توتەنشە جاعدايلار قىزمەتى, جەرگىلىكتى اتقارۋشى ورگاندار, جەدەل قۇتقارۋ جاساعى مەن پوليتسيا بولىمشەلەرى بار جيىنى 123 ادام جانە 39 تەحنيكا, ونىڭ ىشىندە 3 ءجۇزۋ قۇرالى اۋىلعا شوعىرلاندىرىلدى. قاۋىپتىڭ بەتىن قايتارۋ جۇمىسى ءجۇرىلىپ جاتىر.
قامدانعان قاپى قالماس دەپ كەشە قاۋىپسىزدىك ماقساتىندا اۋىلداعى وزەن جاعاسىنا جاقىن كوشەنىڭ 26 تۇرعىنى ءوز ەرىكتەرىمەن مەكتەپكە ۋاقىتشا ورنالاستىرىلدى. جەرگىلىكتى اتقارۋشى ورگانداردىڭ وكىلدەرى اۋلالارىن سۋ باسۋى مۇمكىن تۇرعىنداردىڭ مالدارىن باسقا شارۋا قوجالىقتارىنا جەتكىزدى.
وبلىس اكىمى بەرىك ءۋالي بۇگىن, تاڭەرتەڭ ەرتە بورودۋليحا اۋدانىنا ارنايى باردى.
توتەنشە جاعدايلار دەپارتامەنتى باستىعى ماناربەك شاپاعاتوۆپەن بىرگە اۋەلى ءۇبى وزەنىندەگى سۋ دەڭگەيىن تىكۇشاق ارقىلى اۋەدەن باقىلادى. سودان كەيىن اۋىلعا كەلىپ, جەدەل شتابتىڭ جيىنىن وتكىزدى.
توتەنشە جاعدايلار دەپارتامەنتى باستىعىنىڭ ورىنباسارى ازامات ورىمباەۆ پەن اۋدان اكىمى ايدار يبراەۆ ايماق باسشىسىنا احۋالدى بايانداپ بەردى. اۋدان اكىمىنىڭ ايتۋىنشا, ەلدى مەكەندەگى وزەن جاعاسىنا جاقىن 30 شاقتى ءۇيدىڭ اۋلاسىنا سۋ كىرگەن.
ەلدى مەكەندە جەدەل شتاب قۇرىلعان. وعان وبلىس اكىمىنىڭ ورىنباسارى ديميتري گاريكوۆ جەتەكشىلىك ەتەدى. ءۇبى وزەنىندەگى مۇز كەپتەلىسىن جويىپ, سۋ ارناسىن تولىق اشۋ ءۇشىن مۇز جارۋ جۇمىسى جۇرگىزىلىپ جاتىر.
اۋىلداعى باسقا اۋلالارعا سۋدىڭ كىرۋىنە جول بەرمەس ءۇشىن ءتيىستى شارا قولدانىلدى.
«كراسنىي يار - اۋدانداعى جىل سايىن سۋ باسۋ قاۋپى تونەتىن اۋىلداردىڭ ءبىرى. ەلدى مەكەندەگى جاعدايدى كەشەدەن بەرى جەكە باقىلاۋىمدا ۇستاپ وتىرمىن. اۋدان اكىمى مەن ءتيىستى قۇرىلىمدارعا تۇرعىندارعا تۇسىنىكتەمە جۇمىستارىن جۇرگىزۋدى, جاعدايدى ۇنەمى باقىلاۋدا ۇستاۋدى تاپسىرامىن. مۇز جارۋ جۇمىسىن كەشكە دەيىن اياقتاۋ قاجەت», دەدى ايماق باسشىسى.
اباي وبلىسى
