ەلباسى ەۋروپالىق كوميسسيانىڭ بۇرىنعى توراعاسىن قابىلدادى

استانا. 5 مامىر. ەلباسى ەۋروپالىق كوميسسيانىڭ بۇرىنعى توراعاسى جوزە مانۋەل بارروزۋدى قابىلدادى. بۇل تۋرالى akorda.kz حابارلادى. مەملەكەت باسشىسى قازاقستان مەن ەۋروپالىق وداق اراسىنداعى ءوزارا قارىم-قاتىناستى نىعايتۋعا قوسقان ەلەۋلى ۇلەسى ءۇشىن جوزە بارروزۋعا العىس ايتتى. «ەۋروپالىق كوميسسياعا ءسىز توراعالىق ەتكەن كەزدە قازاقستان مەن ەۋرووداق اراسىنداعى تاۋار اينالىمى ون ەسە ارتتى. ءسىزدىڭ پارمەندى ىقپالىڭىز, دوستىق كومەگىڭىز ارقىلى ءبىز قازاقستان مەن ەۋرووداقتىڭ كەڭەيتىلگەن سەرىكتەستىگى جانە ىنتىماقتاستىعى تۋرالى كەلىسىم جوباسىنا قاتىستى كەلىسسوزدەر اياقتالعانى جونىندەگى قۇجاتقا قول قويدىق. ەۋروپالىق وداق ءبىزدىڭ نەگىزگى ساۋدا سەرىكتەسىمىز بولىپ قالا بەرمەك», – دەدى قازاقستان پرەزيدەنتى. جوزە بارروزۋ ءوز قىزمەتىنە جوعارى باعا بەرگەنى ءۇشىن نۇرسۇلتان نازارباەۆقا ريزاشىلىق ءبىلدىرىپ, قازاقستان مەن ەۋرووداق اراسىنداعى سەرىكتەستىك بۇدان ءارى ورىستەپ, ونىڭ اياسى كەڭەيە بەرەدى دەپ ۇمىتتەنەتىنىن جەتكىزدى. «ەۋروپالىق كوميسسيانىڭ توراعاسى رەتىندە مەن قازاقستان مەن ەۋرووداق اراسىنداعى تىعىز سەرىكتەستىكتى قولداۋ ءۇشىن قاجەت بولعان بار كۇش-جىگەرىمدى سالدىم جانە ءوزىمنىڭ وعان قوسقان ۇلەسىمدى زور ماقتانىش تۇتامىن. سونداي قارىم-قاتىناس ورناتۋ ءۇشىن ءسىزدىڭ تىكەلەي اتسالىسۋىڭىز دا وتە ماڭىزدى بولدى», – دەدى ەۋروپالىق كوميسسيانىڭ بۇرىنعى توراعاسى. كەزدەسۋ بارىسىندا مەملەكەت باسشىسى حالىقتار اراسىنداعى دوستىق پەن ىنتىماقتاستىقتى نىعايتۋعا قوسقان ۇلەسى ءۇشىن جوزە بارروزۋدى II دارەجەلى «دوستىق» وردەنىمەن ماراپاتتادى. ەلامان قوڭىر. دەرەك, سۋرەت: akorda.kz.