«استانا» يتاليا كومانداسىن جەڭدى

استانا. 11 اقپان. باسكەتبولدان ەۆروچەللەندج ءتۋرنيرى اياسىندا «استانا» ءوز الاڭىندا يتاليانىڭ «ەنەل باسكەت برينديزي» كومانداسىن 83:75 ەسەبىمەن جەڭدى. بۇل تۋرالى egemen.kz حابارلادى. استانا قالاسىنداعى «سارىارقا» رەسپۋبليكالىق ۆەلوترەگىندە وتكەن ويىندا ەسەپتى قوناقتار اشتى. ارتىنشا استانالىقتار «تىزگىندى» ءوز قولدارىنا الىپ, جۇيەلى ويىن ورنەگىن كورسەتە باستادى. سونىڭ ناتيجەسىندە, لۋكشا اندريچ, دجەيكوۆان براۋن جانە دجەرري دجونسون سىندى «استانا» باسكەتبولشىلارى بەلسەندىلىك تانىتىپ, ەسەپتە العا شىقتى. العاشقى مينۋتتاردا الاڭ يەلەرىنەن مۇنشالىقتى قارسىلىق كۇتپەسە كەرەك, «ءبرينديزيدىڭ» باس جاتتىقتىرۋشىسى پەر بۋچي 6-مينۋتتا ءۇزىلىس الدى. دەسەك تە, يتاليالىق ماماننىڭ بۇل ارەكەتى ايتارلىقتاي ناتيجە بەرمەدى. ءوز مۇمكىندىكتەرىن ءمۇلت جىبەرمەگەن ەلوردالىقتار ءبىرىنشى كەزەڭدى 19:14 ەسەبىمەن ءوز پايدالارىنا اياقتادى. ەكىنشى كەزەڭ العاشقىسىنا مۇلدەم قاراما-قايشى باعىتتا ءوربىدى. ەندى ەسەپتى تەڭەستىرۋشى كوماندا رەتىندە «استاناعا» كوپ كۇش جۇمساۋعا تۋرا كەلدى. ءتىپتى, قازاقستاندىق كوماندانىڭ سۋ جاڭا باس جاتتىقتىرۋشىسى رامۋناس بۋتاۋتاس تايم-اۋت الىپ, ويىن ورتاسىندا شاكىرتتەرىنىڭ اپتىعىن باسۋعا ءماجبۇر بولدى. بۇل ءۇزىلىس ءبىزدىڭ كوماندانىڭ ويىنىنا تىڭ سەرپىن بەرگەنىمەن, ەكىنشى كەزەڭ قورىتىندىسى بويىنشا «برينديزي» 33:37 ەسەبىمەن جەڭىسكە جەتتى. ءۇشىنشى ون مينۋتتىق تەڭ جاعدايدا ءوتتى. «استانا» ساپىنان اندريچ, براۋن, دجونسون ۇشتىگى ەرەكشە كوزگە تۇسسە, قوناقتار تاراپىنان ەريك, پاللەن جانە دەنمون ۇشتىگى الاڭ يەلەرىنىڭ قورعانىسىنا ايتارلىقتاي سالماق ءتۇسىردى. كەزەڭ سوڭىندا «استانا» 23:22 ەسەبىمەن باسىم تۇسكەنىمەن, جالپى ەسەپتە قوناقتار الدا بولدى (56:59). استانالىقتار ءۇشىن جەڭىس اۋاداي قاجەت ەدى. ۆتب ليگاسىنداعى سوڭعى سۇرەڭسىز ويىنداردان كەيىن ءوز جانكۇيەرلەرىنىڭ كوڭىلىن اۋلاۋ ءۇشىن براۋن, دجونسون, كالاتەس جانە ماحالباشيچ باستاعان ەلوردالىقتار شەشۋشى كەزەڭدە بارىن سالدى. ولاردىڭ بۇل تالپىنىستارى كوپ كۇتتىرمەي ءوز جەمىسىن بەرە باستادى. الاڭ يەلەرىنىڭ قارقىنىنا توتەپ بەرە الماعان قوناقتار ءجيى قاتەلىكتەرگە بوي الدىرىپ, ناتيجەسىز سوققىلارى كوبەيدى. «ءبرينديزيدىڭ» بوساڭسىعانىن بايقاعان بۋتاۋتاس شاكىرتتەرى شابۋىلدارىن ۇدەتىپ, ءتورتىنشى كەزەڭدە 27 ۇپاي جينادى. ال يتاليالىقتار بۇل كورسەتكىشكە 16 ۇپايمەن جاۋاپ بەردى. ءتورت كەزەڭ قورىتىندىسى بويىنشا, «استانا» 83 ۇپاي جيناسا, «برينديزي» ويىنشىلارى 40 مينۋت ىشىندە ەنشىلەرىنە 75 ۇپاي جازدى. وسى جەڭىستەن كەيىن ەۆروچەللەندج ءتۋرنيرىنىڭ «ءى» توبىندا وينايتىن «استانا» 6 ۇپايمەن ەكىنشى ورىندا كەلەدى. توپ باسىندا رۋمىنيالىق «ەنەرگيا روۆيناري» كومانداسى. ولاردىڭ ەنشىسىندە 7 ۇپاي بار. ال «استانا» سياقتى 4 تۋردا 6 ۇپاي ولجالاعان بەلگيالىق «وكاپي الستار» كومانداسى ازىرگە 3-ورىندا تۇرسا, «برينديزي» 5 ۇپايمەن توپتىڭ سوڭىندا كەلەدى. تۋرنير اياسىنداعى كەلەسى ويىندى قازاقستاندىق كوماندا 18 اقپان كۇنى سىرت الاڭدا «ەنەرگيا روۆيناريگە» قارسى وتكىزەدى. ايتا كەتەر جايت, «استانانىڭ» باس جاتتىقتىرۋشىسى رامۋناس بۋتاۋتاس ءۇشىن يتاليالىق كوماندامەن بولعان تارتىس ەۆروچەللەندج تۋرنيرىندەگى 2008-2009 جىلعى ماۋسىمنان بەرگى العاشقى ويىن. ءدال سول كەزدە ليتۆالىق مامان اتالعان تۋرنيردە باق سىناعان لاتۆيانىڭ «ريگا» كومانداسىن جاتتىقتىرعان بولاتىن. ەلامان قوڭىر. دەرەك: egemen.kz. سۋرەت: bcastana.kz.