ەڭ جاس ۇلىبريتانيا حانشايىمىنىڭ ەسىمى بەلگىلى بولدى

استانا. 5 مامىر. ۇلىبريتانيا حانزاداسى ۋيليام مەن ونىڭ ايەلى كەيتتىڭ 2 مامىردا تۋعان قىزدارىنىڭ ەسىمى بەلگىلى بولدى. ەڭ جاس حانشايىمعا شارلوتتا ەليزاۆەتا ديانا دەگەن ەسىم بەرىلدى. بۇل تۋرالى euronews.com حابارلادى. كەنسينگتون سارايى تاراتقان مالىمەتكە سۇيەنسەك, ءسابيدى ۇلكەن اجەسى – پاتشايىم ەليزاۆەتا ءىى ارنايى كورگەننەن كەيىن, ات قويۋ ءراسىمى وتكەن. ديانا – ۋيليام حانزادانىڭ اناسىنىڭ ەسىمى ەكەنى بەلگىلى. پاتشايىم وتباسىندا قالىپتاسقان ءداستۇر بويىنشا جاڭا تۋعان ءسابيدىڭ ەسىمىن ەكى كۇننىڭ ىشىندە قويۋ وتە تەز بولىپ سانالادى. بۇعان دەيىن كىشكەنتاي حانشايىمنىڭ اعاسى دجوردجدىڭ ەسىمى دە ەكى كۇننىڭ ىشىندە قويىلعان ەدى. ال ولاردىڭ اكەلەرى – 1982 جىلى تۋعان ۋيليام حانزادانىڭ ەسىمى كوپشىلىككە ءبىر اپتادان سوڭ بەلگىلى بولدى. سونداي-اق, 1948 جىلى تۋعان چارلز حانزادانىڭ ەسىمى دە ۇزاق ۋاقىتتان كەيىن, ياعني, تۋعانىنا ءبىر اي وتكەن سوڭ جاريالانعان. شارلوتتا ەليزاۆەتا ديانا حانشايىم دۇنيەگە كەلگەن كۇننەن باستاپ رەسمي تۇردە ۇلىبريتانيا تاعىنىڭ ءتورتىنشى مۇراگەرى بولدى. ءسابيدىڭ ومىرگە كەلگەنىن بارلىق جەكسەنبىلىك باسىلىمدار جارىسا جازىپ, ونىڭ قۇرمەتىنە زەڭبىرەكتەن وق اتىلدى. ايتا كەتەيىك, كىشكەنتاي حانشايىمنىڭ ەسىمىنە بايلانىستى جەرگىلىكتى بۋكمەكەرلىك كەڭسەلەر ءباس قابىلداعان بولاتىن. سونىڭ ناتيجەسىندە شارلوتتا, ەليزاۆەتا, اليسا جانە ۆيكتوريا ەسىمدەرى كوش باستاعان. ەلامان قوڭىر. دەرەك: euronews.com. سۋرەت: ria.ru.