سەمەي قالاسىندا وتكەن تازالىق شارالارىنا وبلىس اكىمى بەرىك ءۋالي قاتىستى. ايماق باسشىسى 4 ساۋىردە وبلىس تۇرعىندارىنا ارنايى ۇندەۋ جولداپ, جالپىوڭىرلىك تازالىق اكتسياسى باستالعانىن جاريا ەتتى. ءوڭىردىڭ بارلىق قالا, اۋداندارىندا, ەلدى مەكەندەرىندە جاپپاي سەنبىلىك ۇيىمداستىرىلدى. تۇرعىندار اۋماقتاردى كۇل-قوقىستان تازارتىپ, كوشە, الاڭ, اۋلالاردى رەتكە كەلتىردى.
سەمەيدەگى سەنبىلىككە 20 مىڭنان استام ادام قاتىسىپ, 1000 تەكشە مەتردەن استام قوقىس پوليگونعا شىعارىلدى. ماقانشى اۋدانىندا دا اۋقىمدى سەنبىلىك ۇيىمداستىرىلدى. وعان 3 مىڭ ادام قاتىسىپ, 2 مىڭعا جۋىق اعاش كوشەتى وتىرعىزىلدى. بەسقاراعاي اۋدانىنداعى تازالىق شاراسىنا 300-گە جۋىق تۇرعىن قاتىسىپ, اۋىل كوشەلەرى تازارتىلدى, 1 مىڭعا جۋىق كوشەت وتىرعىزىلدى. كوكپەكتى اۋدانىنداعى تازالىق اكتسياسىنا 1 مىڭعا جۋىق ادام, 30 ارنايى تەحنيكا تارتىلىپ, 20 تونناداي قوقىس شىعارىلدى. اباي اۋدانىنىڭ قاراۋىل اۋىلىندا 300-دەن استام مەكەمە قىزمەتكەرلەرىنىڭ قاتىسۋىمەن جاپپاي سەنبىلىك ءوتتى, 15 توننا قوقىس شىعارىلدى. كۋرچاتوۆتاعى جالپىقالالىق سەنبىلىكتە تۇرعىندار جاياۋ جۇرگىنشىلەر جولدارىن سىپىرىپ, كوگالداردى تازارتتى. 1 000 قاپتان استام قوقىس سىرتقا شىعارىلدى. اياگوز قالاسىنىڭ تۇرعىندارى دا بەلسەندىلىك تانىتتى. سەنبىلىككە 3 مىڭنان استام ادام قاتىسىپ, قالانىڭ ورتالىق كوشەلەرى, ساياباقتارى, اۋلالارى مەن قوعامدىق ورىندارىن كۇل-قوقىستان تازارتتى.
تازالىق اكتسياسى جىل بويى جالعاسادى. اكىمنىڭ ۇندەۋىندە ايتىلعانداي, اكتسيا بارىسىندا ارنايى بايقاۋ جاريالانىپ, «ۇزدىك اۋدان», «ۇزدىك اۋىل», «ۇزدىك اۋلا», «ۇزدىك ۋنيۆەرسيتەت», «ۇزدىك كوللەدج», «ۇزدىك مەكتەپ», «ۇزدىك بالاباقشا», «ۇزدىك كوشە», «ۇزدىك مەكەمە», تاعى باسقا اتالىمدار بويىنشا تازالىق جاناشىرلارى انىقتالادى. جىل سوڭىندا جەڭىمپازدارعا قوماقتى سىيلىقتار تابىستالادى.
اباي وبلىسى
