عىلىم ايلىعى اياسىندا وتكەن جيىنعا رەسەي جانە تاتارستان, قىتاي, ەگيپەت, وزبەكستان ەلدەرىنەن كەلگەن شەتەلدىك عالىمدار مەن ءوز ەلىمىزدەن ءتۇرلى شارۋاشىلىق سالالارىنىڭ كاسىبي ماماندارى قاتىستى. عالىمدار القالى باسقوسۋدا قوي شارۋاشىلىعىنىڭ قازىرگى جاعدايى مەن دامۋى, قازاق جىلقىسىنىڭ گەنەتيكالىق رەسۋرسىن ساقتاۋ جانە ارتۇرلىلىگىن زەرتتەۋ, قۇرىلىس سالاسىنداعى مۇمكىندىكتەر مەن ءتيىمدى باستامالار, ونەركاسىپ نىساندارىن ۇيىمداستىرۋ-تەحنولوگيالىق دايارلاۋ ءۇشىن تسيفرلىق مودەلدەردى دامىتۋ, سازدى توپىراقتا وسىرىلەتىن تروپيكالىق جەمىستەردىڭ ونىمدىلىگىنە سۋارۋدىڭ اسەرى ت.ب. سان سالالى تاقىرىپتى تالداپ, تاجىريبە الماستى.
«مەن جىلقى شارۋاشىلىعى, جەرگىلىكتى تۇقىمداردى سەلەكتسيالاۋ, گەنەتيكاسىن انىقتاۋ, ءسۇتتى باعىتتاعى جىلقىلاردى دامىتۋ بويىنشا جاڭگىر حان ۋنيۆەرسيتەتىنىڭ عالىمدارىمەن بىرگە زەرتتەۋ جۇمىسىن جۇرگىزىپ جاتىرمىن. سەلەكتسيا سالاسىندا ءبىزدىڭ دە بىرنەشە جىلدىق تاجىريبەمىز بار. ءسۇتتى باعىتتاعى جىلقىنى كوبەيتۋ ماقساتىندا گەنەتيكالىق ادىستەمەلەردى سەلەكتسياعا قوستىق. جاڭگىر حان ۋنيۆەرسيتەتى دە وسى باعىتتا ۇلكەن عىلىمي جوبانى قولعا العان. وسى ورايدا قوس تاراپ ءوز تاجىريبەمىزدى ورتاعا سالىپ, ەكى ەلدىڭ جىلقى شارۋاشىلىعىن دامىتۋعا ۇلەس قوسامىز دەگەن ويدامىن. جالپى قازاقستاندا مال شارۋاشىلىعى سالاسىنداعى عىلىمي جۇمىس جاقسى ءجۇرىپ كەلەدى. وسى باعىتتا تاڭداۋىمىز عىلىمي الەۋەتى جوعارى جاڭگىر حان اتىنداعى باتىس قازاقستان اگرارلىق-تەحنيكالىق ۋنيۆەرسيتەتىنە تۇسكەن ەدى», دەيدى قىتايدىڭ تاريم ۋنيۆەرسيتەتىنەن كەلگەن پروفەسسور, ءوز قانداسىمىز عۇنىمگۇل مۇحاتاي.
تيميريازەۆ اتىنداعى رەسەي مەملەكەتتىك اگرارلىق ۋنيۆەرسيتەتىنىڭ پروفەسسورى يۋسۋپجان يۋلداشپاەۆ تا وسىنداي حالىقارالىق دارەجەدەگى كونفەرەنتسيالار ەلدىڭ عىلىمعا دەگەن وڭ كوزقاراسىن بىلدىرەتىنىن ايتادى.
«بيىل ورال قالاسىندا ءوتىپ جاتقان حالىقارالىق عىلىمي-پراكتيكالىق كونفەرەنتسيا مەرەيتويلىق داتادا, ياعني 25-ءشى جىل قاتارىنان ءوتىپ جاتىر. ءبىز جاڭگىر حان ۋنيۆەرسيتەتىمەن كوپ جىلدان بەرى ارىپتەستىك بايلانىستامىز. وسى وقۋ ورنىنىڭ كوپتەگەن عالىمى تيميريازەۆ ۋنيۆەرسيتەتىندە كانديداتتىق ديسسەرتاتسيا قورعادى, ماگيستراتۋرادا وقىدى, عىلىمي تاعىلىمدامادان ءوتتى. كادر دايارلاۋ سالاسىنداعى جۇيەلى جۇمىسىمىز الداعى ۋاقىتتا دا جالعاسارى ءسوزسىز. سونداي-اق ءبىز جانۋارلار گەنەتيكاسى, مولەكۋلالىق-گەنەتيكالىق زەرتتەۋلەر جانە قازىرگى زامان تالابىنا سايكەس كەلەتىن جانۋارلاردىڭ جاڭا تۇرلەرى مەن تۇقىمدارىن جاساۋ سالاسىنداعى وزىق تەحنولوگيا بويىنشا ىنتىماقتا جۇمىس ىستەيمىز. نەگىزىنەن قازاقستاندا عىلىم جاقسى دامىپ كەلەدى. اسىرەسە سوڭعى جىلدارى مەملەكەت تاراپىنان عىلىمعا بارىنشا كوڭىل ءبولىنىپ وتىر», دەدى رەسەيلىك پروفەسسور.
جاڭگىر حان ۋنيۆەرسيتەتىنىڭ نەگىزگى باعىتى اگرارلىق سالا. سوندىقتان, مۇنداعى عىلىمي زەرتتەۋلەر تاقىرىبى دا اۋىل شارۋاشىلىعى جانۋارلارىنىڭ گەنەتيكاسىنا, ولاردىڭ ءارتۇرلى اۋرۋلارى مەن ەمدەۋ ءىس-شارالارىنا زەرتتەۋ جۇرگىزۋگە, جاڭا تۇقىمداردى كوبەيتۋدىڭ تاسىلدەرىن ويلاپ تاۋىپ, ءىس جۇزىندە تاجىريبەگە ەنگىزۋگە نەگىزدەلگەن. ء«بىزدىڭ عىلىمي قىزمەتكەرلەرىمىزدىڭ قاتارى جىل سايىن شەتەلدىك جەتەكشى ۋنيۆەرسيتەتتەر مەن زەرتحانالاردا, عىلىمي ورتالىقتاردا تاعىلىمدامادان ءوتىپ كەلگەن عالىمدارمەن تولىعادى» دەيدى ۋنيۆەرسيتەتتىڭ عىلىم جونىندەگى پرورەكتورى ءالجان ءشامشىدىن.
جاڭگىر حان ۋنيۆەرسيتەتىندە عىلىم ايلىعى اياسىنداعى ءىس-شارالار ءساۋىر ايىنىڭ سوڭىنا دەيىن جالعاسادى.
