ەكولوگيالىق سانا دەگەنىمىز – اعاش وتىرعىزۋ مەن قوقىس جيناۋدان الدەقايدا كەڭ ۇعىم. ول – قوعامنىڭ ءوزىن-ءوزى تاربيەلەۋى, بولمىسىن بايىپتاۋ, ۇرپاققا قالدىرار ساف تابيعات. مەملەكەت باسشىسى قاسىم-جومارت توقاەۆتىڭ باستاماسىمەن قولعا الىنعان «تازا قازاقستان» جوباسى – وسى تاربيەنىڭ جارقىن مىسالى دەر ەدىك.
ايتۋلى مادەني ءىس-شارانى ۇيىمداستىرعان «بايتاق» جاسىلدار پارتياسىنىڭ توراعاسى ازاماتحان امىرتاەۆ فورۋمدا سويلەگەن سوزىندە بيىل ءدال ءبىر جىل بولعان «تازا قازاقستان» اكتسيا شىن مانىندە ەل كولەمىندە ۇلتتىق سيپات الىپ ۇلگەرگەنىن جەتكىزدى.
«تازا ەكولوگيا – بۇل ۇلتتىڭ دەنساۋلىعى مەن بولاشاعى. تابيعاتتى قورعاۋ ارقىلى ءبىز ۇلتتىق بولمىسىمىزدى, ۇرپاعىمىزدىڭ اماندىعىن ساقتاپ قالامىز. بۇل – ءار ازاماتتىڭ ورتاق پارىزى», دەدى پارتيا توراعاسى.
ەكولوگتىڭ بۇل ءسوزى ءىس جۇزىندە قوعامدىق سانادا جاڭعىرىپ, ەلدىڭ ءار تۇكپىرىنەن جينالعان ازاماتتاردىڭ ءىس-ارەكەتىمەن دالەلدەندى.
اتالعان ءىس-شارادا ناۋرىز مەرەكەسى تويلاندى. ياعني, بۇل ەكولوگيالىق اكتسيا ەمەس, ۇلتتىق مادەنيەتتى تابيعاتپەن ۇشتاستىرا وتىرىپ, حالىقتىڭ جۇرەگىنە جول تاپقان شارا بولدى. وندا اسىق اتۋ, حانتالاپاي, ارقان تارتىس سىندى ۇلتتىق ويىندار, قولونەر كورمەسى مەن شەبەرلىك ساباقتارى, سونداي-اق تەاترلانعان كورىنىستەر مەن حالىق اندەرى – بارلىعى تابيعات پەن ءداستۇردىڭ ۇندەستىگىن پاش ەتتى.
شاراعا قاتىسقان زيالى قاۋىم وكىلدەرىنىڭ ءسوزى دە ەلدىڭ رۋحىن كوتەردى. اڭىز اقىن مۇحتار شاحانوۆ پەن قوعام قايراتكەرى اسىلى وسماننىڭ تابيعاتقا قۇرمەت پەن ۇلتتىق سانا تۋرالى ويلارى جينالعان جۇرتشىلىققا ەرەكشە اسەر ەتتى.
اڭىز ادام مۇحتار شاحانوۆ وزىنە جابىلعان شاپاندى ازاماتحان امىرتاەۆ باۋىرىنا اعالىق قۇرمەتپەن جاۋىپ, ىزگى تىلەگىن جاۋدىردى. كەرەمەت وقيعانىڭ كۋاگەرى بولعان شەتەلدىك قوناقتار مەن شاراعا قاتىسۋشىلار ءىنىنىڭ اعاعا, زامانىنىڭ زاڭعار تۇلعاسىنىڭ ىنىسىنە قۇرمەتىن كورىپ, ىقىلاس تىلەۋلەستىگىن ايامادى.
«بۇل – قۇرمەت پەن اعالىقتىڭ, ۇلتتىق رۋح پەن پاراساتتىڭ جارقىن كورىنىسى. شاحانوۆتىڭ بۇل ارەكەتىن ناعىز اعاعا ءتان ۇلىلىق. شاپان جابۋ – جاي عانا ءداستۇر ەمەس, ول امانات پەن سەنىمنىڭ بەلگىسى», دەدى قوعام قايراتكەرى اسىلى وسمان.
بىلتىر باستالعان «تازا قازاقستان» اكتسياسى بۇگىنگە دەيىن ەل كولەمىندە 6,2 ميلليون ادام قاتىسىپ, ەل تاريحىنداعى ەڭ اۋقىمدى ەكولوگيالىق ءىس-شارا بولىپ تاريحتا قالدى. ناتيجەسىندە 1,1 ميلليون توننا قوقىس جينالىپ, 1,6 ميلليوننان استام اعاش وتىرعىزىلدى. ال زاڭسىز 4 800 قوقىس الاڭىنىڭ 91 پايىزى جويىلدى. Telegram جەلىسىندەگى @TazaQazBot ارقىلى 10,7 مىڭ ءوتىنىش ءتۇسىپ, سونىڭ 9,7 مىڭى شەشىمىن تاپتى. بۇل – ەل ازاماتتارىنىڭ تابيعاتقا دەگەن كوزقاراسى وزگەرىپ كەلە جاتقانىنىڭ دالەلى.
ءىس-شاراعا قىرعىزستان, وزبەكستان, موڭعوليانىڭ جاسىلدار پارتيالارى مەن ورتالىق ازيا جانە ەۋروپا ەلدەرىنەن كەلگەن رەسمي وكىلدەردىڭ قاتىسۋى – «تازا قازاقستان» باستاماسىنىڭ حالىقارالىق دەڭگەيگە كوتەرىلگەنىن اڭعارتادى. بۇل – قازاقستاننىڭ تەك ءوز شەكاراسىندا عانا ەمەس, جاھاندىق ەكولوگيالىق جاۋاپكەرشىلىككە دە اتسالىسىپ وتىرعانىن بىلدىرەدى.
بۇگىنگى تاڭدا تابيعاتتى قورعاۋ – ساياسات ەمەس, پاراسات. بۇل – ءبىلىم مەن سانانىڭ, ۇرپاق الدىنداعى جاۋاپكەرشىلىكتىڭ, ۇلتتىق مادەنيەت پەن وركەنيەتتى دامۋدىڭ توعىسقان تۇسى.
«تازا قازاقستان» – ءبىر كۇندىك سەنبىلىك ەمەس. بۇل – تۇتاس ءومىر سالتىنا اينالۋعا ءتيىس. سوندىقتان بۇل باستاما – ۇلتتىڭ ءوزىن-ءوزى قايتا تانۋ جولىنداعى بىرەگەي قادام. تابيعاتقا قۇرمەت – وزىڭە قۇرمەت. ال «تازا قازاقستان» – سول قۇرمەتتى ناقتى ارەكەتپەن كورسەتەتىن جاڭا بۋىننىڭ تىنىسى, جاڭا ءداۋىردىڭ لەبى.
