ماۋلەن اشىمباەۆ كنەسسەت سپيكەرىنە ءىلتيپات ءبىلدىرىپ, قازىرگى تاڭدا قازاقستان مەن يزرايل اراسىنداعى قارىم-قاتىناس كوپتەگەن سالادا قارقىندى دامىپ كەلە جاتقانىن اتاپ ءوتتى. سونداي-اق ول جوعارى دەڭگەيدە سىندارلى ساياسي ديالوگ جولعا قويىلعانىن ايتىپ, يزرايل پرەزيدەنتىنىڭ استاناعا جاسايتىن الداعى رەسمي ساپارى ەكى ەلدىڭ بايلانىسىن ءارى قاراي دامىتۋعا سەرپىن بەرەتىنىنە سەنىم ءبىلدىردى.
كەزدەسۋدە مەملەكەت باسشىسى قاسىم-جومارت توقاەۆتىڭ باستاماسىمەن قازاقستاندا جۇرگىزىلىپ جاتقان الەۋمەتتىك-ەكونوميكالىق جانە ساياسي رەفورمالاردىڭ ىسكە اسىرىلۋ بارىسىنا دا باسا ءمان بەرىلدى. يزرايل كنەسسەتىنىڭ سپيكەرى امير وحانا اتالعان رەفورمالاردىڭ ناتيجەلەرىن جوعارى باعالاپ, بارلىق باعىت بويىنشا بايلانىستى كەڭەيتۋگە مۇددەلى ەكەنىن جەتكىزدى.
سونىمەن قاتار سەنات توراعاسى پارلامەنتارالىق ىنتىماقتاستىقتى ودان ءارى جانداندىرۋدىڭ ماڭىزىنا نازار اۋدارىپ, الداعى ۋاقىتتا زاڭ شىعارۋ سالاسىنداعى ءوزارا ءىس-قيمىلدى دامىتۋ ماسەلەلەرىنە توقتالدى.
«قازاقستان پرەزيدەنتى قاسىم-جومارت كەمەل ۇلى توقاەۆتىڭ باستاماسىمەن ەلىمىزدە ۇلتتىق ەكونوميكانى ارتاراپتاندىرۋعا جانە ينۆەستيتسيالىق احۋالدى جاقسارتۋعا ارنالعان اۋقىمدى رەفورمالار جۇرگىزىلىپ جاتىر. وسى ورايدا ءبىز يزرايل كنەسسەتىمەن يننوۆاتسيالىق دامۋ, سۋ رەسۋرستارىن باسقارۋ, اۋىل شارۋاشىلىعى جانە تاعى باسقا سالالاردا زاڭ شىعارۋ باعىتتارى بويىنشا تاجىريبە الماسۋعا مۇددەلىمىز. مۇنداي ناقتى قادام سەنات پەن كنەسسەتتىڭ سالالىق كوميتەتتەرى مەن دوستىق توپتارى اراسىندا تۇراقتى بايلانىس ورناتۋعا جول اشاتىنى انىق. سوندىقتان الداعى ۋاقىتتا ەكى ەل دەپۋتاتتارى اراسىنداعى ديالوگتى جۇيەلى تۇردە جالعاستىرامىز دەپ سەنەمىز», دەدى ماۋلەن اشىمباەۆ.
كەزدەسۋ بارىسىندا سۇحباتتاسۋشىلار بىرلەسكەن جوبالاردى دا تالقىلادى. اتاپ ايتقاندا, اۋىل شارۋاشىلىعىن جانە اگروونەركاسىپتىك سەكتوردى دامىتۋ, زاماناۋي جىلىجاي كەشەندەرىن جانە تامشىلاتىپ سۋارۋ جۇيەلەرىن وندىرەتىن زاۋىت سالۋ, سونداي-اق, سۋ ينفراقۇرىلىمىن جاڭعىرتۋ باعىتىنداعى جوبالاردى ىسكە اسىرۋدا ءوزارا جاردەمدەسۋ ماسەلەلەرى ءسوز بولدى.
بۇدان باسقا, تاراپتار الەمدىك جانە ءداستۇرلى دىندەر كوشباسشىلارىنىڭ «دىندەر ديالوگى: بولاشاق جولىنداعى سينەرگيا» تاقىرىبىنا ارنالعان VIII سەزىنە توقتالىپ, اتالعان فورۋمنىڭ كۇن تارتىبىندەگى باسىم باعىتتاردىڭ وزەكتىلىگىن تالقىلادى.
