بىراق بۇل ەكونوميكاسى ءوسىپ كەلە جاتقان مەملەكەتتىڭ كاسىپورىندارىن جاڭاشا كادرلارمەن قامتاماسىز ەتۋگە جەتكىلىكسىز ەدى. سوندىقتان رەسپۋبليكادا ءدۋالدى وقىتۋ جۇيەسى قۇرىلدى. ونىڭ ارتىقشىلىعى ۋنيۆەرسيتەت, تەحنيكالىق كوللەدجدە وقيتىن ستۋدەنت تەوريالىق بىلىممەن بىرگە كاسىپورىندا وندىرىستىك پراكتيكادان ءوتىپ, اۋديتوريادا العان ءىلىمىن تاجىريبەمەن ۇشتاستىرا ءبىلدى. ونىڭ ۇستىنە وقۋ ورىندارى زاماناۋي قوندىرعى, ستانوكتاردى مەڭگەرگەن مامان دايارلاۋدا تالاپ ۇدەسىنەن تولىق شىعا المادى. وسى ولقىلىقتىڭ ورنىن تولتىرۋ ءۇشىن دە تەوريا مەن تاجىريبەنى قاتار ورگىزگەن باعدارلاما ەلىمىزدىڭ ءبىلىم جۇيەسىنە ەنگىزىلدى.
اسىرەسە ەكونوميكالىق ءوسىم ديناميكاسى رەسپۋبليكانىڭ وڭىرلەرى اراسىندا جوعارى قارقىن الا باستاعان شىمكەنتتە ءدۋالدى وقىتۋ جۇيەسىنىڭ پايداسى جاقسى سەزىلىپ جاتىر. مەگاپوليس جاستار قالاسى. دەموگرافيالىق احۋالدىڭ وڭ ناتيجەسىنىڭ ارقاسىندا شاھاردا حالىق سانى جىلدان-جىلعا ءوسىپ كەلەدى. بۇل ءوز كەزەگىندە جاستاردان قۇرالعان جۇمىسشىلار ارمياسىنىڭ قاتارىن ارتتىرىپ وتىر. جىل سايىن مىڭداعان بالا تەحنيكالىق ماماندىق بويىنشا وقۋ ءبىتىرىپ شىعادى. ولاردى جۇمىسقا ورنالاستىرۋدىڭ ءوزى وڭاي شارۋا ەمەس. دەگەنمەن وقۋ ورىندارىنىڭ باسشىلىعى سوعان مۇرىندىق جاساپ, كاسىپورىندارمەن تىعىز بايلانىستا جۇمىس ىستەپ كەلەدى. بۇل ءبىر جاعىنان وقۋ ورىندارىنىڭ ساپاسىن انىقتايتىن رەيتينگ ءۇشىن دە كەرەك.
پرەزيدەنت قاسىم-جومارت توقاەۆتىڭ جاڭا جۇمىس ورىندارىن قۇرۋ, ەڭبەك نارىعىن قاجەتتى ماماندىقتارمەن قامتاماسىز ەتۋ بويىنشا قويعان ناقتى تالابى بار. وسى تاپسىرمانى ورىنداۋ ماقساتىندا قالا اكىمدىگى شاھارداعى 40 كوللەدج ديرەكتورلارىمەن ماسەلەنى تالقىلاپ, شەشۋ جولدارىن زەردەلەدى. الدىن الا جۇرگىزىلگەن زەرتتەۋ ناتيجەسىندە شىمكەنتتە مادەنيەت وشاقتارىندا دەكوراتسيا ازىرلەۋشى, بۋتافورا جاساۋشى, دىبىس, جارىق قوياتىن ماماندار جەتىسپەيتىنى انىقتالدى. اتالعان ماماندىقتار تاپشىلىعىن جويۋ ءۇشىن جەرگىلىكتى اتقارۋشى بيلىك قاستەەۆ اتىنداعى كوركەمسۋرەت پەن ساز كوللەدجىنە ارنايى تاپسىرما بەردى. سوعان سايكەس اتالعان وقۋ ورىندارى الداعى كەزدە مادەنيەت وشاقتارىنا قاجەتتى قوسىمشا جۇمىسشى ماماندىقتارىن وقىتۋعا كىرىسەدى. سونىمەن بىرگە اكىمدىك تاراپىنان تەحنيكالىق ماماندىقتارعا بولىنەتىن گرانت سانى كوبەيتىلەدى. جانە قالا بيلىگى جۇرگىزگەن كەلىسسوزدەر اياسىندا بىرنەشە كاسىپكەر 53 ستۋدەنتتى وزدەرىنىڭ ەسەبىنەن تەگىن وقىتىپ, جۇمىسقا ورنالاستىرۋعا ۋاعدالاستى.
