پالاتا توراعاسى يزرايل قازاقستاننىڭ تاياۋ شىعىستاعى نەگىزگى سەرىكتەسىنىڭ ءبىرى ەكەنىنە نازار اۋدارىپ, قازاقستان يزرايلمەن جان-جاقتى ىنتىماقتاستىقتى كۇشەيتۋگە مۇددەلى ەكەنىن اتاپ ءوتتى.
– 30 جىلدان اسا ۋاقىت ىشىندە قازاقستان مەن يزرايل اراسىندا جوعارى سەنىمگە نەگىزدەلگەن ساياسي ديالوگ ورناتىلدى. بۇل تۇرعىدا قازاقستان پرەزيدەنتى قاسىم-جومارت توقاەۆ پەن يزرايل پرەزيدەنتى يسااك گەرتسوگتىڭ جۋىرداعى تەلەفون ارقىلى سويلەسۋىن ەرەكشە اتاپ وتكەن ءجون. اڭگىمەلەسۋ بارىسىندا يزرايل پرەزيدەنتىنىڭ بيىل استاناعا رەسمي ساپارىن وتكىزۋ تۋرالى ۋاعدالاستىققا قول جەتكىزىلدى. بۇل قازاقستان-يزرايل ىنتىماقتاستىعىن دامىتۋداعى ماڭىزدى كەزەڭگە اينالاتىنى جانە ەلدەرىمىزدى جاقىنداستىرۋعا ەلەۋلى ۇلەس قوساتىنى ءسوزسىز, – دەدى ە.قوشانوۆ.
ءماجىلىس سپيكەرى مارتەبەلى مەيمانعا مەملەكەت باسشىسىنىڭ باستاماسىمەن ەلىمىزدە جۇرگىزىلىپ جاتقان اۋقىمدى ساياسي-ەكونوميكالىق رەفورمالاردىڭ ناتيجەلەرى تۋرالى ايتىپ بەردى.
سونىمەن قاتار تاراپتار ەكىجاقتى ارىپتەستىكتى دامىتۋدا زاڭ شىعارۋشى ورگانداردىڭ رولىنە توقتالىپ, پارلامەنتارالىق بايلانىستى تەرەڭدەتۋگە ۋاعدالاستى.
– ءبىز يزرايلمەن پارلامەنتارالىق ىنتىماقتاستىقتى كەڭەيتۋگە مۇددەلىمىز. بولاشاقتا دوستىق توپتار مەن بەيىندى كوميتەتتەر دەڭگەيىندەگى ىقپالداسۋىمىزدى ودان ءارى نىعايتۋعا شاقىرامىن, – دەدى پالاتا توراعاسى.
كەزدەسۋ بارىسىندا ساۋدا-ەكونوميكا, اۋىل شارۋاشىلىعى, IT, جاساندى ينتەللەكەت, دەنساۋلىق ساقتاۋ, سۋ رەسۋرستارىن باسقارۋ مەن مادەني-گۋمانيتارلىق سالالارداعى سەرىكتەستىك ماسەلەلەرى دە قوزعالدى.
ءوز كەزەگىندە امير وحانا مەملەكەتتەرىمىز اراسىنداعى ىنتىماقتاستىق قارقىندى دامي بەرەتىنىنە سەنىم ءبىلدىرىپ, قازاقستانمەن جاڭا تەحنولوگيا, يننوۆاتسيا سالاسىندا تاجىريبە الماسۋعا دايىن ەكەنىن ايتتى.
– بولاشاق تەحنولوگيا, يننوۆاتسيا مەن بىلىمدە ەكەنىن ءبارىمىز جاقسى تۇسىنەمىز. وسى ورايدا ەكى ەلدىڭ يگىلىگى ءۇشىن بار كۇش-جىگەرىمىزدى بىرىكتىرۋگە بولادى دەپ سانايمىز. سىزدەرمەن جيعان بىلىمىمىزبەن, يدەيالارىمىزبەن جانە تەحنولوگيالارىمىزبەن بولىسۋگە دايىنبىز, – دەدى ا.وحانا.
كەزدەسۋ سوڭىندا تاراپتار مۇنداي ساپارلار ەلدەرىمىزگە ەكىجاقتى ىنتىماقتاستىقتى, حالىقتارىمىز اراسىنداعى دوستىق پەن پارلامەنتارالىق بايلانىستى نىعايتۋعا مول مۇمكىندىك بەرەتىنىن اتاپ ءوتتى.
