاتار ۇسىنىستى ورتاعا سالدى. بۇل رەتتە ۇيىمنىڭ ينستيتۋتسيونالدىق دامۋىنا, ۇيلەستىرۋ مەحانيزمدەرىن جەتىلدىرۋگە جانە دوستاستىق اياسىندا قازاقستان پرەزيدەنتى قاسىم-جومارت توقاەۆ ۇسىنعان باستامالاردى ىسكە اسىرۋعا ەرەكشە نازار اۋدارىلعانى ايتىلدى.
جيىندا قازاقستان باستامالارىن جۇزەگە اسىرۋدا دوستاستىق بويىنشا سەرىكتەستەردىڭ قولداۋى ەرەكشە اتالىپ ءوتتى.
«ەلىمىزدىڭ ۇسىنىسى بويىنشا بۇگىنگى تاڭدا ۆولونتەرلەر فورۋمى, دوستاستىق جارمەڭكەسى, تمد اكادەميالىق استاناسى جانە باسقا دا كوپتەگەن جوبا سياقتى اۋقىمدى ءىس-شارالار بىرلەسكەن كۇش-جىگەردىڭ ارقاسىندا ىسكە اسىرىلىپ جاتىر ءارى جاقىن بولاشاقتا وتكىزۋگە جوسپارلانعان», دەپ مالىمدەدى م.نۇرتىلەۋ.
ۇلى وتان سوعىسىنداعى جەڭىستىڭ 80 جىلدىعى قارساڭىندا تمد ەلدەرىنىڭ بىرقاتار قالاسىنا, سونىڭ ىشىندە استانا, الماتى, قاراعاندى جانە باسقا دا قالالارعا «1941–1945 جج. ەڭبەك داڭقى قالاسى» قۇرمەتتى اتاعىن بەرۋ تۋرالى شەشىم كەلىسىلدى.
ءداستۇرلى دوستىق اتموسفەراسىندا وربىگەن اۋقىمدى جيىن اياسىندا ءسىم باسشىسى رەسەي فەدەراتسياسىنىڭ سىرتقى ىستەر ءمينيسترى سەرگەي لاۆروۆپەن كەزدەسۋ وتكىزدى. كەزدەسۋدە ساۋدا-ەكونوميكالىق بايلانىستاردى نىعايتۋ ماسەلەسىنە ايرىقشا نازار اۋدارىلدى. ستراتەگيالىق ماڭىزى بار سالالاردا – كولىك جانە لوگيستيكا, ەنەرگەتيكا, مەتاللۋرگيا, ماشينا جاساۋ, ونەركاسىپ جانە اۋىل شارۋاشىلىعى باعىتتارىندا مەملەكەتارالىق سەرىكتەستىكتىڭ وڭ ديناميكاسى اتالىپ ءوتتى.
2024 جىلدىڭ قورىتىندىسى بويىنشا ەكى ەل اراسىنداعى ءوزارا تاۋار اينالىمى 27,8 ملرد دوللاردى قۇراپ, وتكەن جىلمەن سالىستىرعاندا 2,8%-عا وسكەن. وسىعان وراي تاراپتار بۇل كورسەتكىشتى الداعى ۋاقىتتا 30 ملرد دوللارعا دەيىن جەتكىزۋگە مۇددەلى ەكەنىن جەتكىزدى.
مينيسترلەر سونداي-اق ەكىجاقتى ستراتەگيالىق سەرىكتەستىكتى جان-جاقتى دامىتۋعا ءوزارا بەيىل ەكەنىن ءبىلدىرىپ, حالىقارالىق جانە وڭىرلىك ۇيىمدار اياسىنداعى ۇيلەستىرىلگەن ءىس-قيمىلعا ەرەكشە ماڭىز بەرىلگەنىن ايتتى.
«قازاقستان – سەنىمدى وداقتاسىمىز جانە كورشىمىز. مەملەكەت باسشىلارى ايقىنداعان باعىتتى نەگىزگە الا وتىرىپ, ءبىز ءاردايىم ەكىجاقتى جانە حالىقارالىق الاڭداردا ءبىر-بىرىمىزگە قولداۋ كورسەتىپ كەلەمىز», دەدى س.لاۆروۆ.
ۇيىمعا مۇشە مەملەكەتتەر وكىلدەرىنىڭ شەشىمىمەن سىرتقى ىستەر مينيسترلەرى كەڭەسىنىڭ كەلەسى وتىرىسى 2025 جىلعى قازان ايىندا تمد مەملەكەت باسشىلارى ءسامميتى قارساڭىندا دۋشانبە قالاسىندا وتەتىنى ءمالىم بولدى.
الماتى
