كەزدەسۋگە سونىمەن قاتار, تۇركى مەملەكەتتەرى ۇيىمىنىڭ باس حاتشىسى كۋبانىچبەك ومىراليەۆ, ددۇ ەۋروپاداعى وڭىرلىك بيۋروسىنىڭ ديرەكتورى حانس كليۋگە قاتىستى. دەنساۋلىق ساقتاۋ مينيسترلەرىنىڭ 5-كەزدەسۋىنىڭ قورىتىندىسى بويىنشا دەنساۋلىق ساقتاۋ ءمينيسترى اقمارال ءالنازاروۆا بايانداما جاسادى.
تاجىريبە الماسۋدى جانە زاماناۋي مەديتسينالىق تەحنولوگيالار ترانسفەرىن قوسا العاندا, قازاقستاننىڭ ۇيىممەن ءوزارا ءىس-قيمىلىن كەڭەيتۋ جونىندەگى جوسپارلار تالقىلاندى, قازاقستاننىڭ جانە باسقا سەرىكتەس ەلدەردىڭ دەنساۋلىق ساقتاۋدى دامىتۋ جونىندەگى ۇسىنىستارى قارالدى.
كەزدەسۋ بارىسىندا دەنساۋلىق ساقتاۋ سالاسىنداعى جاھاندىق سىن-قاتەرلەرگە جاۋاپ رەتىندە تمۇ-عا قاتىسۋشى مەملەكەتتەردىڭ كۇش-جىگەرىن شوعىرلاندىرۋدىڭ ماڭىزدىلىعىنا نازار اۋدارىلدى. پرەمەر-مينيستر تەك ۇيلەستىرىلگەن ءىس-قيمىلدار مەن تىعىز ارىپتەستىك حالىقتىڭ دەنساۋلىعىنا تونگەن اۋقىمدى قاۋىپ-قاتەرلەرگە ءتيىمدى جاۋاپ بەرۋگە مۇمكىندىك بەرەتىنىن اتاپ ءوتتى.
«مەملەكەت باسشىسى قاسىم-جومارت توقاەۆ مەديتسينالىق كومەكتىڭ ساپاسى مەن قولجەتىمدىلىگىن ارتتىرۋ ماسەلەلەرىنە ەرەكشە نازار اۋدارادى. قازىرگى ۋاقىتتا ءبىز دەنساۋلىق ساقتاۋ جۇيەسىن بەلسەندى تۇردە جاڭعىرتىپ جاتىرمىز: ينفراقۇرىلىمدى جاقسارتۋ, كوپسالالى اۋرۋحانالار سالۋ, ولاردى زاماناۋي جابدىقتارمەن قامتاماسىز ەتۋ جانە فارماتسەۆتيكا ونەركاسىبىن نىعايتۋ بويىنشا اۋقىمدى جوبالار ىسكە اسىرىلۋدا. ءبىزدىڭ باستامالارىمىزعا دۇنيەجۇزىلىك دەنساۋلىق ساقتاۋ ۇيىمى ايتارلىقتاي قولداۋ كورسەتىپ وتىر. تىنىس الۋ ورگاندارى مەن قان اينالىمى جۇيەسى اۋرۋلارىنىڭ ازايۋى جانە ءولىم-ءجىتىمنىڭ تومەندەۋى – تەحنيكالىق جانە ساراپشىلىق قولداۋعا نەگىزدەلگەن ءبىزدىڭ بىرلەسكەن جوسپارلى جۇمىسىمىزدىڭ ناتيجەسى. ءبىز ءوز تاجىريبەمىزبەن بولىسۋگە دايىنبىز, سونداي-اق زاماناۋي مەديتسينالىق تەحنولوگيالار ترانسفەرتىن كەڭەيتۋگە مۇددەلىمىز», دەپ اتاپ ءوتتى و.بەكتەنوۆ.
