راسىندا بۇل ءبىر رەتتىك ناۋقان ەمەس, مۇنى – حالىقتىڭ ەكولوگيالىق مادەني ساناسىن قالىپتاستىراتىن ۇلتتىق يدەيا دەپ تۇسىنۋگە بولادى. ايتۋلى اكتسيا اياسىندا سەمەي قالاسىنىڭ تۇرعىندارى سەنبىلىككە شىقتى.
اباي وبلىسىندا جالپىوڭىرلىك تازالىق اكتسياسى باستالدى. سەنبىلىككە مەملەكەتتىك مەكەمە قىزمەتكەرلەرى, ءبىلىم بەرۋ مەكەمەلەرى, شاعىن جانە ورتا بيزنەس نىساندارىنىڭ وكىلدەرى, قوعامدىق جانە جاستار ۇيىمدارى, وبلىستىق, قالالىق جانە اۋداندىق ءماسليحات دەپۋتاتتارى جانە جالپى تۇرعىندار دا اكتسياعا بەلسەندى اتسالىستى.
سەمەي قالاسىندا وتكەن تازالىق جۇمىسىندا جۇرتشىلىقپەن بىرگە وبلىس اكىمى بەرىك ءۋالي دە قاتىستى. ايماق باسشىسى كەشە, 4 ساۋىردە وبلىس تۇرعىندارىنا ارنايى ۇندەۋ جاساپ, جالپىوڭىرلىك تازالىق اكتسياسى باستالاتىنىن جاريالاعان ەدى.
وبلىس ورتالىعىندا وتكەن سەنبىلىكتە ايماق باسشىسى بۇل تازالىق اكتسياسى ءبىر رەتتىك ەمەس, جىل بويى جالعاساتىنىن ايتتى.
ء«بىز وسى جالپىوڭىرلىك اكتسيانى باستاعان كەزدە «تۇرعىندار قالاي قابىلدار ەكەن؟!» دەپ قوبالجىعانىمىز دا راس. بىراق ويلاعانىمىزدان اسىپ ءتۇستى. حالىق وسىنى كۇتىپ جۇرگەندەي باستامانى ءىلىپ اكەتتى. ءتىپتى وتباسىلىق چاتتارعا دەيىن تاراپ, ءبىر بىرلەرىن تازالىق اكتسياسىن قولداۋعا شاقىرىپ جاتقان حالىقتىڭ شىنايى ىقىلاس-پەيىلىن اڭعاردىق. بۇل ءبىزدىڭ باستامامىزدىڭ حالىقپەن ۇندەسكەنىن كورسەتەدى. جاقسى باستالعان ءىستى ءارى قاراي جۇيەلى تۇردە جالعاستىرامىز», دەدى ايماق باسشىسى.
تازالىق اكتسياسى قالانىڭ بارلىق اۋداندارىن قامتىدى. ماسەلەن, اباي وبلىسىنىڭ جۇمىسپەن قامتۋ جانە الەۋمەتتىك باعدارلامالار باسقارماسى مەن وعان قاراستى مەكەمەلەر وبلىس اكىمىنىڭ ەلدى اباتتاندىرۋ جونىندەگى ۇندەۋىن قولداپ, جاڭاسەمەي اۋماعىنداعى سەنبىلىككە قاتىستى.
– اكىمنىڭ ۇندەۋى – ءار ازاماتقا ورتاق جاۋاپكەرشىلىك جۇكتەيدى. قالا تازالىعىنا ۇلەس قوسۋ – ءبىزدىڭ ازاماتتىق مىندەتىمىز, – دەدى ەڭبەك موبيلدىلىگى ورتالىعىنىڭ باسشىسى ەركەبۇلان تۇرسىن.
ال سەمەيدەگى «بەيبىتشىلىك» ارالىندا وتكەن سەنبىلىككە 300-گە تارتا جاس قاتىستى. «اباي جاستارى» رەسۋرستىق ورتالىعى ۇيىمداستىرعان بۇل ءىس-شارا – ايماق باسشىسىنىڭ ءوڭىردى كوگالداندىرۋ مەن تازالىقتى ساقتاۋ جونىندەگى ۇندەۋىن قولداۋدىڭ ناقتى كورىنىسى بولدى.
– تابيعات – ورتاق بايلىعىمىز. ءاربىر جاس ۇرپاق ونى قورعاپ, ۇقىپتىلىقپەن قاراۋعا مىندەتتى. ءبىز ايماق باسشىسىنىڭ باستاماسىن تولىق قولدايمىز. وسىنداي سەنبىلىكتەر ارقىلى ءوڭىرىمىزدى كوركەيتىپ, قوعامعا ۇلگى كورسەتەمىز, – دەدى «اباي جاستارى» رەسۋرستىق ورتالىعىنىڭ ديرەكتورى ايدوس تولەۋحانوۆ.
جاستار قولدارىنا كۇرەك-كەتپەن الىپ, ارال اۋماعىن قوقىستان تازالاپ, اعاش وتىرعىزۋعا دا اتسالىستى
اكىمنىڭ ۇندەۋىندە ايتىلعانداي, اكتسيا بارىسىندا ارنايى بايقاۋ جاريالانىپ, «ۇزدىك اۋدان», «ۇزدىك اۋىل», «ۇزدىك اۋلا», «ۇزدىك ۋنيۆەرسيتەت», «ۇزدىك كوللەدج», «ۇزدىك مەكتەپ», «ۇزدىك بالاباقشا», «ۇزدىك كوشە», «ۇزدىك مەكەمە», تاعى باسقا دا نوميناتسيالار بويىنشا تازالىق جاناشىرلارى انىقتالادى. جىل سوڭىندا جەڭىمپازدارعا قوماقتى سىيلىقتار تابىستالادى.
اباي وبلىسى
