«ەلىمىز ەنەرگەتيكالىق قۋات كوزدەرىن دامىتۋ جانە جاڭعىرتۋ باعىتىندا بەلسەندى جۇمىس ىستەپ جاتىر. وسى ورايدا قولدا بار جانە الداعى ۋاقىتتا قوسىلاتىن جاڭا قۋات كوزدەرىن ءبىلۋ اسا ماڭىزدى», دەپ اتاپ ءوتتى «سامۇرىق-قازىنا» اق-نىڭ ستراتەگيا جانە اكتيۆتەردى باسقارۋ جونىندەگى تەڭ باسقارۋشى ديرەكتورى ەلجاس وتىنشيەۆ.
ەلەكتر ەنەرگەتيكاسى – ەل ەكونوميكاسىنىڭ تۇراقتىلىعى مەن ازاماتتاردىڭ ءال-اۋقاتى ءۇشىن شەشۋشى ءرول اتقاراتىن سالا. «سامۇرىق-ەنەرگو» ەنەرگيا ءوندىرۋ, تاراتۋ جانە جاڭارتىلاتىن ەنەرگيا كوزدەرىن دامىتۋ باعىتىندا جۇمىس ىستەيتىن ەلىمىزدەگى ءىرى ۇيىمداردىڭ ءبىرى. بىلتىر كومپانيا وندىرىستىك جوسپاردى ارتىعىمەن ورىنداپ, ونىڭ 20 مىڭ قىزمەتكەرى بار 25 ەنشىلەس كومپانياسى جالپى كولەمى 39,7 ملرد كۆت/ساع ەلەكتر ەنەرگياسىن وندىرگەن. بۇل 2023 جىلمەن سالىستىرعاندا ەداۋىر جوعارى. ال بيىل كومپانيا بۇل كورسەتكىشتى 40,9 ملرد كۆت/ساع-قا دەيىن ارتتىرۋدى ماقسات ەتىپ وتىر. ەلىمىز بويىنشا وندىرىلەتىن قۋاتتىڭ 32%-ى جانە كومىر ءوندىرىسىنىڭ 42%-ى وسى «سامۇرىق-ەنەرگو» كومپانياسىنا تيەسىلى.
وتكەن جىلى ەنەرگەتيكالىق حولدينگ اۋقىمدى جوندەۋ ناۋقانىن وتكىزدى. مەجەلى جوندەۋ جۇمىستارى تولىعىمەن ورىندالىپ, ناتيجەسىندە بيىل جىلىتۋ ماۋسىمى ءساتتى ءوتتى.
ماسەلەن, ەكىباستۇز قالاسىنداعى ءبىرىنشى ەلەكتر ستانساسىنىڭ №1, №2, №8 ەنەرگەتيكالىق بلوكتارىن قالپىنا كەلتىرۋ جۇمىستارى اياقتالىپ, ولاردىڭ زياندى گازداردى شىعارۋ دەڭگەيى ازايتىلعان. سالدارىنان, ستانسانىڭ قۋاتى 4000 مۆت-قا دەيىن ارتتى.
«ەكىباستۇزداعى ەلەكتر ستانساسىندا اۋقىمدى جوندەۋ جۇمىسى اتقارىلدى. سوڭعى 30 جىلدان بەرى ول العاش رەت سەگىز بلوكپەن جۇمىس ىستەي باستادى. الداعى ۋاقىتتا قالعان بلوكتاردى كەزەڭ-كەزەڭىمەن تولىقتاي جاڭعىرتۋ كوزدەلگەن. سونىمەن قاتار نىسان قىزمەتىنىڭ ەكولوگياعا زياندى اسەرىن ازايتۋ ماقساتىندا جاڭا سۇزگىلەر مەن قوندىرعىلار ورناتۋ جوسپارلانىپ وتىر», دەدى «سامۇرىق-ەنەرگو» اكتسيونەرلىك قوعامىنىڭ باسقارما توراعاسى قايرات ماقسۇتوۆ.
گاز ءوندىرۋ جوبالارى بويىنشا الماتى ەنەرگەتيكالىق كەشەنىن جاڭعىرتۋ جانە قىزىلوردا قالاسىندا بۋ-گاز قوندىرعىسى نەگىزىندەگى ەلەكتر ستانساسىن سالۋ جوسپاردا بار دەيدى ۇيىم باسشىسى.
ال كومىر ءوندىرىسى بويىنشا ەكىباستۇز 2-ەلەكتر ستانساسىن جاڭعىرتىپ, كوكشەتاۋ, سەمەي جانە وسكەمەن قالالارىندا جىلۋ ەلەكتر ورتالىقتارىن, سونداي-اق تازا كومىر تەحنولوگياسى نەگىزىندەگى 3-ەلەكتر ستانساسىن سالۋ جوسپارلانعان.
كەڭەس وتىرىسى بارىسىندا جاسىل ەنەرگەتيكا باعىتىنداعى جوبالار جايى دا قوزعالدى. ەنەرگەتيكالىق قاۋىپسىزدىكتى قامتاماسىز ەتۋ جانە كەيىنگى جىلدارى ەلەكتر ەنەرگياسىنا ءوسىپ كەلە جاتقان سۇرانىستى وتەۋ ماقساتىندا ەلىمىزدە كۇن جانە جەل ەنەرگەتيكاسىن دامىتۋعا ايرىقشا ءمان بەرىلەدى. «سامۇرىق-ەنەرگو» وسى سالادا حالىقارالىق سەرىكتەستەرمەن بىرگە بىرنەشە جوبانى جۇزەگە اسىرىپ, جاڭارتىلاتىن ەنەرگيا ۇلەسىن ارتتىرۋدى كوزدەپ وتىر. 2032 جىلعا دەيىن ۇيىم ەلىمىزدە ەنگىزىلەتىن جاڭا قۋات كوزدەرىنىڭ 55%-ىن, ناقتى ايتقاندا 14,3 گۆت-تى ىسكە قوسپاق.
جيىن قورىتىندىسى بويىنشا وتىرىسقا قاتىسۋشىلار ەنەرگەتيكالىق ساياساتتىڭ اشىقتىعىن قامتاماسىز ەتۋ, يننوۆاتسيالىق شەشىمدەردى دامىتۋ, جاسىل ەنەرگەتيكاعا كوشۋ ۇدەرىسىن جەدەلدەتۋ جونىندە سۇراقتار قويىپ, بىرقاتار ۇسىنىس ەنگىزدى.
وتىرىس ناتيجەسىندە, «سامۇرىق-ەنەرگو» باسشىلىعى قوعامدىق كەڭەستىڭ ۇسىنىستارىن ەسكەرەتىنىن جانە بارلىق جوبالاردىڭ اشىق ءارى ءتيىمدى ىسكە اسۋىن قامتاماسىز ەتەتىنىن مالىمدەدى.
ەنەرگەتيكالىق سەكتوردىڭ تۇراقتى دامۋى – ەلىمىزدىڭ ەكونوميكالىق قاۋىپسىزدىگى مەن حالقىمىزدىڭ ءال-اۋقاتىنىڭ كەپىلى. سوندىقتان «سامۇرىق-قازىنا» قورىنىڭ بۇل سالاداعى ستراتەگيالىق ءرولى ەرەكشە. جيىندا تالقىلانعان جوبالار ەلىمىزدىڭ ەنەرگەتيكالىق الەۋەتىن نىعايتۋعا, ۇلتتىق ەكونوميكانىڭ تۇراقتى دامۋىن قامتاماسىز ەتۋگە باعىتتالعان ماڭىزدى قادامدار بولماق.
جانسايا قاپاسقىزى
