دجوحار تسارناەۆ سوت وتىرىسىندا العاش رەت كوزىنە جاس الدى

استانا. 5 مامىر. بوستون مارافونى كەزىندە جارىلىس ۇيىمداستىردى دەپ ايىپتالعان دجوحار تسارناەۆ كەزەكتى سوت وتىرىسىندا ەموتسياسىن تەجەي الماي, كوزىنە جاس الدى. مۇنداي جايت ەكى جىلدان استام ۋاقىت بويى جالعاسىپ جاتقان سوت پروتسەسى كەزىندە العاش رەت تىركەلدى. بۇل تۋرالى BBC حابارلادى. كەشە بوستون فەدەرالدى سوتىندا كەزەكتى سوت وتىرىسى ءوتىپ, وندا ايىپتىنىڭ تۋىستارى كۋاگەر رەتىندە قاتىستى. تسارناەۆتىڭ تۋىس اپكەسى پاتيمات سۋلەيمانوۆا سوت كەزىندە كوڭىلى بوساپ, وزىنە قويىلعان سۇراقتارعا تولىق جاۋاپ بەرە المادى. سول كەزدە سۋديا ونىڭ وزىنە كەلۋى ءۇشىن سۇراق قويۋدى ۇزە تۇرۋ تۋرالى شەشىم شىعاردى. ءدال وسى ساتتە كوڭىلى بوساعان دجوحار تسارناەۆ تا كوزىنە كەلگەن جاسىن ءسۇرتتى. سوت وتىرىسىنا كۋاگەر رەتىندە بەس تۋىسى قاتىستى. ولاردىڭ بارلىعى دجوحاردى 8 جاسىندا اتا-اناسىمەن بىرگە اقش-قا كەتكەننەن كەيىن كورمەگەنىن ايتتى. تۋىستارىنىڭ ءبىرى تسارناەۆتىڭ بالا كۇنىندە وتە مەيىرىمدى بولعانىن ەسىنە الدى. ءتىپتى ول دجوحاردىڭ «پاتشا ارىستان» ءمۋلتفيلمىن كورىپ وتىرىپ, جىلاپ الاتىنىن دا ايتىپ بەردى. سوتقا قاتىسقان بارلىق تۋىسى القابيلەر سوتىن باۋىرلارىنىڭ ءومىرىن ساقتاپ قالۋعا شاقىردى. ايتا كەتەيىك, اعايىندى تامەرلان جانە دجوحار تسارناەۆتار 2013 جىلدىڭ ءساۋىر ايىندا ءداستۇرلى بوستون مارافونى كەزىندە جارىلىس ۇيىمداستىردى. ناتيجەسىندە 3 ادام قازا تاۋىپ, 264-ءى ءارتۇرلى دەڭگەيدەگى جاراقات الدى. تامەرلان تسارناەۆ ۇستاۋ وپەراتسياسى كەزىندە قازا تاپتى. ال قولعا تۇسكەن 21 جاستاعى دجوحار تسارناەۆ ءولىم جازاسىنا كەسىلۋى مۇمكىن. بۇگىندە ايىپتالۋشىنىڭ ادۆوكاتتارى دا ونىڭ جارىلىسقا قاتىسى بار ەكەنىن مويىندادى. الايدا, ولار نەگىزگى ۇيىمداستىرۋشى اعاسى – تامەرلان بولعانىن العا تارتۋدا. وسى جىلدىڭ ءساۋىر ايىندا القابيلەر سوتى ۇزاق كەڭەستەن كەيىن دجوحار تسارناەۆتى وعان تاعىلعان ايىپتاردىڭ 30 پۋنكتى بويىنشا ايىپتى دەپ تاپقان بولاتىن. ەلامان قوڭىر. دەرەك, سۋرەت: BBC.