كەلەسى سارسەنبىدە دەپۋتاتتارعا سالىق كودەكسى جانە وعان ىلەسپە سالىق ماسەلەلەرى بويىنشا تۇزەتۋلەر جوباسىن ءبىرىنشى وقىلىمدا قاراۋ ۇسىنىلادى. سالىق كودەكسى جوباسىن ۇكىمەت مەملەكەت باسشىسىنىڭ 2022 جانە 2023 جىلدارداعى قازاقستان حالقىنا ارناعان جولداۋلارىندا بەرىلگەن تاپسىرمالاردى ورىنداۋ ماقساتىمەن ازىرلەگەن. ول 822 باپتان تۇرادى جانە قازىرگى سالىق كودەكسى مەن ونى قولدانىسقا ەنگىزگەن زاڭنىڭ كۇشىن جويادى.
كودەكس جوباسىندا كەيبىر سالالارداعى سالىق تولەۋشىلەر ءۇشىن كورپوراتيۆتىك تابىس سالىعى مولشەرلەمەسىن سارالاۋ, وڭدەۋ ونەركاسىبىن دامىتۋعا جانە پايدانى جاڭعىرتۋعا قايتا ينۆەستيتسيالاۋدى ىنتالاندىرۋ ماقساتىمەن سالىقتىق شەگەرىمدەردى كەڭەيتۋ كوزدەلگەن.
سونداي-اق سالىقتار مەن بيۋدجەتكە تولەنەتىن باسقا دا مىندەتتى تولەمدەردىڭ سانىن قىسقارتۋ, بارلىق ارنايى سالىقتىق رەجىمدەردى وڭتايلاندىرۋ, سالىق جەڭىلدىكتەرىن بەرۋ جۇيەسىن باقىلاۋ مەن تالداۋدىڭ جاڭا تاسىلدەرىن ەنگىزۋ, قىمبات م ۇلىككە, الكوگول جانە تەمەكى ونىمدەرىنە سالىق مولشەرلەمەلەرىن ارتتىرۋ ۇسىنىلادى. سالىقتىق اكىمشىلەندىرۋدى جەتىلدىرۋگە باعىتتالعان باسقا دا بىرقاتار نورما مەن شارا قاراستىرىلعان.
ال ىلەسپە زاڭ جوباسى اياسىندا 3 كودەكس پەن 19 زاڭعا وزگەرىستەر ەنگىزۋ ۇسىنىلادى.
وسى كۇنى دەپۋتاتتار قارجى نارىعىن دامىتۋ جانە قارجىلىق قىزمەتتەردى تۇتىنۋشىلاردىڭ قۇقىقتارىن قورعاۋ ماسەلەلەرى جونىندەگى زاڭ جوباسىن ەكىنشى وقىلىمدا قارايتىن بولادى. زاڭ جوباسىن تالقىلاۋ بارىسىندا دەپۋتاتتار بىرنەشە نورما ۇسىندى. اتاپ ايتقاندا, تۇتىنۋشىلىق كەپىلسىز ونلاين-نەسيەلەر بەرۋ كەزىندە «سالقىنداتۋ كەزەڭىن» (جيىرما ءتورت ساعات) ەنگىزۋ, سونداي-اق نەسيە الۋعا العاش رەت جۇگىنگەن ازاماتتاردىڭ بانك نەمەسە ميكروقارجى ۇيىمىنىڭ بولىمشەسىنە جەكە كەلۋىن مىندەتتەۋ ماسەلەلەرى كوتەرىلدى.
سونىمەن قاتار ازاماتتاردىڭ جەكەلەگەن ساناتتارىنا كەپىلسىز تۇتىنۋشىلىق قارىزداردى ولاردىڭ «ەلەكتروندىق ۇكىمەت» پورتالى ارقىلى رەسىمدەلگەن كەلىسىمىنەن كەيىن عانا بەرۋ تالاپتارى قاراستىرىلعان (21 جاسقا تولماعان جانە 55 جاستان اسقان ازاماتتارعا).
بۇعان قوسا حالىق قالاۋلىلارى الاياقتىق وپەراتسيالارعا قارسى ءىس-قيمىل شارالارىن كۇشەيتۋگە باعىتتالعان, ونىڭ ىشىندە انتيفرود-ورتالىقتىڭ قىزمەتىنە جانە قارىز الۋشىلاردىڭ قۇقىقتارىن قورعاۋعا بايلانىستى بىرقاتار نورما ۇسىندى.
جالپى, وتىرىستا قۇقىق بۇزۋشىلىقتاردىڭ الدىن الۋ جانە عىلىمدى قاجەت ەتەتىن ايماقتاردى دامىتۋ ماسەلەلەرى بويىنشا جاڭا زاڭ جوبالارى جۇمىسقا قابىلدانباق.
