چەمپيوناتقا 11 كوللەدجدەن 300-دەن استام ءبىلىم الۋشى قاتىسىپ, 64 قۇزىرەت بويىنشا ءوز كاسىپتىك داعدىلارىن كورسەتۋدە. بۇل بايقاۋ WorldSkills حالىقارالىق قوزعالىسىنىڭ ءبىر بولىگى بولىپ تابىلادى, باستى ماقساتى جۇمىسشى ماماندىقتارىن ناسيحاتتاۋ جانە كاسىپتىك دايارلىق ستاندارتتارىن دامىتۋ.
ءىس-شارانىڭ وتۋىنە ء بىلىم الۋشىلار بەلسەنە قاتىسىپ, تانىم كوكجيەگىن كەڭەيتىپ جاتىر. شىنتۋايتىندا, ءوڭىرلىك چەمپيونات قازىرگى زاماننىڭ تالاپتارىنا سايكەس كاسىپتىك ءبىلىم دامۋىنىڭ ماڭىزدى كەزەڭى بولىپ سانالادى. بيىل جاڭا قۇزىرەتتەر قوسىلىپتى. مىسالى, «كيىم ديزاينى», «زووتەحنييا» جانە «1س پلاتفورماسىندا بيزنەس-پروتسەستەردى اۆتوماتتاندىرۋ» سياقتى سالالار ەنگىزىلدى. سونىمەن قاتار, «AbilympicSkills» قۇزىرەتتەرى بويىنشا بايقاۋلار دا وتكىزىلەدى, ولار مۇمكىندىگى شەكتەۋلى ستۋدەنتتەر ءۇشىن ۇيىمداستىرىلادى.
«ۆەتەريناريا», «زووتەحنيا», «استىق جانە ونى قايتا وڭدەۋ ونىمدەرىنىڭ ساپاسىن انىقتاۋ», «حورەوگرافيا» جانە «قۇتقارۋ جۇمىستارى» قۇزىرەتتەرى بويىنشا استانا قالاسى, تۇركىستان, قاراعاندى, قوستاناي, ماڭعىستاۋ, سولتۇستىك قازاقستان, باتىس قازاقستان وبلىستارى ءتارىزدى 7 ءوڭىردىڭ وكىلدەرى قاتىسۋدا.
جەڭىمپازداردى باعالاۋدا وندىرىستىك وقىتۋ شەبەرلەرى مەن ءىرى ءوندىرىس كومپانيالارىنىڭ وكىلدەرى, اتاپ ايتقاندا, «كاماز تسەنتر-سەرۆيس», «اقاي» ءسان ءۇيى, «ەل-نۋر سەرۆيس» سەرىكتەستىكتەرى مەن «تىنىس» اكتسيونەرلىك قوعامى جانە باسقا دا كومپانيالار قاتىسۋدا.