جيىن بارىسىندا سەرىكتەس ەلدەردىڭ دەنساۋلىق ساقتاۋ مينيسترلەرى قازاقستاننىڭ مەديتسينالىق كومەك كورسەتۋ ساپاسىن جاقسارتۋ سالاسىنداعى جەتىستىكتەرىن اتاپ ءوتتى. الداعى ەكى جىلدا مساك-تى دامىتۋ, تج جاعدايىندا مەديتسينالىق كومەك كورسەتۋ, تۋبەركۋلەزبەن جانە وزگە دە اۋرۋلارمەن كۇرەس, فارماكولوگياداعى, اتاپ ايتقاندا, ماجارستاننىڭ ءتيىستى مەملەكەتتىك ورگاندارىمەن كووپەراتسيا, سۋ گيگيەناسىن دامىتۋ جانە باسقا دا ىنتىماقتاستىقتى نىعايتۋ تاقىرىبى بولىپ سانالادى.
دۇنيەجۇزىلىك دەنساۋلىق ساقتاۋ ۇيىمىمەن ءوزارا ءىس-قيمىل ددۇ ەۋروپاداعى وڭىرلىك بيۋروسى مەن قازاقستان رەسپۋبليكاسى دەنساۋلىق ساقتاۋ مينيسترلىگى اراسىنداعى ەكى جىلدىق ىنتىماقتاستىق كەلىسىمدەرىن ىسكە اسىرۋ شەڭبەرىندە جۇزەگە اسىرىلادى. 2024–2025 جىلدارعا ارنالعان تاراپتار بىرلەسكەن جۇمىستىڭ نەگىزگى باعىتتارىن, ونىڭ ىشىندە مەديتسينالىق قىزمەتتەرمەن جالپىعا بىردەي قامتۋ, توتەنشە جاعدايلارعا دايىندىق, جۇقپالى ەمەس اۋرۋلاردىڭ الدىن الۋ جانە «بىرىڭعاي دەنساۋلىق» ءتاسىلىن ەنگىزۋدى ايقىندادى.
كەزدەسۋ بارىسىندا ددۇ ەۋروپاداعى وڭىرلىك بيۋروسىنىڭ ديرەكتورى حانس كليۋگە الدىن الۋ شارالارىنىڭ كەڭ اۋقىمىنىڭ ناتيجەسىندە سوزىلمالى ينفەكتسيالىق ەمەس اۋرۋلاردان مەزگىلسىز ءولىم-ءجىتىمدى تومەندەتۋ بويىنشا قازاقستاننىڭ جەتىستىكتەرىن اتاپ ءوتتى. سونداي-اق مساك دامىتۋ سالاسىنداعى ىنتىماقتاستىقتى ارتتىرۋ جوسپارلارى ايتىلدى.
2024 جىلدىڭ قورىتىندىسى بويىنشا قازاقستاننىڭ دەنساۋلىق ساقتاۋ سالاسىنا سالىنعان ينۆەستيتسيا كولەمى 8,4%-عا ءوسىپ, شامامەن 920 ملن دوللارعا جەتتى, ونىڭ ۇشتەن ءبىرى جەكە سەكتورعا تيەسىلى. سونىمەن قاتار فارماتسەۆتيكا سالاسىنا تارتىلعان ينۆەستيتسيا كولەمى 2 ەسەگە جۋىق ءوسىپ, 91,3 ملن دوللاردى قۇرادى. مەملەكەت باسشىسىنىڭ تاپسىرماسىن ورىنداۋ اياسىندا جىل سايىن وتاندىق وندىرىستەگى دارىلىك زاتتاردىڭ ۇلەسى ارتىپ كەلەدى, 2029 جىلعا قاراي ول 50%-عا جەتەدى دەپ جوسپارلانىپ وتىر.
تۇركى مەملەكەتتەرى ۇيىمى دەنساۋلىق ساقتاۋ مينيسترلەرىنىڭ 5-كەزدەسۋىنىڭ ناتيجەسىندە دەنساۋلىق ساقتاۋ ماسەلەلەرى بويىنشا تۇركى مەملەكەتتەرىنىڭ ۇيىمى ەلدەرىنىڭ دەكلاراتسياسىنا, دەنساۋلىق ساقتاۋ سالاسىنداعى بىرلەسكەن ءىس-قيمىل جوسپارىنا, كادرلار دايارلاۋ, بيولوگيالىق قاۋىپسىزدىك بويىنشا ىنتىماقتاستىق تۋرالى مەموراندۋمدارعا جانە باسقا دا قۇجاتتارعا قول قويدى.