وڭىرلىك كاسىپكەرلەر پالاتاسى جىل سايىن ەڭبەك نارىعىنداعى جۇمىسشى ماماندىقتار سۇرانىسىن سارالاۋ ءۇشىن كاسىپورىندار اراسىندا ساۋالناما ۇيىمداستىرادى. ونىڭ قورىتىندىسى كەيىن جەرگىلىكتى بيۋدجەتتى بەكىتۋ بارىسىندا ەسەپكە الىنادى. بىلتىرعى ساۋالناما 4 مىڭعا جۋىق بيزنەس وكىلدەرىن قامتىپ, مەگاپوليستە 16 مىڭنان استام جۇمىسشى ماماندىقتارىنا تاپشىلىق بارى انىقتالعان. نەگىزىنەن قۇرىلىس, وڭدەۋ ونەركاسىبى, دەنساۋلىق ساقتاۋ, حالىققا الەۋمەتتىك قىزمەت كورسەتۋ سالالارى جۇمىسشى ماماندىقتارىنا كوبىرەك مۇقتاج ەكەن.
كاسىپكەرلەر قۇقىن قورعاۋشى ۇيىم ءدۋالدى وقىتۋ جۇيەسىن جەتىلدىرۋ كەرەكتىگىن ايتادى. ول ءۇشىن ارنايى ۇسىنىستار ازىرلەگەن. ونىڭ ەڭ باسىندا وقۋ ورىندارى مەن كاسىپورىنداردىڭ بايلانىسىن نىعايتۋ ماسەلەسى تۇر. كەيىنگى ۇسىنىس باعالاۋ شكالاسىن ەنگىزۋ مەن مونيتورينگتى كۇشەيتۋ. بۇل ءدۋالدى جۇيەنىڭ ءتيىمدىلىن ارتتىرىپ, ساپاسىن جاقسارتپاق. كاسىپورىندا ايلىق جوعارى بولسا وقۋ بىتىرگەن تۇلەك مىندەتتى تۇردە سوندا قالۋعا تىرىسادى. جالاقىنى كوتەرۋ جۇمىس بەرۋشىگە قيىنعا سوعار. سوندىقتان پالاتا مەملەكەت جۇمىس ورىندارىن سۋبسيديالاسا دەگەن ۇسىنىس تاستاپ وتىر.
ءدۋالدى وقىتۋ جۇيەسىنە بايلانىستى بيزنەس وكىلدەرىنىڭ ايتار ءوز ۋاجدەرى بار. ماسەلەن ددەك كومپانياسىنىڭ باسشىسى مۇرات جۇماتاەۆ جاستار توكار ماماندىعىن يگەرۋگە قۇلشىنىس تانىتپايدى, جول الىس بولعاندىقتان ستۋدەنتتەر زاۋىتقا كەلىپ-كەتۋدەن قينالادى, ولاردىڭ وندىرىستىك وقۋ پراكتيكاسىن وقۋ ورىندارىنىڭ باسشىلىعى دۇرىستاپ قاداعالاسا ەكەن دەيدى. «Janna Eltanova» جشس ديرەكتورى, كرەاتيۆتى يندۋستريا سالاسىنىڭ وكىلى جاننا ەلتانوۆا «جاستار پراكتيكاسى», «العاشقى جۇمىس ورنى» جوبالارىنا قاتىساتىن جۇمىسسىز جاستاردى مەملەكەت جەڭىل ونەركاسىپ, ونىڭ ىشىندە توقىما ونەركاسىبىندەگى فابريكالارعا جولداسا ەكەن دەگەندى ايتتى.
