بەلگىلى جازۋشى ورازبەك سارسەنباەۆ قايتىس بولدى

استانا. 5 مامىر. بەلگىلى جازۋشى, مەملەكەتتىك سىيلىقتىڭ يەگەرى ورازبەك سارسەنباەۆ قايتىس بولدى. بۇل تۋرالى egemen.kz حابارلادى. ورازبەك سارسەنباەۆ 1938 جىلى 20 تامىزدا قىزىلوردا وبلىسى, شيەلى اۋدانى, جاڭا تۇرمىس اۋىلىندا تۋعان. س.م.كيروۆ اتىنداعى قازاق مەملەكەتتىك ۋنيۆەرسيتەتىن قازاق ءتىلى جانە ادەبيەتى ءپانىنىڭ مۇعالىمى ماماندىعى بويىنشا بىتىرگەن (1964 ج.). ەڭبەك جولىن شيەلى اۋدانىنداعى مەكتەپتە مۇعالىم بولىپ باستادى. «لەنينشىل جاس», «قازاق ادەبيەتى» گازەتتەرى مەن «جۇلدىز» جۋرنالىندا ءبولىم مەڭگەرۋشىسى بولىپ قىزمەت اتقاردى. سونداي-اق, قازاقستان جازۋشىلار وداعىندا ادەبي كەڭەسشى, حاتشى لاۋازىمدارى بولىپ ەڭبەك ەتتى. «جازۋشى» باسپاسىنىڭ باس رەداكتورى, «ونەر» جانە «قاينار» باسپالارىنىڭ ديرەكتورى قىزمەتتەرىن دە ابىرويمەن اتقاردى. مەملەكەتتىك سىيلىقتىڭ يەگەرى, «قۇرمەت» جانە «پاراسات» وردەندەرىمەن ماراپاتتالعان. كوپتەگەن ادەبي شىعارمالار مەن 20-دان استام كىتاپتىڭ اۆتورى. سونىڭ ىشىندە «داڭق» جانە «ساعىم» پوۆەستەرى مەن «تاڭبالى تاس», «سيقىرلى شام», «شەڭبەر», «ءومىرناما» روماندارى وقىرمانعا كەڭىنەن تانىمال. «باقىت قۇسى», «وڭتۇستىك كوكجيەك», «ادامدار باقىت ىزدەيدى» جانە «جيدە گۇلدەگەندە» اتتى اڭگىمەلەر مەن پوۆەستەر جيناعى جارىق كورگەن. سونداي-اق, «جارىق دۇنيە» اتتى ولەڭدەر جانە پوەمالار جيناعى باسىلىپ شىقتى. ودان بولەك, 2008-2010 جىلدارى «يزبراننىە پرويزۆەدەنيا نا رۋسسكوم يازىكە» شىعارمالارىنىڭ 3 تومدىعى مەن «قازاق تىلىندەگى تاڭدامالى شىعارمالارىنىڭ» 10 تومدىعى جارىق كوردى. ەلامان قوڭىر. دەرەك, سۋرەت: egemen.kz.