ءبىر كەم ارەكەت

اكەسىنىڭ ۇيعارىمىمەن بارماعان ۇيىرمەسى جوق: شاحمات, ماتەماتيكا, فيزيكا, حيميا, تاعى نە, قۇداي-اۋ ءبارى بار. كىل مىقتى مۇعالىمدەر بالانى ۇيىنە كەلىپ وقىتاتىن. تۇك شىقپادى. بارشىلىق اۋلەكى دۇنيەلەرمەن اۋەستەنۋ­گە جول اشتى. ۇلى نە دەسە سونى ورىندايتىن اكە پەرزەنتىنىڭ وقۋعا قىرى جوق ەكەنىن كەش ءتۇسىندى. بالانىڭ ميىن اشىتۋدى ءجون كورمەدى. ايادى. قاتالدىق تانىتىپ, تالاپ قويىپ وقۋعا ماجبۇرلەۋگە بولۋشى ەدى, بىراق بالاسىن قيناعىسى كەلمەدى.

اكە قالاي دەگەندە دە تۇيا­عى­نىڭ تۇعىرلى, اتاقتى ادام بولۋىن قالاپ, وسى تىلەگىن ورىن­داۋعا جانتالاسىپ جول ىزدەدى. انشىلىك تۇقىمدا جوق, ەبى دە كەلمەيدى. ەندى نە؟ تاپتى: سپورتتا باق سىناۋ. كۇرەس, بوكس, كاراتە, ۆولەيبول, فۋتبول, ءجۇزۋ, تاعى نە بار ەدى, ءبارى-ءبارىنىڭ باسىن شالدىردى. اقىرىندا سپورتتىڭ مىڭ سان ءتۇرىنىڭ بىرىنە توقتادى. بالانىڭ قالاۋىمەن.

دەنە ءبىتىمى كەلىستى, قارا كۇشكە دە قارا جاياۋ ەمەس ۇلىنىڭ الەم چەمپيونى بولۋىن, حالىقارالىق تۋرنيردە توپ جارۋىن, وليمپيادا­نىڭ التىنىن الۋىن شىن قالادى. ءىزباسارىنىڭ سپورتتا جولى بولارىنا سەنگىسى كەلدى. ۇلىنان بىردەڭە شى­عارىنا ونىڭ ءوزى سياقتى مى­عىم, تورتپاق, كەڭ جاۋرىندى ءبىتىمى بار-تىن. بالانىڭ مىنەزى, بولمىسى وزىنىكىنە ۇقسامايتىنى عانا اكەنىڭ ءۇمىتىنىڭ اقتالارىنا كۇمان تۋعىزاتىن. ماڭدايىنا جەل ءتيىپ, جۇزىنە كۇن ساۋلەسى ءتۇسىپ كورمەگەن بالا بولبىر, بوساڭ ەدى. ەرىك-جىگەر, وجەتتىلىك تابيعاتىندا بار شىعار, بولسا ونىسى قولدان تۇنشىقتىرىلعان. ونى وياتۋعا اكەنىڭ تۇيسىگى جەتپەدى نە ەلجىرەكتىگى ەرىك بەرمەدى.

اكە ىقپالىمەن سپورتتا­عى جول باستال­دى. بارلىق كەدەرگى الىنىپ تاستالدى. جەڭىسكە ىنتالاندىرۋدىڭ نەشە ءتۇرى قولدانىلدى. ناتيجە جوق. بىراق اكەنىڭ قالاۋى ەشتەڭەنى «تىڭدار» ەمەس... ۇمىتسىزدىك مەڭدەدى. كەنەت ءباسى تومەن ءبىر تۋرنيردە عايىپتان-تايىپ بالا جۇلدەلى بولدى. ءۇمىت وتى قايتا وياندى. تاعى شاپقى­لاۋ. ونىڭ ۇستىنە ىقپالدى اكەنىڭ ىعىنا جىعىلعىش جاتتىقتىرۋشىلار ۇنەمى «بالا تالانتتى, بولاشاعى زور, تەك باعى جان­باي ءجۇر» دەيدى جالپاقتاپ. بۇل دا الگى سۇرەڭسىز جولدان شىقپاۋعا سەپ. ءۇمىت مازداتقىش.

بالانىڭ سپورتتاعى جولىن داڭعىل ەتۋ بارىسىندا بارلىق تەتىك ىسكە قوسىلدى. باقتالاس, باسەكەلەس تالاي مىق­تىلار, تالانتتار, دارىندى­لار جولدان تايدىرىلدى, قولدان ءسۇرىندىرىلدى, قۇلا­گەردىڭ كەبىن كيدى. بارىنەن دە ەڭ كۇيىندىرەتىنى باسەكەلەس­تەر­دىڭ  كوبىسى جولىنان جاڭىلىپ, سول كۇيى سپورتتان ءبىرجولا قول ءۇزدى.  وكىنىشتى ەمەس پە؟.. ولارعا قاراتا جاۋاپكەرشى­لىك­تەن جەڭىل قۇتىلدىراتىن «بۇيىر­ماعان عوي...» دەگەن ءسوز سان رەت ايتىلدى...

تالاي رەت كوككە كوتەرىلۋگە ءتيىس كوك تۋ تاسادا «مۇلگيدى». ىقپالدى اكەدە كىم بولسا دا ۇلت جالاۋىن شىڭعا تىكسە ەكەن دەپ, وسىناۋ ءىرى ىسكە ىقپال ەتۋ ويىندا دا جوق. كوكسەگەنى – ءوز تۋىن عانا جەلبىرەتۋ. كوك تۋدى بيىكتە جەلبىرەتسەم دەگەن تىلەك كەرەمەت-اق, بىراق مۇنىڭ استارىندا ەسەپ-قيساپ جاتقانى جامان ءدا.

ۇلت جالاۋىنىڭ ۇنجىر­عاسى تۇسۋىنە ىقپالدى اكەلەر­دىڭ «ىقپالى» ءتيىپ-اق تۇر. قايتپەك كەرەك؟