«استانا وپەرا» وركەسترىنىڭ ءسوليسى, قازاقستاننىڭ ەڭبەك سىڭىرگەن قايراتكەرى ايسۇلۋ بايكەنوۆا مادەني ءىس-شاراعا كوپتەگەن دارىندى ورىنداۋشى قاتىسقانىن جەتكىزدى.
ء«بىز فەستيۆالگە اۋقىمدى باعدارلاما دايىندادىق. تۋىندىلاردىڭ سان الۋان ءتۇرىن ساحناعا شىعارۋ ءۇشىن سوليستەرگە عانا ەمەس, وركەسترگە دە ايتارلىقتاي سالماق ءتۇستى. ويتكەنى وركەستر وسى بايقاۋعا اۋقىمدى ءۇش مۋزىكالىق كەش ازىرلەدى», دەدى ول.
ونىڭ ايتۋىنشا, باروككو ءداۋىرىنىڭ شىعارمالارىن ورىنداۋ – جەكە عىلىم. بۇل مۋزىكانىڭ مازمۇنى باسقا. ەلورداداعى مۋزىكانتتاردىڭ تۇراقتى رەپەرتۋارىنا مۇلدە ۇقسامايدى. مۇنداي كومپوزيتسيا تەاتر مەن كونتسەرت زالدارىنىڭ ساحنالارىندا سيرەك ۇسىنىلادى. ءبىر جاعىنان, باروككو مۋزىكاسىن ورىنداۋدىڭ ءوز ەرەكشەلىگى بار. سوندىقتان بۇل كەش كورەرمەنگە ادەمى اسەر سىيلادى.
فەستيۆالدىڭ العاشقى كۇنىندە ايسۇلۋ بايكەنوۆامەن بىرگە كونتسەرتتە جەكە پارتيالاردى تەاتر ارتىستەرى – سكريپكاشى اقمارال جانعازينا, ۆيولونچەليستەر كۋرۆانجان احاتوۆ, ديارجان احاتوۆ, فلەيتاشىلار الەكسەي كوسىرەۆ, الەكساندر تاراسكين جانە شاقىرىلعان پيانيست انارا كامەلينوۆا ۇسىندى. بۇل كەشتە باحتىڭ سولو ۆيولونچەلگە ارنالعان سيۋيتاسىنان №1 پرەليۋديا, سول ماجور, 3 بولىمنەن تۇراتىن وركەستر مەن سكريپكاعا ارنالعان كونتسەرت, ليا مينور, 3 بولىمنەن تۇراتىن №4 براندەنبۋرگ كونتسەرتى, سول ماجور, 3 بولىمنەن تۇراتىن وركەستر مەن فورتەپيانوعا ارنالعان №1 كونتسەرت, رە مينور سەكىلدى شىعارمالارى شىرقالدى. بۇدان بولەك, ا.ءۆيۆالديدىڭ 3 بولىمنەن تۇراتىن ەكى ۆيولونچەل جانە ىشەكتى اسپاپتار وركەسترىنە ارنالعان كونتسەرتى, سول مينور ورىندالدى.
ال فەستيۆالدىڭ قورىتىندى كەشىندە ايسۇلۋ بايكەنوۆا ءوزىنىڭ اسپاپشى ارىپتەستەرى – سكريپكاشىلار كارينا انيكۋشينا, اسەم جاقپاروۆا, بالنۇر قۇدايبەرگەن جانە شالقار جەلدىبايمەن, سونداي-اق گوبويلار توبىنىڭ كونتسەرتمەيستەرى قازاقستاننىڭ ەڭبەك سىڭىرگەن قايراتكەرى داميليا ماحپيروۆامەن, فاگوتتار توبىنىڭ كونتسەرتمەيستەرى اسەت نەلدىباەۆپەن بىرگە تىڭدارمانعا تاماشا تارتۋ جاسادى.
قايسار قۇسايىن