جەرگىلىكتى اتقارۋشى بيلىك ستۋدەنتتەردىڭ قاتىناۋ ماسەلەسىن شەشۋ ءۇشىن جولاۋشى تاسىمالداۋشى كومپانيالارمەن كەلىسسوز جۇرگىزۋگە ءازىر. قالا اكىمدىگى شاكىرتتەردى ساپالى مامان ەتىپ دايارلاپ شىعارۋ ءۇشىن كاسىپورىندارعا ءوز قارجىسى ەسەبىنەن تاجىريبەلىك وقۋ كۋرسىنان وتكىزۋگە ۇسىنىس جاسادى.
جالپى پرەزيدەنت تاپسىرماسىنا ساي جۇمىسشى ماماندىقتار جىلىن ناتيجەلى وتكەرۋ ءۇشىن بيزنەس سالاسى, قالا بيلىگى, وڭىرلىك كاسىپكەرلەر پالاتاسى بىرلەسىپ تياناقتى جۇمىس اتقارۋعا ۋاعدالاسىپ وتىر.
قورىتا ايتقاندا قاراپايىم جۇمىسشى ماماندىقتارى ەلىمىزدىڭ ەكونوميكاسىن كوتەرەتىن الىپ كۇش. سوندىقتان مەملەكەت تاراپىنان ولارعا قامقورلىق ءاردايىم جوعارى بولۋ كەرەك. قاراپ وتىرساق كۇندەلىكتى ىشەتىن اسىمىز, كيەتىن كيىمىمىز جۇمىسشىلاردىڭ قولىمەن جاسالعان. تۇرىپ جاتقان باسپانا, عيماراتتى دا قاراپايىم قۇرىلىسشىلار سالعان. ال دىتتەگەن جەرىمىزگە ۋاقىتىلى كەشىكپەي بارۋىمىز جولاۋشى تاسىمالى قىزمەتىندەگى جۇرگىزۋشىلەردىڭ ەڭبەگىنىڭ ارقاسى. قىسقاسى ادامزاتقا قىزمەت ەتىپ, كەرەكتىنىڭ بارىمەن قامتاماسىز ەتىپ وتىرعان جۇمىسشىلار كلاسى. سول سەبەپتى دە ولاردىڭ كۇندىز-تۇنگى ەڭبەگى ەرلىكپەن پارا-پار. جۇمىسشىسىن باعالاعان ەل ءاردايىم وزادى. ال قاراپايىم ەڭبەككەرگە كەرەگى جاساعان ىسىنە ساي ماڭداي تەرىنىڭ اقىسىن الۋ, الەۋمەتتىك, قۇقىقتىق تۇرعىدان ءوزىن قورعانىشتا ەكەنىن سەزىنۋ. ەلىمىزدە جۇزەگە اسىپ جاتقان «ادىلەتتى قازاقستان» تۇجىرىمداماسىنىڭ كوزدەگەن ماقساتى دا وسى. ياعني ءاربىر جۇمىسكەر ءوزىنىڭ ەڭبەگىنە قاراي لايىقتى ءارى ءادىل باعالانعانىن قالايدى. بۇل ماسەلەدە الەمدە ۇلگى بولعان مەملەكەتتەر جەتەرلىك. ماسەلەن جاپونيادا قاراپايىم كوشە تازالاۋشىلاردىڭ ايلىعى ەڭ جوعارى جالاقىلاردىڭ قاتارىنا كىرەدى ەكەن. سوندىقتان بۇل ەلدە جۇمىسشى ماماندىعىنا دەگەن كوزقاراس ەرەكشە. قازاقستان دا كەلەشەكتە جۇمىسشى ماماندىعىن قادىرلەگەن قۋاتتى مەملەكەت بولارىنا سەنىم مول. ەڭ باستىسى سول ماقسات جولىنداعى العان باعىتىمىزدان تايماۋىمىز كەرەك.
