سۋرەت: abai.kz
ءىس-شاراعا قاتىسۋشىلار قانىش ساتباەۆتىڭ 10 تومدىق عىلىمي مۇراسىمەن تانىستى. باسىلىمعا 1923–1963 جىلدار ارالىعىنداعى عىلىمي ەڭبەكتەر, ونىڭ ىشىندە مونوگرافيالار, ماقالالار, باياندامالار, گەولوگيالىق بارلاۋ ەسەپتەرى, كارتالار, عىلىمي-تەحنيكالىق جوبالار جانە رۋحاني مۇرا سالاسىنداعى جۇمىستار ەنگەن. بارلىق ماتەريال حرونولوگيا جانە تاقىرىپ بويىنشا جۇيەلەنىپ, زاماناۋي عىلىمي جانە باسپا ستاندارتىنا سايكەس جاسالعان.
سەنات توراعاسىنىڭ ورىنباسارى جاقىپ اسانوۆ سالتاناتتى جيىن بارىسىندا اتقارىلعان جۇمىستىڭ ماڭىزى مەن ونىڭ بولاشاق ۇرپاققا قۇندىلىعىن اتاپ ءوتتى. ول قانىش ساتباەۆتىڭ ەسىمى ەل تاريحىنا التىن ارىپتەرمەن جازىلعانىن ايتا كەلىپ, ونىڭ عىلىمي جانە ادامگەرشىلىك مۇراسىن كەڭىنەن جاريا ەتۋ ورتاق ازاماتتىق مىندەتىمىز ەكەنىن جەتكىزدى.
التىنبەك نۋح ۇلى ۇلتتىق عىلىم, تاريحي زەردە مەن ۇرپاقتاردىڭ رۋحاني ساباقتاستىعىن ساقتاۋدا جوبانىڭ ماڭىزىنا توقتالدى. ونىڭ ايتۋىنشا, اكادەميكتىڭ ەڭبەكتەرى – جاستاردىڭ وتاندىق عىلىمعا جانە ونىڭ نەگىزىن قالاۋشىلارعا دەگەن ماقتانىش سەزىمىن قالىپتاستىراتىن ۇلتتىق كودتىڭ ءبىر بولىگى.
«قانىش ساتباەۆتىڭ 10 تومدىق شىعارمالار جيناعى – بۇل ۇلى عالىمنىڭ عىلىمي جولىنىڭ كورىنىسى عانا ەمەس, سونىمەن قاتار ۇلتتىق سانا-سەزىمدى قالىپتاستىرۋعا قوسقان ماڭىزدى ۇلەسى. بۇل جيناق – عالىمداردىڭ جاڭا ۇرپاعىنا كەڭ كوكجيەك اشاتىن, جاستاردىڭ عىلىمعا دەگەن ىنتا-ىقىلاسىن ارتتىراتىن جانە بولاشاق الدىنداعى جاۋاپكەرشىلىك سەزىمىن قالىپتاستىراتىن ءبىلىمنىڭ ەڭ قۇندى كوزى. ونىڭ مۇراسى عىلىمدى ودان ءارى دامىتۋ ءۇشىن بەرىك نەگىز جانە جاستاردى تۋعان جەرىن زەرتتەۋگە, اشۋعا جانە وعان قىزمەت ەتۋگە قۇلشىندىرادى», دەپ اتاپ ءوتتى دەپۋتات.
ءىس-شاراعا سەنات پەن ءماجىلىس دەپۋتاتتارى, عىلىم جانە جوعارى ءبىلىم مينيسترلىگىنىڭ وكىلدەرى, ق.ي.ساتباەۆ اتىنداعى قازاق ۇلتتىق تەحنيكالىق زەرتتەۋ ۋنيۆەرسيتەتىنىڭ باسشىلىعى, مەملەكەت جانە قوعام قايراتكەرلەرى, عىلىم جانە ءبىلىم سالاسىنداعى جەتەكشى ماماندار قاتىستى.
جوبا عىلىم جانە جوعارى ءبىلىم مينيسترلىگىنەن قولداۋ تاۋىپ, «حالىقارالىق ساتباەۆ قورىنىڭ» اتسالىسۋىمەن جانە ق.ي.ساتباەۆ اتىنداعى قازاق ۇلتتىق تەحنيكالىق زەرتتەۋ ۋنيۆەرسيتەتىنىڭ باسشىلىعىمەن جۇزەگە اسىپ وتىر.
