جارىستىڭ نەگىزگى بولىگىنىڭ جولداماسى تەك توپ جارعان كومانداعا عانا بۇيىرادى. سول سەبەپتى دە ىرىكتەۋ تۋرنيرىندە جەرلەستەرىمىز بارىنشا تابىستى ونەر كورسەتۋگە ءتيىس. وسى ورايدا, باستى باسەكەلەسىمىز اۋستراليا قۇراماسى ەكەنىن ايتا كەتكەن ابزال. جاسىل قۇرلىق وكىلدەرى بيللي دجين كينگ كۋبوگىندە جەتى رەت باس جۇلدەنى ولجالادى. بۇل تابىستاردىڭ بارلىعىنا ولار وتكەن عاسىردىڭ 60-70 جىلدارى قول جەتكىزدى. بىراق سوعان قاراپ, «قازىرگى كەزدە اتالعان مەملەكەتتە تەننيس قۇلدىرادى» دەگەن وي تۋىنداماۋ كەرەك. اۋستراليالىقتار ءالى دە ازۋلى. كەيىنگى بەس جىلدا ولار كينگ كۋبوگىنىڭ فينالىندا ەكى رەت وينادى. 2019 جىلى پەرتتە فرانتسيادان ۇتىلسا, 2022 جىلى گلازگودا شۆەيتسارياعا ەسە جىبەردى.
اۋستراليانىڭ قازىرگى بەتكەۇستارى – داريا كاساتكينا. كۇنى كەشە عانا سول مەملەكەتتىڭ ازاماتتىعىن العان 27 جاستاعى رەسەيلىك تەننيسشى WTA تۋرنيرلەرىندە جەتى رەت توپ جارعان. قازىرگى كەزدە ۇزدىكتەر تىزىمىندە 14-ورىندا تۇر. داريا 2018 جىلى ۋيمبلدوننىڭ شيرەك فينالىنا, 2022 جىلى رولان گارروستىڭ جارتىلاي فينالىنا دەيىن جەتتى. بيىل اۋستراليانىڭ اشىق بىرىنشىلىگىنىڭ ءتورتىنشى كەزەڭىندە كۇش سىناستى. ەلدىڭ ەكىنشى راكەتكاسى كيمبەرلي بيررەل (WTA №61) گەرمانيادا تۋىپ-ءوستى. تىزىمدە ءتورتىنشى تۇرعان ايلا تومليانوۆيچ (WTA №79) حورۆاتيانىڭ تۋماسى. جەرگىلىكتى ويىنشىلار اراسىنان مايا دجوينت (WTA №78) پەن وليۆيا گادەتسكيدى (WTA №98) اتاپ وتۋگە بولادى. ولاردىڭ بارلىعى – توپ-100-دىككە ەنىپ وتىرعان تەننيسشىلەر.
دەگەنمەن بريسبەنگە ناعىز بابىندا بابىندا بارعان قازاقستان قۇراماسى اۋستراليانى ەش قينالماي ۇتتى. يۋليا پۋتينتسەۆا مايۋ دجوينتتى جەڭدى – 6:2, 6:1. ەلەنا رىباكينا كيمبەرلي بيررەلدەن باسىم ءتۇستى – 6:3, 7:6 (7:4). جۇپتىق سايىستا اننا دانيلينا مەن جىبەك قۇلامباەۆا ستورم ساندەرس/ەللەن پەرەس جۇبىنا ەسە جىبەردى – 3:6, 4:6. سوعان قاراماستان جالپى ەسەپتە جەرلەستەرىمىز جەڭىس تويىن تويلادى.
ەندى كولۋمبياعا قارسى وينايمىز. اتالعان كوماندادا جەڭىسپەن ورىلگەن باي ءداستۇر جوق. دەسەك تە وڭتۇستىك امەريكا وكىلدەرى اراسىنان كاميلا وسوريو (WTA №53) مەن ەميليانا ارانگونى (WTA №84) اتاپ وتۋگە بولادى. 23 جاستاعى كاميلا كەزىندە جاستاردىڭ «ۇلكەن دۋلىعا» ساناتىنداعى تۋرنيرلەرىندە جەڭىسكە جەتىپ, الەمدىك رەيتينگتە كوش باستادى. ايەلدەر اراسىنداعى WTA دودالارىندا ءۇش مارتە مەرەيى ۇستەم بولدى. 24 جاستاعى ەميليانا دا ءتۇرلى تۋرنيرلەردە ايشىقتى ونەرىمەن كوزگە ءتۇسىپ ءجۇر.
