ونەركاسىپ جانە قۇرىلىس ءمينيسترى ەرسايىن ناعاسپاەۆ مەملەكەت باسشىسىنىڭ ءوندىرىس كولەمىن ۇلعايتۋ مەن ءوسۋ ءۇردىسىن بەكىتۋ بويىنشا تاپسىرمالارىن ورىنداۋ اياسىندا اتقارىلىپ جاتقان جۇمىستار تۋرالى باياندادى.
بيىلعى قاڭتار-ناۋرىز ايلارىندا وڭدەۋ ونەركاسىبىندە تۇراقتى وڭ سەرپىن 8,7% دەڭگەيىندە ساقتالىپ وتىر. نەگىزگى ءوسىم ماشينا جاساۋ (17,7%), تاماق ءوندىرىسى (13,2%), ماشينالار مەن جابدىقتاردى قوسپاعاندا, دايىن مەتالل بۇيىمدارى (28,7%) سالالارىنداعى كورسەتكىشتەردىڭ ءوسۋى ارقاسىندا قامتاماسىز ەتىلگەن. سونىمەن قاتار تاۋ-كەن ونەركاسىبىندە ءوسىم (6,1%) بايقالدى.
قۇرىلىس سالاسىندا توقساندىق قورىتىندى نەگىزىندە ءوسۋ كورسەتكىشى 16,9%-عا جەتتى. مەكتەپتەر, اۆتوكولىك جولدارى, تەمىرجول جەلىلەرى, ينجەنەرلىك ينفراقۇرىلىم قۇرىلىسى بويىنشا جۇمىس كولەمىنىڭ ارتۋى تۋرالى باياندالدى.
پرەمەر-مينيستر وتاندىق وندىرىستەرمەن, ونىڭ ىشىندە ەنەرگەتيكالىق جانە كوممۋنالدىق سەكتورلاردى جاڭعىرتۋ جونىندەگى ۇلتتىق جوبانى جۇزەگە اسىرۋ شەڭبەرىندە ءوزارا ءىس-قيمىلدى ارتتىرۋ بويىنشا بىرقاتار تاپسىرما بەردى.
قر ستراتەگيالىق جوسپارلاۋ جانە رەفورمالار اگەنتتىگى ۇلتتىق ستاتيستيكا بيۋروسىنىڭ الدىن الا دەرەكتەرى بويىنشا, بيىلعى قاڭتار-ناۋرىز ايلارىندا ءجىو وتكەن جىلدىڭ سايكەس كەزەڭىمەن سالىستىرعاندا 5,8%-دى قۇرادى. ناقتى كولەم يندەكسى كولىك سالاسىندا – 21%-دى, قۇرىلىستا – 16,9%-دى, ونەركاسىپتە – 6,6%-دى, ساۋدادا – 6,3%-دى قۇرايدى.
