كەزدەسۋ بارىسىندا ماۋلەن اشىمباەۆ قازاقستان مەن سەررا-لەونە اراسىندا ديپلوماتيالىق قارىم-قاتىناس ورناعالى بەرى ورتاق قۇندىلىقتار مەن مۇددەگە نەگىزدەلگەن ءوزارا سىندارلى ديالوگ قالىپتاسقانىن اتاپ ءوتتى. سۇحبات كەزىندە پارلامەنتارالىق ىنتىماقتاستىق, ونىڭ ىشىندە دوستىق توپتارىنىڭ ءوزارا ءىس-قيمىلى ەكىجاقتى بايلانىستى ودان ءارى نىعايتۋدىڭ ماڭىزدى تەتىگى ەكەنى ايتىلدى.
«پارلامەنتارالىق ديالوگ ەلدەرىمىز اراسىنداعى ىنتىماقتاستىقتى دامىتۋدا ماڭىزدى ءرول اتقارادى. افريكا ەلدەرىمەن, ونىڭ ىشىندە سەررا-لەونەمەن ىنتىماقتاستىقتى نىعايتۋ ماقساتىمەن سەناتتا دوستىق توبىن قۇردىق. ەكىجاقتى ءوزارا ءىس-قيمىلدى ارتتىرۋ جولىندا دوستىق توپتارىنىڭ الەۋەتىن ءتيىمدى پايدالانۋعا زور مۇمكىندىك بار. ءبىز الداعى ۋاقىتتا ەلدەرىمىزدىڭ پارلامەنتتەرى اراسىنداعى ىنتىماقتاستىقتى جۇيەلى جولعا قويىپ, دامىتۋعا دايىنبىز», دەپ پالاتا سپيكەرى سەررا-لەونە ەلىنە بۇۇ باس اسسامبلەياسىنىڭ «ورتالىق ازيا مەن اۋعانستان ءۇشىن ورنىقتى دامۋ ماقساتتارىنا قول جەتكىزۋ جونىندەگى بۇۇ وڭىرلىك ورتالىعى» تۋرالى قارارىن بىرلەسىپ جازعانى ءۇشىن ريزاشىلىعىن ءبىلدىردى.
سونىمەن قاتار تاراپتار قازاقستان مەن سەررا-لەونە اراسىنداعى ىنتىماقتاستىقتىڭ پەرسپەكتيۆالىق باعىتتارىنا نازار اۋدارىپ, ساۋدا-ەكونوميكالىق بايلانىستاردىڭ الەۋەتىن تولىق پايدالانۋ ماسەلەسىن تالقىلادى. وسى ورايدا ورتا ءدالىز رەتىندە بەلگىلى ترانسكاسپي حالىقارالىق كولىك مارشرۋتىنىڭ مۇمكىندىكتەرى تۋرالى ءسوز بولدى.
سۇحبات كەزىندە تاۋ-كەن ءوندىرىسى, پايدالى قازبالاردى ءوندىرۋ, ءبىلىم بەرۋ, اۋىل شارۋاشىلىعى, اقپاراتتىق تەحنولوگيالار جانە تسيفرلاندىرۋ سالالارىنداعى بىرلەسكەن جوبالاردى ىسكە اسىرۋ ماسەلەلەرىنە دە ءمان بەرىلدى.
ودان بولەك, 17-18 قىركۇيەكتە استانادا وتەتىن «دىندەر ديالوگى: بولاشاق جولىنداعى سينەرگيا» تاقىرىبىنا ارنالعان الەمدىك جانە ءداستۇرلى دىندەر كوشباسشىلارىنىڭ VIII سەزى جانە رۋحاني ديپلوماتيا ماسەلەلەرى اڭگىمەگە ارقاۋ بولدى.
