ۋنيۆەرسيتەتتە الداعى ۋاقىتتا جاساندى ينتەللەكتىنىڭ قىر-سىرىن ۇيرەتۋ قولعا الىنىپ وتىر. وعان ايقىن دالەل رەتىندە جاقىندا جاڭا وقۋ بلوگى اشىلدى. ونىڭ ىرگەتاسى وسىدان ءبىر جىل بۇرىن الماتى وبلىسىنىڭ اكىمى مارات سۇلتانعازيەۆتىڭ قاتىسۋىمەن قالانعان ەدى. اتالعان جوباعا «Freedom Holding Corp.» كومپانياسى قارجىلاي قولداۋ ءبىلدىرىپ, ىنتىماقتاستىقتى ارتتىرۋ ماقساتىندا جاڭا وقۋ كورپۋسى «SDU & Freedom» جاساندى ينتەللەكت بلوك رەتىندە قولدانىسقا بەرىلدى.
وقۋ ورداسىنداعى ەرەكشە عيماراتتىڭ اشىلۋىنا عىلىم جانە جوعارى ءبىلىم ءمينيسترى ساياسات نۇربەك, «Freedom Holding Corp.» كومپانياسىنىڭ باس اتقارۋشى ديرەكتورى تيمۋر تۋرلوۆ, الماتى وبلىسى اكىمىنىڭ ءبىرىنشى ورىنباسارى نۇرلان ءابدىراحىم, «قازاقتەلەكوم» كومپانياسىنىڭ باسقارما توراعاسى باعدات مۋسين, «سەرگەك» كامەراسىن ويلاپ تاپقانداردىڭ ءبىرى اسەت احمەتوۆ سياقتى ۋنيۆەرسيتەتتىڭ تانىمال تۇلەكتەرى قاتىستى.
عىلىم جانە جوعارى ءبىلىم ءمينيسترى ساياسات نۇربەك «بىلىمگە سالىنعان ينۆەستيتسيا ۇلكەن تابىس اكەلەدى» دەگەن امەريكالىق فيلوسوف ب.فرانكليننىڭ ءسوزىن تىلگە تيەك ەتىپ, جاساندى ينتەللەكت جوباسىنا قارجىلاي قولداۋ بىلدىرگەن تيمۋر رۋسلان ۇلىنا العىسىن جەتكىزدى. سونداي-اق بۇل باستامانىڭ بولاشاعى زور ەكەنىن ايتتى.
«جاساندى ينتەللەكت بلوگىنىڭ قۇرىلۋى – ەلىمىزدىڭ زياتكەرلىك الەۋەتىن قالىپتاستىرۋداعى ماڭىزدى قادام. ءبىر جاعىنان, بۇل SDU ۋنيۆەرسيتەتى ءۇشىن ۇلكەن جەتىستىك. ەندى جوبا اياسىندا ستۋدەنتتەر مەن زەرتتەۋشىلەرگە بولاشاق تەحنولوگياسىن تەرەڭ زەرتتەپ, قولدانۋعا جاڭا مۇمكىندىك اشىلادى.
مەملەكەت عىلىم مەن ءبىلىمدى دامىتاتىن بارلىق باستامانى قولدايدى. ءبىز SDU ۋنيۆەرسيتەتى تسيفرلىق تەحنولوگيالار سالاسىندا ەلىمىزدەگى ماڭدايالدى ماماندار دايارلايتىن باستى وقۋ ورنىنىڭ بىرىنە اينالادى دەپ سەنەمىز. مۇندا جاڭاشىل يدەيالار مەن يننوۆاتسيالىق جوبالار تۋىندايتىنىنا كۇمانىم جوق. بۇگىندە جاساندى ينتەللەكت ۇلكەن كورپوراتسيالار مەن ۇلتتىق ستراتەگيالاردىڭ دەڭگەيىندە قولدانىلادى. بىراق بيزنەس سالاسى ونىڭ قۋاتىن ءالى سەزگەن جوق. سوندىقتان بۇل جاقسى باستاما. جالپى SDU ۋنيۆەرسيتەتى پەداگوگيكا, اقپاراتتىق تەحنولوگيا, كيبەرقاۋىپسىزدىك باعىتىندا الدا كەلە جاتقان وقۋ ورنىنىڭ ءبىرى بولعاندىقتان, «Freedom Holding Corp.» كومپانياسىنىڭ ينۆەستيتسياسى ءوز جەمىسىن بەرەتىنى انىق. ويتكەنى الداعى ۋاقىتتا اتالعان كورپوراتسيا ءوز الەۋەتىن, تسيفرلىق تەحنولوگيا جاعىنان دامۋىنا مۇمكىندىك الىپ وتىر», دەدى س. نۇربەك.
SDU ۋنيۆەرسيتەتى رەكتورى ءالىمجان يگەنباەۆتىڭ سوزىنە سۇيەنسەك, SDU ۋنيۆەرسيتەتى IT, ينجەنەريا, پەداگوگيكا, قۇقىق, الەۋمەتتىك عىلىمدار جانە بيزنەس سالالارىندا سۇرانىسقا يە مامانداردى 30 جىلعا جۋىق ۋاقىت دايارلاپ كەلەدى. سوندىقتان حالىقارالىق سەرىكتەستەرمەن, اكادەميالىق ينستيتۋتتارمەن, بيزنەس قاۋىمداستىعىمەن ىنتىماقتاستىق اياسىندا دامۋ كەلەشەگى ايقىن بايقالادى.
«جاڭا بلوك ستۋدەنتتەردىڭ الەۋەتىن ارتتىرىپ, ولاردىڭ ستارتاپتارىن جۇزەگە اسىرۋعا مۇمكىندىك بەرەتىنىنە سەنىمىمىز مول. بۇل جاڭا نىسان – وڭىرىمىزدەگى ءبىلىم مەن عىلىم سالاسىن دامىتۋداعى ۇلكەن قادام دەپ بىلەمىز», دەدى ۋنيۆەرسيتەت رەكتورى.
ايتا كەتەيىك, SDU جاڭا وقۋ بلوگى «Freedom Holding Corp» كومپانياسىنىڭ «Freedom شاپاعات» قايىرىمدىلىق قورىنىڭ دەمەۋشىلىگىمەن سالىندى. جالپى اۋماعى – 5,6 مىڭ شارشى مەتر. مۇندا جاساندى ينتەللەكت تەحنولوگيالارىن دامىتۋعا, قارجىلىق ساۋاتتىلىقتى ارتتىرۋعا ارنالعان زەرتحانالار ورنالاسقان. سونداي-اق ينتەراكتيۆتى ورتالىقتار قۇرىلىپ, ستۋدەنتتەر قاۋىمى «Freedom Academy» ساراپشىلارىنان ينۆەستيتسيالاۋ جانە ترەيدينگتىڭ نەگىزگى قاعيدالارىن ۇيرەنەدى.
ديدار مالىك ۇلى
الماتى وبلىسى
