فرانكوفونيا كوكتەمى - فرانتسۋز ءتىلى مەن فرانكوفونيا مادەنيەتتەرىنىڭ الۋان تۇرلىلىگىنە ارنالعان مادەنيەتتىڭ كوپسالالى فەستيۆالى. ورتالىق كوممۋنيكاتسيالار الاڭىندا وتكەن بريفينگتە ارمەنيانىڭ ەلىمىزدەگى توتەنشە جانە وكىلەتتى ەلشىسى ارمەن گەۆونديان فرانكوفونيا كوكتەمىنىڭ 15-ماۋسىمى مادەني-گۋمانيتارلىق سيپاتتاعى كەزەكتى وقيعا ەمەس ەكەندىگىن, ەلىمىزدە جىل سايىن فرانتسۋز ءتىلى مەن مادەني الۋاندىعىن ىلگەرىلەتۋ, ءبىلىم بەرۋ مەن قايتا دايارلاۋدى ىنتالاندىرۋ, مادەنيەتتەر مەن وركەنيەتتەر ديالوگىن جانداندىرۋ توڭىرەگىندە ەلدەر مەن حالىقتاردى بىرىكتىرۋگە, ىنتىماقتاستىقتى نىعايتۋعا باعىتتالعان ءىس-شارالار وتكىزىلەتىنىن اتاپ ءوتتى.
«فرانكوفونيا – بۇل حالىقتارعا مادەنيەتتى تەرەڭىرەك قابىلداۋعا مۇمكىندىك بەرەتىن, سول ارقىلى مەملەكەتارالىق ىنتىماقتاستىق پاليتراسىن بايىتاتىن مادەنيەتتەر, داستۇرلەر, ەرەكشە ادەت-عۇرىپتاردىڭ تىعىز توعىسۋى. سوڭعى جىلدارى ارمەنيا مەن حالىقارالىق فرانكوفونيا ۇيىمى اراسىنداعى ىنتىماقتاستىق جاڭا سەرپىن الدى. ارمەنيادا فرانكوفونيانىڭ ونىنشى سپورتتىق جانە مادەني ويىندارىنا دايىندىق ءجۇرىپ جاتىر, ونى 2027 جىلى 23 شىلدەدەن 1 تامىزعا دەيىن ەرەۆاندا وتكىزۋ جوسپارلانعان. بۇل فرانكوفونيا ەلدەرىمەن دوستىق قارىم-قاتىناستى نىعايتىپ قانا قويماي, ارمەنيادا فرانتسۋز ءتىلىنىڭ تارالۋىنا ەلەۋلى ۇلەس قوسۋ ءۇشىن ۇيىمداستىرىلماق», دەدى ارمەنيا ەلشىسى.
ارمەن گەۆوندياننىڭ ايتۋىنشا, بيىل استانا, الماتى, قاراعاندى جانە شىمكەنتتە كورنەكتى ارميان رەجيسسەرى سەرج اۆەديكياننىڭ «كۇتكەن ادام» ءفيلمىنىڭ كورسەتىلىمى ۇيىمداستىرىلادى.
بەلگيانىڭ قازاقستانداعى توتەنشە جانە وكىلەتتى ەلشىسىنىڭ ورىنباسارى انتۋان بينامە فەستيۆال اياسىندا وڭىرلەردە فرانكوفوندىق كينو اپتالىعى وتەتىنىن ايتتى.
ء«بىز بەلگيالىق فيلمدەردىڭ كورسەتىلىمدەرىن ۇيىمداستىرىپ جاتىرمىز. استانا مەن الماتىدا «ومەن» ءفيلمى كورسەتىلەدى. قاراعاندىدا «جيۋلي نەگە ۇندەمەيدى» ءفيلمىن كورەرمەنگە ۇسىنامىز. 18 ساۋىردە الماتىدا قازاق جانە فرانتسۋز تىلىندەگى ادەبيەتكە ارنالعان ءىس-شارا وتەدى. بەلگيالىق اۆتورلار مەن يلليۋستراتورلار ەلەن دەلفورج كەنتەن گرەبان ونلاين رەجيمىندە يلليۋستراتسيالانعان كىتاپتار جاساۋ تاجىريبەلەرىمەن بولىسەدى. وسى ءىس-شارا اياسىندا قاراعاندىدا «كوميكستەر ارقىلى بەلگيا بويىنشا ساياحات» كورمەسىن تاماشالاۋعا بولادى. سونداي-اق «اناشىم» اتتى كىتاپتى قازاق تىلىندە ۇسىنامىز», دەدى انتۋان بينامە.
ال ليتۆا رەسپۋبليكاسىنىڭ ەلىمىزدەگى توتەنشە جانە وكىلەتتى ەلشىسى ەگيديۋس ناۆيكاس ليتۆا 1999 جىلدان بەرى حالىقارالىق فرانكوفونيا ۇيىمىنىڭ باقىلاۋشى مۇشەسى ەكەنىن اتاپ ءوتتى. فرانتسۋز ءتىلى - ليتۆادا ەڭ كوپ تارالعان ءتورتىنشى ءتىل. ەلدە فرانتسيامەن مادەني ىنتىماقتاستىقتىڭ جوعارى دەڭگەيى بايقالادى.
«مەن ءۇشىن «فرانكوفونيا كوكتەمىنە» قاتىسۋ زور مارتەبە. ەل تۇرعىندارىن ءىس-شارالارعا قاتىسۋعا, فيلمدەر كورۋگە, گاسترونوميالىق ءىس-شارالارعا قاتىسۋعا شاقىرامىن. كوپتەگەن قىزىقتى جانە جاعىمدى دۇنيەلەرمەن تانىسۋعا مۇمكىندىك بار», دەدى ەلشى.
فرانتسۋز ءتىلى سويلەيتىندەر سانى بويىنشا الەمدە 5-ءشى ورىندا تۇر. 29 ەلدە جانە حالىقارالىق ۇيىمداردا بۇۇ, ناتو, ەو, حالىقارالىق كوميتەت, يسلام ىنتىماقتاستىعى ۇيىمى سياقتى رەسمي ءتىل مارتەبەسىنە يە, بۇل فرانتسۋز ءتىلىنىڭ ۇلكەن ديپلوماتيالىق ارتۇرلىلىگىن كورسەتەدى.
«قازاقستانداعى فرانتسۋز ءتىلىنىڭ مارتەبەسىنە كەلەتىن بولساق, بۇگىنگى تاڭدا فرانتسيا ەلشىلىگى 11 مىڭ وقۋشىعا فرانتسۋز ءتىلىن وقىتۋدى قولدايدى. اتاپ ايتقاندا, ەلشىلىك استانا, الماتى, قاراعاندى جانە اقتاۋ قالالارىندا ەكى ءتىلدى سەكتسيالار قۇرىلعان ءتورت مەكتەپتە جۇمىس ىستەيدى. سونداي-اق ءبىز استانا, الماتى, قاراعاندى جانە شىمكەنتتەگى مادەني ورتالىقتارىمىز, فرانتسۋز اليانستارىمەن ىنتىماقتاستىق ورناتتىق. سونىمەن قاتار استانا مەن الماتىدا ەكى فرانتسۋز مەكتەبىن اشۋ جوباسى بويىنشا جۇمىس ىستەپ جاتىرمىز. بۇل مەكتەپتەر مۇمكىندىگىنشە تەز اشىلادى دەگەن ۇمىتتەمىز», دەدى فرانتسيانىڭ قازاقستانداعى توتەنشە جانە وكىلەتتى ەلشىسى سيلۆان گيوگە.
