«Birlik» انسامبلىمەن بىرگە فەستيۆالعا تاعى سەگىز شىعارماشىلىق ۇجىم قاتىستى. ولار – ءار ۇلتتىڭ رۋحى مەن ءداستۇرىن ساحنادا بەينەلەپ جۇرگەن جاندار. حالىقارالىق تۇركسوي ۇيىمىنىڭ باس حاتشىسى سۇلتان راەۆ اتاپ وتكەندەي, بۇل فەستيۆال – تاجىريبە الماسۋ مەن شابىتتانۋعا, ورتاق مادەني قۇندىلىقتاردى بولىسۋگە مۇمكىندىك بەرگەن ەرەكشە الاڭ بولدى. ءىس-شارا بيىل اقتاۋعا بەرىلگەن «تۇركى الەمىنىڭ مادەني استاناسى» مارتەبەسى اياسىندا ءوتتى.
«Birlik» ءانسامبلى بىلتىر قۇرىلعان بولاتىن. ۇجىم قۇرامىنا كاستينگ ناتيجەسى بويىنشا ىرىكتەلگەن 20 ۇزدىك ءبيشى مەن مۋزىكانت ەندى. شىعارماشىلىق توپتىڭ باستى ماقساتى – الەم حالىقتارىنىڭ مادەني مۇراسىن ساقتاۋ جانە ناسيحاتتاۋ, ءداستۇرلى مۋزىكا مەن ءبيدى كوپشىلىككە تانىتۋ. انسامبلگە حالىقارالىق بايقاۋلاردىڭ لاۋرەاتى انەل ماراباەۆا جەتەكشىلىك ەتەدى. سونداي-اق قويىلىمدار مەن حورەوگرافيالىق كومپوزيتسيالار دايىنداۋ بارىسىندا تاجىريبە الماسۋ ءۇشىن جاقىن شەتەلدەردەن تانىمال حورەوگرافتار شاقىرىلادى.
بيىل اقتاۋدا 30-دان استام حالىقارالىق مادەني جانە شىعارماشىلىق باستاما وتكىزۋ جوسپارلانعان. اتاپ ايتساق, فەستيۆالدار, عىلىمي كونفەرەنتسيالار, كورمەلەر مەن بايقاۋلار ۇيىمداستىرىلادى. اتالعان ءىس-شارالار تۇركى الەمى ەلدەرى اراسىنداعى مادەني ىنتىماقتاستىقتى دامىتۋعا زور ۇلەس قوسادى.
