سۋرەت: qazradio.fm
وتاندىق ەت وڭدەۋ ونەركاسىبىنە سەمەي قالاسىنىڭ بەرگەن ەنشىسى مول. مۇنى ءتىپتى سەمەيلىكتەردىڭ اتاكاسىبى دەۋگە دە بولاتىن شىعار. ويتكەنى ەت كومبيناتى سەمەيدە بۇگىن عانا اشىلىپ وتىرعان جوق. ەت يندۋسترياسىندا تاريح تا, تاجىريبە دە مول. باياعى سەمەي ەت كومبيناتى 1934 جىلدارى اشىلىپ, ەل يگىلىگىنە جاراعان. كاسىپورىننىڭ ونىمدىلىگى ءوسىپ, سوعىس جىلدارى كەڭەس وداعى كولەمىندە ءۇشىنشى ورىنعا شىققان. كومبينات ونىمدەرى وداقتىڭ تۇكپىر-تۇكپىرىنە ءارى شەتەلگە ەكسپورتتالدى. سەمەيدىڭ بۇقتىرىلعان ەتى پولشا, ماجارستان, رۋمىنيا, چەحوسلوۆاكيا, كۋبا ەلدەرىندە تانىمال بولدى. سول كەزدىڭ وزىندە كاسىپورىندا 10 مىڭنان اسا ادام جۇمىس ىستەپ, قالا مەن ماڭايداعى حالىقتىڭ الەۋمەتتىك جاعدايىنىڭ جاقسارۋىنا سەپتىگىن تيگىزگەن. الايدا نارىقتىق قاتىناستارعا ءوتۋ كەزەڭىندە بۇل سالانىڭ شارۋاسى ءبىراز شاتقاياقتاپ قالدى دا, 2000 جىلدارى توقىراۋعا ۇشىرادى.
وسى ءبىر ولقىلىقتىڭ ورنىن تولتىرۋ ماقساتىندا جەرگىلىكتى بيلىك اتاكاسىپتى قايتا جانداندىرۋدى قولعا الدى. وبلىس اكىمى بەرىك ءۋالي سەمەي قالاسىندا ەت كومبيناتىن سالۋدى جوسپارلاپ وتىرعان ينۆەستورلارمەن كەزدەستى. «Eurasia Agro Semey» جشس قۇرىلتايشىلارى ايماق باسشىسىنا جوبالاعان جۇمىستارىن تانىستىردى. كاسىپكەرلەر جاڭاسەمەي اۋدانىندا قۋاتتىلىعى اۋىسىمىنا 35 توننا ەت پەن ەت ونىمدەرىن قايتا وڭدەۋگە مۇمكىندىك بەرەتىن اۋقىمدى ينۆەستيتسيالىق جوبانى جۇزەگە اسىرۋدى كوزدەپ وتىر ەكەن. اۋستراليانىڭ زاماناۋي تەحنولوگياسىمەن جابدىقتالاتىن ەت كومبيناتى جوباسىنىڭ قۇنى – 8,4 ملرد تەڭگە.
كاسىپورىن ىسكە قوسىلعان كۇنى سەمەي حالقىنىڭ ەكونوميكالىق-الەۋمەتتىك جاعدايىنىڭ جاقسارا تۇسەتىنى ءسوزسىز. ويتكەنى كومبينات جۇمىسىن باستاعاندا وندا 250 ادام تۇراقتى جۇمىسپەن قامتىلادى. كومبيناتتا اۋىسىمىنا 200 باس ءىرى قارا مال مەن 1 400 باس ۇساق مال سويۋعا بولادى. جىلىنا 12 600 تونناعا دايىن ءونىم ءوندىرىلىپ, شەت مەملەكەتتەرگە دە ەكسپورتتالماق. جوبا اياسىندا 50 مىڭ قوي, 200 باس جىلقى جانە 200 باس ءىرى قارا مالعا ارنالعان بورداقىلاۋ الاڭدارىن قۇرۋ كوزدەلىپ وتىر.
«اباي وبلىسىندا اۋىل شارۋاشىلىعى, ونىڭ ىشىندە مال شارۋاشىلىعى ەجەلدەن جاقسى دامىعان. ايماقتىڭ اگرارلىق الەۋەتى زور. وڭىردە مال وسىرۋمەن اينالىساتىن كوپتەگەن شارۋا قوجالىعى بار. ولار قازىر وسىرگەن مالدارىن وتكىزە الماي قينالىپ ءجۇر. سەمەيدە ءىرى ەت كومبيناتى سالىنسا, وبلىستىڭ مال شارۋاشىلىعى سالاسىنا سەرپىن بەرەدى. اكىمدىك تاراپىنان بارلىق قاجەتتى قولداۋدى كورسەتەمىز. سونداي-اق كاسىپورىندى مالمەن قامتاماسىز ەتۋ ءۇشىن اۋدانداردا مال بورداقىلاۋ الاڭدارىنىڭ سانىن كوبەيتەمىز. بۇل ءوز كەزەگىندە شارۋالارعا دا, ەت كومبيناتىنا دا ءتيىمدى بولادى», دەدى وبلىس اكىمى.
«Eurasia Agro Semey» جشس قۇرىلتايشىلارى اعايىندى سايلاۋ, ەرلان مۇقاشەۆتار كەزدەسۋدە قۇرىلىستى باستاۋعا دايىن ەكەندەرىن جەتكىزدى. ايماق باسشىسى مامىر ايىندا كاسىپورىننىڭ ىرگەتاسىن قالاۋ شاراسىن وتكىزۋگە ۋاعدالاستى.
ساراپشىلاردىڭ ايتۋىنشا, ەلىمىزدە زاماناۋي ەت كومبيناتى پايدا بولماي, مال شارۋاشىلىعىن دامىتۋ تۋرالى كەز كەلگەن باعدارلاما ناتيجە بەرمەيدى. باستاما وڭىردەگى مال شارۋاشىلىعىنىڭ قارقىندى دامۋىنا دا ىقپال ەتپەك. جەرگىلىكتى فەرمەرلەر مەن مال وسىرۋشىلەرگە تۇراقتى نارىق قالىپتاسىپ, ءتىپتى جاقىن ايماقتار قىزىعۋشىلىق تانىتۋى مۇمكىن.
اباي وبلىسى
